കന്‍സാസ് സിറ്റി: കന്‍സാസ് സിറ്റിയിലുള്ള ഇംഗ്ലണ്ടിന്റെ താവളത്തില്‍ കള്ളന്‍ കയറി പരിശീലന ഉപകരണങ്ങള്‍ മോഷ്ടിച്ചു. ടീം എത്തുന്നതിനു മുമ്പായിരുന്നു സംഭവം.
ഫ്‌ളോറിഡയിലെ പ്രീ ടൂര്‍ണമെന്റ് ബേസില്‍ നിന്ന് ഉപകരണങ്ങള്‍ സ്വോപ്പ് സോക്കര്‍ വില്ലേജിലേക്ക് മാറ്റുന്നതിനിടെയാണ് കളിക്കാരുടെ ബൂട്ട്‌സ് ഉള്‍പ്പെടെയുള്ള സാധനങ്ങള്‍ കള്ളന്‍ കവര്‍ന്നത്. പന്തുകളും ബൂട്ടുകളും മോഷ്ടിക്കപ്പെട്ടിട്ടുണ്ടെന്നാണ് റിപ്പോര്‍ട്ട്. കന്‍സാസ് സിറ്റി ലോക്കല്‍ പോലീസ് അന്വേഷണം ആരംഭിച്ചിട്ടുണ്ട്. താരങ്ങളായ ഹാരി കെയ്ന്‍, ജൂഡ് ബെല്ലിങ്ഹാം എന്നിവരുടെ വസ്തുക്കളും കാണാതായിട്ടുണ്ട്. പരിശീലനത്തിനയി ഉപകരണങ്ങള്‍ കൊണ്ടുപോയ വാഹനം ഭാഗികമായി തകര്‍ന്നിട്ടുണ്ടെന്നും റിപ്പോര്‍ട്ടില്‍ പറയുന്നു. ബുധനാഴ്‌ച്ച ഡാളസില്‍ ക്രൊയേഷ്യയ്‌ക്കെതിരായ മത്സരത്തിന് തയാറെടുക്കുന്നതിനായി സംഘം ഇന്ന് കന്‍സാസ് സിറ്റിയില്‍ എത്തേണ്ടതായിരുന്നു. ഇതോടെ താരങ്ങളുടെ അവസാനഘട്ട തയാറെടുപ്പ് മന്ദഗതിയിലാകാനും സാധ്യതയുണ്ട്.
