ന്യൂദല്‍ഹി: ഉടമസ്ഥാവകാശ തര്‍ക്കം നിലനില്‍ക്കുന്നതിനാല്‍ അമൃതാനന്ദമയീ മഠത്തിലെ ആനയായ ഊട്ടോളി രാമനെ സര്‍ക്കാര്‍ ഏറ്റെടുക്കണമെന്ന് സുപ്രീംകോടതി ഇടക്കാല ഉത്തരവ്. അന്തിമവിധി വരുന്നത് വരെ വനംവകുപ്പിന്റെ കസ്റ്റഡിയില്‍ വിടാനാണ് ജസ്റ്റിസ് ദീപാങ്കര്‍ ദത്ത, ജസ്റ്റിസ് സതീഷ് ചന്ദ്ര ശര്‍മ എന്നിവര്‍ അടങ്ങിയ ബെഞ്ചിന്റെ നിര്‍ദേശം.
കോടതി ഉത്തരവ് ലംഘിച്ച് രാമനെ ക്ഷേത്ര പരിപാടികളില്‍ പങ്കെടുപ്പിച്ചത് ചൂണ്ടിക്കാട്ടി ആനയെ സംരക്ഷിക്കുന്ന കൃഷ്ണന്‍കുട്ടിക്ക് കോടതി 2000 രൂപ പിഴയിട്ടു. ജയ്‌കൃഷ്ണ മേനോന്‍ നല്‍കിയ ഹര്‍ജിയിലാണ് കോടതി ഉത്തരവ്.
അമൃതാനന്ദമയീ മഠം കരുനാഗപ്പള്ളി പോലീസ് സ്‌റ്റേഷനില്‍ ഉടമസ്ഥാവകാശ കേസ് നല്‍കിയതാണ് തര്‍ക്കത്തിന്റെ തുടക്കം. 2001 സപ്തംബര്‍ 12ന് വള്ളിക്കാവിലെ അമൃതാനന്ദമയീ മഠത്തില്‍ കെ.വി. സദാനന്ദന്‍ എന്ന വ്യക്തിയാണ് ആന്‍ഡമാന്‍ നിക്കോബാര്‍ ദ്വീപില്‍ നിന്ന് കൊണ്ടുവന്ന മധു എന്ന ആനയെ നടയ്‌ക്കിരുത്തുന്നത്.
പിന്നീട് ഈ ആനയ്‌ക്ക് അമൃതാനന്ദമയീ ദേവി രാമന്‍ എന്ന് പേര് നല്‍കി. 2017ല്‍ മദപ്പാടിലായ രാമനെ സംരക്ഷിക്കാന്‍ തൃശൂര്‍ ഊട്ടോളി സ്വദേശിയായ കൃഷ്ണന്‍കുട്ടി എന്ന വ്യക്തിക്ക് കൈമാറി. ഇയാള്‍ ഉപദ്രവിക്കുന്നെന്ന് അറിഞ്ഞ മഠം ആനയെ തിരികെ ആവശ്യപ്പെട്ടു. പകരം രാമനെ പരിപാലിച്ചതില്‍ 35 ലക്ഷം രൂപ നല്‍കാമെന്നും മഠം സുപ്രീംകോടതിയെ അറിയിച്ചിരുന്നു. എന്നാല്‍ താനാണ് ആനയുടെ അവകാശിയെന്നാണ് കൃഷ്ണന്‍കുട്ടിയുടെ ഇപ്പോഴത്തെ വാദം.
