ഫിലാഡൽഫിയ : പിസ്സ ഡെലിവറി ഡ്രൈവറായി ജോലി ചെയ്തിരുന്ന ഇന്ത്യക്കാരനെ അമേരിക്കയിലെ നോർത്ത് ഫിലാഡൽഫിയയിലെ ഒരു ഹൗസിംഗ് സൊസൈറ്റിയിൽ വെടിവച്ചു കൊന്ന നിലയിൽ കണ്ടെത്തി. ഹൈദരാബാദ് സ്വദേശിയായ 28 കാരനായ അൻഷുൽ കുഞ്ചയാണ് കൊല്ലപ്പെട്ടതെന്ന് റിപ്പോർട്ടുണ്ട്.
വെള്ളിയാഴ്ച അർദ്ധരാത്രിയോടെ നോർത്ത് ഫിലാഡൽഫിയയിലെ എഡ്ഗ്ലി സ്ട്രീറ്റിലെ 2300 ബ്ലോക്കിലുള്ള റെയ്‌മണ്ട് റോസൻ ഹോംസിൽ പിസ്സ വിതരണം ചെയ്യാൻ കുഞ്ച എത്തിയപ്പോഴാണ് സംഭവം. പിസ്സ വിതരണം ചെയ്തയുടൻ അക്രമി കുഞ്ചയുടെ തലയിൽ വെടിവച്ച് കൊലപ്പെടുത്തുകയായിരുന്നു.
തുടർന്ന് വിവരം അറിഞ്ഞെത്തിയ പോലീസ് സ്ഥലത്തെത്തി കുഞ്ചയെ ടെമ്പിൾ യൂണിവേഴ്സിറ്റി ആശുപത്രിയിലേക്ക് കൊണ്ടുപോയി, പുലർച്ചെ ഒരു മണിയോടെ ഡോക്ടർമാർ മരിച്ചതായി പ്രഖ്യാപിച്ചു.
തുടർന്ന് പോലീസ് അന്വേഷണം ആരംഭിച്ചു, ഇതുവരെ ആരെയും അറസ്റ്റ് ചെയ്തിട്ടില്ല. കുഞ്ചയുടെ മരണത്തിൽ ന്യൂയോർക്കിലെ ഇന്ത്യൻ കോൺസുലേറ്റ് ദുഃഖം രേഖപ്പെടുത്തുകയും അദ്ദേഹത്തിന്റെ കുടുംബവുമായി ബന്ധപ്പെടുന്നുണ്ടെന്നും അവർക്ക് ആവശ്യമായ എല്ലാ സഹായങ്ങളും നൽകാൻ ഉദ്യോഗസ്ഥർ ശ്രമിക്കുന്നുണ്ടെന്നും കൂട്ടിച്ചേർത്തു.
