അമ്പലപ്പുഴ: കുട്ടനാട് എം എല്‍ എ റെജി ചെറിയാനെ പൊതുവേദിയില്‍ രൂക്ഷമായി വിമര്‍ശിച്ച് അമ്പലപ്പുഴ എം എല്‍ എ ജി സുധാകരന്‍.തന്റെ മണ്ഡലത്തില്‍ മുന്‍കൂട്ടി അറിയിക്കാതെ സന്ദര്‍ശനം നടത്തിയതിനാണ് വിമര്‍ശനം.
അമ്പലപ്പുഴ മണ്ഡലത്തിലെ തോട്ടപ്പള്ളി സ്പില്‍വേയിലാണ് കുട്ടനാട്ടിലെ യു ഡി എഫ് എം എല്‍ എ റെജി ചെറിയാന്‍ അറിയിക്കാതെ സന്ദര്‍ശനം നടത്തിയത്. ഇതേക്കുറിച്ച് നിയമസഭ പ്രിവിലേജ് കമ്മിറ്റിയില്‍ പരാതി നല്‍കിയാല്‍ റെജി ചെറിയാന്‍ ശിക്ഷിക്കപ്പെടും. ആദ്യമായി എം എല്‍ എ ആയ ഒരാള്‍ മറ്റൊരു എം എല്‍ എയ്‌ക്ക് മേല്‍ അധികാരം സ്ഥാപിക്കാന്‍ ശ്രമിക്കുകയാണെന്നും ജി സുധാകരന്‍ കുറ്റപ്പെടുത്തി.
റെജി ചെറിയാന്റെ ഉടമസ്ഥതയിലുള്ള ബാര്‍ ഹോട്ടലില്‍ വെള്ളമടിക്കാന്‍ താന്‍ പോകാത്തതുകൊണ്ട് തന്നോട് സ്‌നേഹം കാണില്ല. അവിടെ സ്ഥിരമായി വെള്ളമടിക്കാന്‍ പോകുന്ന നേതാക്കള്‍ ആരൊക്കെയാണെന്ന് തനിക്ക് നന്നായി അറിയാമെന്നും ജി സുധാകരന്‍ പറഞ്ഞു. മണ്ഡല അതിര്‍ത്തികളിലെ സന്ദര്‍ശനങ്ങളെ ചൊല്ലി ഭരണപക്ഷ എം എല്‍ എമാര്‍ തമ്മിലുളള പരസ്യ പോര് ആലപ്പുഴയിലെ രാഷ്‌ട്രീയ വൃത്തങ്ങളില്‍ പുതിയ ചര്‍ച്ചകള്‍ക്ക് കാരണമായി.
