കോഴിക്കോട് : വയനാട് മേപ്പാടിയില്‍ കാട്ടാന ആക്രമണത്തില്‍ ജെസി മരണപ്പെട്ട സംഭവം അത്യന്തം ദാരുണവും വേദനാജനകവുമാണെന്ന് ബിജെപി സംസ്ഥാന ജനറല്‍ സെക്രട്ടറി അനൂപ് ആന്റണി. ജോലിക്ക് പോകുന്നതിനിടയില്‍ ഒരു കുടുംബത്തിന്റെ പ്രതീക്ഷയാണ് ഇല്ലാതായിരിക്കുന്നത്. മലയോര മേഖലയിലെ ജനങ്ങള്‍ ഇന്ന് സ്വന്തം വീടുകളിലും പൊതുവഴികളിലും പോലും സുരക്ഷിതരല്ലാത്ത സാഹചര്യമാണ് നിലനില്‍ക്കുന്നതെന്നും അദ്ദേഹം പറഞ്ഞു.
വയനാട് മുന്‍ എംപി രാഹുല്‍ ഗാന്ധി ജനങ്ങളുടെ സുരക്ഷയും വികസനവും ഉറപ്പാക്കുമെന്ന വലിയ വാഗ്ദാനങ്ങളോടെയായിരുന്നു മണ്ഡലത്തെ പ്രതിനിധീകരിച്ചത്. എന്നാല്‍ വന്യജീവി ആക്രമണങ്ങള്‍ക്ക് പരിഹാരം കണ്ടെത്താന്‍ യാതൊരു ഇടപെടലും നടത്തിയില്ല. ഇപ്പോഴത്തെ എം പി പ്രിയങ്ക വാദ്രയും ഇത്തരം ഗുരുതര വിഷയങ്ങളില്‍ തുടരുന്ന നിശബ്ദത അവസാനിപ്പിക്കണമെന്നും അനൂപ് ആന്റണി ആവശ്യപ്പെട്ടു.
വയനാട്ടിലെ ജനങ്ങള്‍ പ്രതീക്ഷിക്കുന്നത് തെരഞ്ഞെടുപ്പ് സമയത്തെ വാഗ്ദാനങ്ങള്‍ക്കപ്പുറം ജനങ്ങളുടെ ജീവന്‍ സംരക്ഷിക്കുന്ന നടപടികളാണ്. ആളുകള്‍ നിരന്തരം വന്യജീവി ആക്രമണങ്ങള്‍ മൂലം മരിക്കുമ്പോഴും പരിക്കേല്‍ക്കുമ്പോഴും ഭരണകൂടവും ജനപ്രതിനിധികളും തുടരുന്ന മൗനം ജനങ്ങളോടുള്ള അവഗണനയാണെന്നും അനൂപ് ആന്റണി കുറ്റപ്പെടുത്തി.
സംസ്ഥാന സര്‍ക്കാരിന്റെ അനാസ്ഥയും ജനപ്രതിനിധികളുടെ കഴിവുകേടും ചേര്‍ന്നാണ് വയനാട്ടിലെ ജനങ്ങളെ ദുരിതത്തിലാഴ്‌ത്തിയത്. വന്യജീവി ആക്രമണം തടയാന്‍ അടിയന്തര നടപടികള്‍ സര്‍ക്കാര്‍ എത്രയും വേഗം നടപ്പാക്കണമെന്നും അനൂപ് ആന്റണി ആവശ്യപ്പെട്ടു.
