ധര്മശാല: ഐപിഎല് 19-ാം സീസണില് ഇന്ന് ജയിക്കുന്നവര് ഫൈനലില്. രാത്രി 7.30ന് ധര്മശാലയില് നടക്കുന്ന മത്സരത്തില് ഏറ്റുമുട്ടുന്നത് നിലവിലെ ജേതാക്കളായ റോയല് ചലഞ്ചേഴ്സ് ബെംഗളൂരുവും(ആര്സിബി) ഗുജറാത്ത് ടൈറ്റന്സും.
70 മത്സരങ്ങള് നീണ്ട ലീഗ് റൗണ്ടില് ഒന്നാം സ്ഥാനക്കാരായാണ് നിലവിലെ ജേതാക്കളായ റോയല് ചലഞ്ചേഴ്സ് ബെംഗളൂരു പ്ലേ ഓഫിലേക്ക് മുന്നേറിയിട്ടുള്ളത്. രണ്ടാം സ്ഥാനക്കാരാണ് ഇന്നത്തെ എതിരാളികളായ ടൈറ്റന്സ്. ഇരു ടീമുകളും 18 വീതം പോയിന്റുകള് നേടി തുല്യത പാലിക്കുന്നുവെങ്കിലും റണ്നിരക്കിന്റെ മികവില് ബെംഗളൂരു മുന്നിലെത്തുകയായിരുന്നു. മൂന്നാം സ്ഥാനക്കാരായ സണ്റൈസേഴ്സ് ഹൈദരാബാദിനും 18 പോയിന്റാണുള്ളത്.
ഐപിഎള് പ്ലേ ഓഫില് ആദ്യ മത്സരമായ ക്വാളിഫയര് വണില് ജയിക്കുന്ന ടീം നേരിട്ട് ഫൈനലില് പ്രവേശിക്കും. തോല്ക്കുന്നവര് പുറത്താകില്ല, ഒരവസരം കൂടി ബാക്കിയുണ്ട്. നാളെ നടക്കുന്ന എലിമിനേറ്ററില് ജയിക്കുന്നവരുമായി വെള്ളിയാഴ്ച്ചത്തെ മത്സരം ജയിച്ചാല് മതിയാകും.
ഇന്നിറങ്ങുന്ന രണ്ട് ടീമുകളും ജയത്തോടെ കൂടുതല് ബുദ്ധിമുട്ടുകളില്ലാതെ ഫൈനലിന് സജ്ജരാകാനായിരിക്കും ശ്രമിക്കുക. അതിന് സാധിച്ചില്ലെങ്കില്. മറ്റൊരു മത്സരം കൂടി കഴിഞ്ഞ ഫൈനലിനുള്ള ഒരുക്കങ്ങള്ക്ക് ദിവസങ്ങള് ലഭിക്കൂ.
ലീഗ് ഘട്ടത്തില് ഇരു ടീമുകളും നേര്ക്കുനേര് വന്നപ്പോള് ആര്സിബിക്കായിരുന്നു വിജയം. ഏപ്രില് 24ന് നടന്ന മത്സരത്തില് ആര്സിബി അഞ്ച് വിക്കറ്റ് ജയം നേടി. അന്ന് ആദ്യം ബാറ്റ് ചെയ്ത് 20 ഓവറില് മൂന്ന് വിക്കറ്റില് 205 റണ്സെന്ന കൂറ്റന് സ്കോര് ടൈറ്റന്സ് പടുത്തു. ഏഴ് പന്തുകള് ബാക്കി നില്ക്കെ ആര്സിബി ലക്ഷ്യത്തിലെത്തുകയായിരുന്നു.
കഴിഞ്ഞ സീസണ് ഫൈനലില് പഞ്ചാബ് കിങ്സിനെ തോല്പ്പിച്ചാണ് ആര്സിബി ചരിത്രത്തില് ആദ്യമായി ഐപിഎല് കിരീടം നേടിയത്. ഇത്തവണയും കപ്പ് നിലനിര്ത്തുമെന്ന പ്രതീതിയിലാണ് ആര്സിബി മുന്നേറിക്കൊണ്ടിരിക്കുന്നത്.
സീസണില് പതിഞ്ഞ താളത്തില് തുടങ്ങിയ ടൈറ്റന്സ് പതുക്കെ കളം പിടിക്കുകയായിരുന്നു. ലീഗ് ഘട്ടം അവസാനിക്കാറായപ്പോള് ഒരവസരത്തില് പോയിന്റ് പട്ടികയില് മുന്നിലെത്താന് പോലും ടൈറ്റന്സിന് സാധിച്ചു. ടീം ആദ്യമായി പങ്കെടുത്ത 2022 സീസണില് കപ്പടിക്കാന് സാധിച്ചു. ഹാര്ദിക് പാണ്ഡ്യയ്ക്ക് കീഴില് അന്ന് കിരീടമുയര്ത്തിയ ടീം തൊട്ടടുത്ത സീസണില് ഫൈനലിലെത്തിയെങ്കിലും പരാജയപ്പെട്ടു. നാല് വര്ഷത്തെ ഇടവേളയ്ക്ക് ശേഷം വീണ്ടും കിരീടം നേടാനാണ് ടൈറ്റന്സ് ശുഭ്മാന് ഗില്ലിന് കീഴില് ഇറങ്ങുന്നത്.
