കശ്മീരിൽ ജമാ അത്തെ ഇസ്ലാമിക്ക് എതിരേ വ്യാപക എൻഐഎ റെയ്ഡ്; അവിടെ നിരോധിത സംഘടന

ശ്രീനഗർ: ജമ്മു കശ്മീരിൽ ആറു വർഷം മുമ്പ് നിരോധിക്കപ്പെട്ടിട്ടുള്ള
ജമാഅത്തെ ഇസ്ലാമി ജമ്മു കശ്മീർ (ജെഇഐ)ക്കെതിരെ ദേശീയ അന്വേഷണ ഏജൻസി തിങ്കളാഴ്ച ഒരു വലിയ റെയ്ഡ് ഓപ്പറേഷൻ ആരംഭിച്ചു. സംസ്ഥാനത്ത് നിരോധിച്ചിരിക്കുന്ന ഈ സംഘടന വീണ്ടും സക്രിയമാക്കാൻ നടത്തുന്ന പ്രവർത്തനങ്ങൾ തിരിച്ചറിഞ്ഞാണ് നടപടി. ജമാ അത്തെ ഇസ്ലാമിയെ ജമ്മു-കശ്മീരിൽ 2019 ഫെബ്രുവരി 28 ന് നിരോധിച്ചതാണ്. 2024 ഫെബ്രുവരി 27 ന് പിന്നെയും അഞ്ചുവർഷത്തേക്ക് നിരോധനം നീട്ടിയിട്ടുണ്ട്.
മധ്യ, തെക്കൻ കശ്മീരിലെ ഒന്നിലധികം സ്ഥലങ്ങളിൽ ഒരേസമയം റെയ്ഡുകൾ നടത്തി. ശ്രീനഗറിലെ ലാൽ ബസാർ, ജമ്മു കശ്മീരിലെ ഷോപ്പിയാൻ ജില്ലയുടെ ചില ഭാഗങ്ങൾ എന്നിവയുൾപ്പെടെ നിരവധി പ്രദേശങ്ങളിൽ റെയ്ഡുകൾ നടത്തിയതായി ആധികാരിക വൃത്തങ്ങൾ പറയുന്നു.

മുൻ ജമാ അത്ത് മേധാവി ദാറുൽ ഉലൂമിന്റെ വീട് റെയ്ഡ് ചെയതു. ഷോപിയാൻ ജില്ലയിലെ രണ്ട് സ്ഥലങ്ങളിലാണ് റെയ്ഡുകൾ നടത്തിയത്, കഴിഞ്ഞ മാസം നിയമവിരുദ്ധ സ്ഥാപനമായി പ്രഖ്യാപിച്ച ദാറുൽ ഉലൂം സിറാജുൽ ഉലൂം ഉൾപ്പെടെയുള്ള സ്ഥലങ്ങളിൽ റെയ്ഡ് നടത്തി.

ഷോപിയാനിലെ ഇമാം സാഹിബ് പ്രദേശത്തെ സ്‌കൂളിൽ എൻഐഎ ഉദ്യോഗസ്ഥർ പുലർച്ചെ റെയ്ഡ് നടത്തി. നൂറുകണക്കിന് വിദ്യാർത്ഥികൾക്ക് മതപരവും ഔപചാരികവുമായ വിദ്യാഭ്യാസം നൽകുന്ന വിദ്യാഭ്യാസ സ്ഥാപനമാണിത്.

നിരോധിത ജമാഅത്തെ ഇസ്ലാമിയുടെ മുൻ മേധാവി ഷഹ്സാദ ഔറംഗസേബിന്റെ ജില്ലയിലെ മോളു ചിത്രാഗം വസതിയിലും മറ്റൊരു എൻഐഎ സംഘം പരിശോധന നടത്തിയതായി ഉദ്യോഗസ്ഥർ പറഞ്ഞു.

ജമ്മു കശ്മീരിലെ വിഘടനവാദ പ്രവർത്തനങ്ങൾ പുനരുജ്ജീവിപ്പിക്കുന്നതിനും ഭാരതവിരുദ്ധ ആശയങ്ങൾ പ്രോത്സാഹിപ്പിക്കുന്നതിനുമായി ജമാഅത്തെ ഇസ്ലാമിയെ വീണ്ടും സജീവമാക്കാൻ ശ്രമിക്കുന്നതായി സൂചനകൾ ലഭിച്ചതായി എൻഐഎ വൃത്തങ്ങൾ അറിയിച്ചു.

നടന്നുകൊണ്ടിരിക്കുന്ന അന്വേഷണത്തിന്റെ ഭാഗമായി സംഘടനയുമായി ബന്ധമുള്ള നിരവധി സ്ഥലങ്ങളിൽ ഏജൻസി റെയ്ഡുകൾ നടത്തിയിട്ടുണ്ട്.

2024 ൽ സർക്കാർ ജമാഅത്തെ ഇസ്ലാമിയെ നിരോധിച്ചു
2024 ഫെബ്രുവരിയിൽ, നിയമവിരുദ്ധ പ്രവർത്തനങ്ങൾ (തടയൽ) നിയമം (യുഎപിഎ) പ്രകാരം ജമാഅത്തെ ഇസ്ലാമി ജമ്മു കശ്മീരിലെ നിരോധനം കേന്ദ്ര സർക്കാർ അഞ്ച് വർഷത്തേക്ക് കൂടി നീട്ടി, അതിനെ നിയമവിരുദ്ധ സംഘടനയായി പ്രഖ്യാപിച്ചു. ഭീകരപ്രവർത്തനവുമായി ബന്ധപ്പെട്ട പ്രവർത്തനങ്ങൾ, വിഘടനവാദം, ഇന്ത്യാ വിരുദ്ധ പ്രചാരണം എന്നിവയിൽ ഏർപ്പെട്ടതായി ജമാഅത്തെ ഇസ്ലാമിക്കെതിരെ ആരോപിക്കപ്പെടുന്നു.

രാജ്യത്തിന്റെ സുരക്ഷ, സമഗ്രത, പരമാധികാരം എന്നിവയ്‌ക്കെതിരായ പ്രവർത്തനങ്ങൾ സംഘടന തുടരുന്നുണ്ടെന്ന് ആഭ്യന്തര മന്ത്രാലയം (എംഎച്ച്എ) കണ്ടെത്തിയതിനെത്തുടർന്ന് അടുത്ത അഞ്ച് വർഷത്തേക്ക് നിരോധനം നീട്ടി.

2019 ഫെബ്രുവരി 28 നാണ് ഈ സംഘടനയെ ആദ്യമായി ‘നിയമവിരുദ്ധ സംഘടന’യായി പ്രഖ്യാപിച്ചത്.

എംഎച്ച്എയുടെ കണക്കനുസരിച്ച്, ജമാഅത്തെ ഇസ്ലാമി ഭീകര സംഘടനകളുമായി അടുത്ത ബന്ധം പുലർത്തുകയും ജമ്മു കശ്മീരിലെ ഭീകരവാദത്തെയും തീവ്രവാദത്തെയും നിരന്തരം പിന്തുണയ്‌ക്കുകയും ചെയ്യുന്നു. ഭാരതപ്രദേശത്തിന്റെ ഒരു ഭാഗം കേന്ദ്രത്തിൽ നിന്ന് വേർപെടുത്തുന്നതിനുള്ള അവകാശവാദങ്ങളെ അവർ പിന്തുണയ്‌ക്കുകയും ഭാരതത്തിന്റെ പ്രാദേശിക സമഗ്രതയെ തകർക്കാൻ ഉദ്ദേശിച്ചുള്ള പ്രവർത്തനങ്ങളിലും പ്രസ്താവനകളിലും ഏർപ്പെടുന്നതിലൂടെ ഈ ആവശ്യത്തിനായി പോരാടുന്ന ഭീകരവാദ, വിഘടനവാദ ഗ്രൂപ്പുകളെ പിന്തുണയ്‌ക്കുകയും ചെയ്യുന്നുവെന്നാണ് വിലയിരുത്തൽ.