ന്യൂഡൽഹി: സനാതന ധർമ്മം ഇല്ലാതാക്കണമെന്ന ഡിഎംകെ നേതാവ് ഉദയനിധി സ്റ്റാലിന്റെ പ്രസ്താവനയ്ക്കെതിരെ ബിജെപി നേതാവ് അണ്ണാമലൈ രൂക്ഷ വിമർശനവുമായി രംഗത്ത് . സനാതന ധർമ്മം ഇല്ലാതാക്കാൻ ഉദയനിധി സ്റ്റാലിന് ഇത്രയധികം താൽപ്പര്യമുണ്ടെങ്കിൽ, സ്വന്തം അമ്മ ക്ഷേത്രങ്ങൾ സന്ദർശിക്കുന്നത് തടഞ്ഞ് ആദ്യം തന്റെ ദൃഢനിശ്ചയം പ്രകടിപ്പിക്കണമെന്ന് പറഞ്ഞാണ് അണ്ണാമലൈ ഉദയനിധിയെ വെല്ലുവിളിച്ചിരിക്കുന്നത്.
“ഞാൻ ഉദയനിധി സ്റ്റാലിനെ വെല്ലുവിളിക്കുന്നു… സനാതന ധർമ്മത്തെ ഉന്മൂലനം ചെയ്യാൻ നിങ്ങൾ ആഗ്രഹിക്കുന്നുവെങ്കിൽ, ദയവായി നിങ്ങളുടെ സ്വന്തം അമ്മയെ തടഞ്ഞുകൊണ്ട് അതിനുള്ള കഴിവ് പ്രകടിപ്പിക്കുക. എല്ലാ ദിവസവും, അവർ രാവിലെയും വൈകുന്നേരവും ക്ഷേത്രം സന്ദർശിക്കുന്നു. ആദ്യം അവർ അവിടെ പോകുന്നത് തടയുക“ അണ്ണാമലൈ പറഞ്ഞു.
മുൻപും ഉദയനിധിയെ നിശിതമായി വിമർശിച്ച് അണ്ണാമലൈ രംഗത്ത് വന്നിട്ടുണ്ട്. താൻ അദ്ദേഹത്തിന് (ഉദയനിധി സ്റ്റാലിന്) ഭഗവദ്ഗീതയുടെ ഒരു പകർപ്പ് സമ്മാനമായി നൽകുമെന്ന് അണ്ണാമലൈ പറഞ്ഞിരുന്നു ‘ ഞാൻ അദ്ദേഹത്തിന് ധാരാളം പുസ്തകങ്ങൾ ഒന്നും അയയ്ക്കില്ല – ഭഗവദ്ഗീത മാത്രം. അദ്ദേഹം അത് വായിക്കണമെന്ന് ഞാൻ ആഗ്രഹിക്കുന്നു. അക്കാദമിക് പരീക്ഷകൾക്ക് അദ്ദേഹം പഠിച്ചിരുന്ന രീതിയിലല്ല, മറിച്ച് അത് യഥാർത്ഥ ധാരണയോടെ വായിക്കണം. ഒരിക്കൽ അദ്ദേഹം അത് നന്നായി വായിച്ചാൽ, സനാതന ധർമ്മം യഥാർത്ഥത്തിൽ എന്താണെന്ന് അദ്ദേഹത്തിന് മനസ്സിലാകും ‘ എന്നാണ് അണ്ണാമലൈ പറഞ്ഞത്.
ക്രിസ്ത്യാനിത്വം സ്ഥാപിക്കപ്പെടുന്നതിനു മുമ്പും ഇസ്ലാം സ്ഥാപിക്കപ്പെടുന്നതിനു മുമ്പും സനാതന ധർമ്മം നിലനിന്നിരുന്നുവെന്നും അണ്ണാമലൈ പറഞ്ഞു. സനാതന ധർമ്മം എല്ലാത്തരം വിവേചനങ്ങൾക്കും എതിരായി നിലകൊണ്ടിട്ടുണ്ടെന്നും അണ്ണാമലൈ പറഞ്ഞു.
