കുന്നിക്കോട്: നിയമസഭാ തെരഞ്ഞെടുപ്പില്‍ പത്തനാപുരം മണ്ഡലത്തില്‍ യുഡിഎഫ്-ബിജെപി ഡീല്‍ ആരോപണം ഉന്നയിച്ച ഗണേശ് കുമാറിന് സ്വന്തം പാര്‍ട്ടിയില്‍ നിന്ന് തന്നെ തിരിച്ചടി. ഗണേശന്റെ സ്വന്തം പാര്‍ട്ടിയായ കേരള കോണ്‍ഗ്രസ് (ബി)യുടെ പ്രവര്‍ത്തകര്‍ യുഡിഎഫിനാണ് വോട്ട് ചെയ്തതെന്ന് വെളിപ്പെടുത്തിയിരിക്കുകയാണ് പാര്‍ട്ടിയുടെ വൈസ് ചെയര്‍മാനായ കരിക്കത്തില്‍ തങ്കപ്പന്‍പിള്ള.
നിയമസഭാ തെരഞ്ഞെടുപ്പില്‍ താനടക്കമുള്ള കേരളാ കോണ്‍ഗ്രസ് (ബി) പ്രവര്‍ത്തകര്‍ വോട്ട് ചെയ്തത് യുഡിഎഫിനാണ്. ഇതിന് കാരണം പാര്‍ട്ടി ചെയര്‍മാനായ കെ.ബി. ഗണേശ് കുമാറിന്റെ അതിരുവിട്ട പ്രവര്‍ത്തികളാണെന്നും കരിക്കത്തില്‍ തങ്കപ്പന്‍ പിള്ള ജന്മഭൂമിയോട് പറഞ്ഞു. പാര്‍ട്ടി വൈസ് ചെയര്‍മാനായിരുന്ന തങ്കപ്പന്‍ പിള്ളയെ ജില്ലാ പ്രസിഡന്റ് എ. ഷാജു പാര്‍ട്ടിയില്‍ നിന്ന് പുറത്താക്കിയെങ്കിലും അത് അംഗീകരിക്കില്ലെന്ന നിലപാടിലാണ് തങ്കപ്പന്‍ പിള്ള ഇപ്പോഴും.
വൈസ് ചെയര്‍മാനെ പുറത്താക്കാന്‍ ജില്ലാ പ്രസിഡന്റിന് എന്ത് അധികാരം എന്നാണ് അദ്ദേഹം ചോദിക്കുന്നത്. എന്‍എസ്എസ് പത്തനാപുരം താലൂക്ക് യൂണിയന്റെ അഡ്‌ഹോക് കമ്മറ്റി ചെയര്‍മാന്‍ സ്ഥാനം ഏറ്റെടുത്തതോടെയാണ് തനിക്ക് എതിരെ ഗണേശന് മുന്നിട്ടിറങ്ങിയിരിക്കുന്നത്. ‘എന്റെ അച്ഛന്റെ എച്ചില്‍ നക്കിയിട്ട് നന്ദികേട് കാണിച്ചവര്‍ ഈ പ്രദേശത്തുണ്ട്’ എന്ന ഗണേഷ് കുമാറിന്റെ മൈക്കിലൂടെയുള്ള പ്രസംഗം മുഴുവന്‍ നായര്‍ സമുദായ അംഗങ്ങളെയും അധിക്ഷേപിച്ചുവെന്ന തരത്തില്‍ പ്രചരിച്ചു. അത് പത്തനാപുരത്തെ വോട്ടര്‍ന്മാര്‍ക്കിടയില്‍ വലിയ ആക്ഷേപങ്ങള്‍ക്ക് വഴിവെച്ചുവെന്നും അദ്ദേഹം പറഞ്ഞു.
പുനലൂരില്‍ ആരംഭിക്കുന്ന പത്മാകഫേയുടെ നിര്‍മ്മാണത്തെ സംബന്ധിച്ച വിവാദങ്ങളും ഗണേഷന് തിരിച്ചടിയായി. താലൂക്ക് യൂണിയന്‍ അംഗങ്ങള്‍ അഴിമതി ആരോപണം ഉന്നയിച്ചതും ഭരണസമിതി അംഗം വേണുവിനെ പട്ടാഴി ദേവീക്ഷേത്രത്തില്‍ വെച്ച് മര്‍ദ്ദിച്ചതുമെല്ലാം ഗണേശ് കുമാറിന്റെ താലൂക്ക് യൂണിയന്‍ പ്രസിഡന്റ് സ്ഥാനം വരെ നഷ്ടപ്പെടാന്‍ കാരണമായി.
നിലവില്‍ ഈ ആരോപണം അന്വേഷിക്കാനായി ഓഡിറ്റ് തുടങ്ങിയതായും റിപ്പോര്‍ട്ട് ഉടന്‍ ചങ്ങനാശ്ശേരിക്ക് കൈമാറുമെന്നും അഡ്‌ഹോക് കമ്മറ്റി ചെയര്‍മാന്‍ കൂടിയായ തങ്കപ്പന്‍ പിള്ള പറഞ്ഞു. അതുപോലെതന്നെ താന്‍ പ്രസിഡന്റായിട്ടുള്ള ഇളമ്പല്‍ സര്‍വ്വീസ് സഹകരണ ബാങ്കിനെ തകര്‍ക്കാനുള്ള ഗണേശ് കുമാറിന്റെ നീക്കം നടക്കില്ലെന്നും ഏഴ് ബ്രാഞ്ചുകളിലായി ഇരുപത്തിനാലായിരത്തോളം വരുന്ന സഹകാരികളാണ് ബാങ്കിന്റെ ശക്തിയെന്നും തങ്കപ്പന്‍ പിള്ള പറഞ്ഞു. പിഡിപി അടക്കമുള്ള ഒരു കൂട്ടം ക്രിമിനല്‍ സംഘത്തിന്റെ കൈകളിലാണ് ഇപ്പോള്‍ കേരള കോണ്‍ഗ്രസ് (ബി) എന്നും തങ്കപ്പന്‍ പിള്ള കൂട്ടിച്ചേര്‍ത്തു.
ജന്മഭൂമി ഓണ്‍ലൈന്‍