ന്യൂദല്‍ഹി: ഗ്രാമപഞ്ചായത്തുകളെ ഗ്രാമീണ പരിവര്‍ത്തനത്തിന്റെ കേന്ദ്രസ്തംഭമായി മാറ്റുകയാണ് വികസിതഭാരതം – ജി റാം ജി ആക്ട്. ശാക്തീകരിക്കപ്പെട്ടതും സമൃദ്ധവും വികസിതവുമായ ഒരു ഗ്രാമീണഭാരതം കെട്ടിപ്പടുക്കുന്നതില്‍ ഈ നിയമം ഒരു സുപ്രധാന നാഴികക്കല്ലായി മാറും.
ജൂലൈ ഒന്ന് മുതലാണ് രാജ്യത്താകമാനം വിബി ജി റാം ജി ആക്ട് നടപ്പാക്കുന്നത്. പുതിയനിയമം നിലവില്‍ വരുന്നത് വരെ മഹാത്മാഗാന്ധി തൊഴിലുറപ്പ് പദ്ധതിക്ക് കീഴിലുള്ള തൊഴില്‍, തടസ്സമില്ലാതെ തുടരും. തടസ്സമില്ലാത്തതും സുഗമവും തൊഴിലാളി കേന്ദ്രീകൃതവുമായ മാറ്റം ഉറപ്പാക്കുന്നതിനായാണിത്. ജൂണ്‍ 30വരെയുള്ള മഹാത്മാഗാന്ധി തൊഴിലുറപ്പ് പദ്ധതിയിലെ നിലവിലുള്ള പ്രവൃത്തികള്‍ പുതിയ ചട്ടക്കൂടിലേക്ക് മാറ്റും. ഗ്രാമീണ തൊഴിലാളികള്‍ക്ക് ജോലി സമയബന്ധിതമായി ലഭ്യമാക്കുന്നതിനും വേതനം വേഗത്തില്‍ നല്‍കുന്നതിനും സര്‍ക്കാര്‍ മുന്‍ഗണന നല്‍കുന്നു. പുതിയ നിയമം നിലവില്‍ വരുന്നതിന് മുന്‍പുള്ള കാലയളവില്‍ അര്‍ഹരായ ഒരു ഗ്രാമീണ കുടുംബത്തിനും ബുദ്ധിമുട്ടുകള്‍ ഉണ്ടാകാതിരിക്കാന്‍, ആവശ്യകതയ്‌ക്കും ഫീല്‍ഡ് തലത്തിലെ ആവശ്യങ്ങള്‍ക്കും അനുസൃതമായി കേന്ദ്രസര്‍ക്കാര്‍ മതിയായ ലേബര്‍ ബജറ്റ് സംസ്ഥാനങ്ങള്‍ക്കും കേന്ദ്രഭരണ പ്രദേശങ്ങള്‍ക്കും ലഭ്യമാക്കിയിട്ടുണ്ട്.
നിലവിലുള്ള ഇ-കെവൈസി പരിശോധിച്ചുറപ്പിച്ച തൊഴിലുറപ്പ് ജോബ് കാര്‍ഡുകള്‍, ഗ്രാമീണ റോസ്ഗാര്‍ ഗ്യാരണ്ടി കാര്‍ഡുകള്‍ നല്‍കുന്നത് വരെ പുതിയ പദ്ധതിയിലും സാധുവായിരിക്കും. ജോബ് കാര്‍ഡുകള്‍ ഇല്ലാത്ത തൊഴിലാളികള്‍ക്ക് ഗ്രാമപഞ്ചായത്ത് തലത്തില്‍ രജിസ്റ്റര്‍ ചെയ്യുന്നത് തുടരാം. ഇ-കെവൈസി പൂര്‍ത്തിയാകാത്തതിന്റെ പേരില്‍ മാത്രം തൊഴിലാളികള്‍ക്ക് തൊഴില്‍ നിഷേധിക്കില്ല. ഇ-കെവൈസി പൂര്‍ത്തിയാക്കുന്നതിനുള്ള സൗകര്യങ്ങള്‍ സംസ്ഥാന സര്‍ക്കാരുകള്‍ ഫീല്‍ഡ് തലത്തില്‍ തുടര്‍ന്നും നല്‍കും.
വിബി ജി റാം ജി ആക്ട് 2025ന് കീഴിലുള്ള വിവിധ കരട് ചട്ടങ്ങള്‍ സംസ്ഥാനങ്ങളുമായും കേന്ദ്രഭരണ പ്രദേശങ്ങളുമായും കൂടിയാലോചിച്ച് ഗ്രാമവികസന മന്ത്രാലയം തയ്യാറാക്കി വരികയാണ്. അടിസ്ഥാന മാനദണ്ഡങ്ങള്‍ പ്രകാരമുള്ള വിഹിതം നിശ്ചയിക്കുന്നതിനുള്ള ചട്ടങ്ങള്‍, പരിവര്‍ത്തനവ്യവസ്ഥാ നിയമങ്ങള്‍, ദേശീയതല സ്റ്റിയറിംഗ് കമ്മിറ്റി നിയമങ്ങള്‍, സെന്‍ട്രല്‍ ഗ്രാമീണ്‍ റോസ്ഗാര്‍ ഗ്യാരണ്ടി കൗണ്‍സില്‍ നിയമങ്ങള്‍, ഭരണപരമായ ചെലവുകള്‍ സംബന്ധിച്ച നിയമങ്ങള്‍, പരാതി പരിഹാര നിയമങ്ങള്‍, വേതനവും തൊഴിലില്ലായ്‌മ വേതനവും നല്‍കുന്ന രീതിയെക്കുറിച്ചുള്ള നിയമങ്ങള്‍, അധിക ചെലവ് വഹിക്കുന്ന രീതിയും നടപടിക്രമങ്ങളും സംബന്ധിച്ച നിയമങ്ങള്‍, നിയമസഭയില്ലാത്ത കേന്ദ്രഭരണ പ്രദേശങ്ങള്‍ക്കായുള്ള പദ്ധതിയുടെ ചെലവുകള്‍ വഹിക്കുന്ന രീതിയെക്കുറിച്ചുള്ള നിയമങ്ങള്‍ എന്നിവ ഇതില്‍ ഉള്‍പ്പെടുന്നു.
മഹാത്മാഗാന്ധി തൊഴിലുറപ്പ് പദ്ധതിയില്‍ നിന്ന് പുതിയ പദ്ധതിയിലേക്കുള്ള മാറ്റം സുഗമമാക്കുന്നതിന് ആവശ്യമായ നിയമവ്യവസ്ഥകള്‍, അനുബന്ധ വ്യവസ്ഥകള്‍ സംബന്ധിച്ച ചട്ടങ്ങളില്‍ ഉള്‍പ്പെടുത്തിയിട്ടുണ്ട്. പൊതുജന അഭിപ്രായങ്ങള്‍ക്കായി അവ ഉടന്‍ പ്രസിദ്ധീകരിക്കും.
