ബ്യൂണസ്‌ഐറിസ്: ലോകകപ്പ് ഫുട്‌ബോള്‍ അടുത്തേക്കെത്തുമ്പോള്‍ നിലവിലെ ജേതാക്കളായ അര്‍ജന്റീന താരം ലയണല്‍ മെസി കിരീടം നിലനിര്‍ത്തുന്നത് സംബന്ധിച്ച അഭിപ്രായപ്രകടനവുമായി രംഗത്ത്. അമേരിക്കയിലെ സ്വകാര്യ ചാനലിന് അനുവദിച്ച അഭിമുഖത്തിലാണ് മെസിയുടെ അഭിപ്രായം വ്യക്തമാക്കിയത്. ലോകകപ്പ് നിലനിര്‍ത്താനുള്ള തയ്യാറെടുപ്പുകളിലാണ്. നിരവധി കരുത്തന്‍മാരായ ടീമിനെയാണ് നേരിടാനുള്ളതെന്ന് മെസി ഓരോ ടീമിന്റെയും പേരെടുത്ത് പറഞ്ഞു.
കഴിഞ്ഞ രണ്ട് തവണ ഫൈനല്‍ വരെ എത്തിയ ഫ്രാന്‍സ് ഇക്കുറിയും കരുത്തന്‍ ടീം ആണ്. ഖത്തര്‍ ലോകകപ്പ് ഫൈനലില്‍ ഫ്രാന്‍സിനെ തോല്‍പ്പിച്ചാണ് മെസിയും അര്‍ജന്റീനയും ലോകകപ്പ് നേടിയത്. മെസി പ്രാധാന്യം നല്‍കുന്ന മറ്റ് ടീമുകള്‍ സ്‌പെയിനും ബ്രസീലും ആണ്. ജര്‍മനി, ഇംഗ്ലണ്ട് പോലുള്ള പരമ്പരാഗത ടീമുകളും എപ്പോള്‍ എന്ത് അത്ഭുതം കാട്ടുമെന്ന് പറയാനാവാത്ത ടീമുകളാണ്- മെസി പറഞ്ഞു.
മെസിയുടെ അഭിമുഖം പോളോ അല്‍വാരെസ് എന്ന അര്‍ജന്റീനയിലെ ടിവി ഷോയിലാണ് പ്രത്യക്ഷമായത്. വരുന്ന ജൂണില്‍ 39 വയസിലെത്തുന്ന മെസി ലോകകപ്പ് ടീമില്‍ ഉണ്ടാകുമോയെന്ന് ചോദിച്ചപ്പോള്‍ അത് ടീം മാനേജ്‌മെന്റ് നിശ്ചയിക്കും. പക്ഷെ എന്റെ കളി അവസാനിപ്പിക്കാന്‍ ഞാന്‍ തന്നെയായിരിക്കും തീരുമാനിക്കുക. കഴിയുന്നിടത്തോളം കാലം കളിക്കണമെന്നാണ് വിചാരിക്കുന്നതെന്നും മെസി പറഞ്ഞു.
