ന്യൂദല്‍ഹി: കേരള മുഖ്യമന്ത്രി ആരെന്ന് അറിയാന്‍ വൈകും. ശനിയാഴ്ച എ ഐ സി സി അധ്യക്ഷന്‍ മല്ലികാര്‍ജുന്‍ ഖര്‍ഗെയുടെ വസതിയില്‍ നടന്ന ചര്‍ച്ചയില്‍ തീരുമാനമായില്ല.
നാല് മണിക്കൂറോളം നീണ്ട ചര്‍ച്ചകള്‍ക്ക് ശേഷം തീരുമാനം രാഹുല്‍ ഗാന്ധിക്കും മല്ലികാര്‍ജുന്‍ ഖര്‍ഗെയ്‌ക്കും വിടുകയായിരുന്നു.
മുഖ്യമന്ത്രിയെ ഉടന്‍ ഹൈക്കമാന്‍ഡ് പ്രഖ്യാപിക്കുമെന്ന് ചര്‍ച്ചകള്‍ക്ക് ശേഷം പുറത്തു വന്ന കേരളത്തിന്റെ ചുമതലയുള്ള എഐസിസി ജനറല്‍ സെക്രട്ടറി ദീപാദാസ് മുന്‍ഷി മാധ്യമങ്ങളോട് പറഞ്ഞു.ദീര്‍ഘമായ ചര്‍ച്ചകള്‍ നടന്നുവെന്നും അവര്‍ പറഞ്ഞു. മല്ലികാര്‍ജുന്‍ ഖാര്‍ഗെയും രാഹുല്‍ ഗാന്ധിയും ചേര്‍ന്ന് മുഖ്യമന്ത്രിയെ തീരുമാനിക്കും.എന്ന് മുഖ്യമന്ത്രി പ്രഖ്യാപിക്കുമെന്ന് മാധ്യമങ്ങള്‍ ചോദിച്ചപ്പോള്‍ മേയ് 23 വരെ സമയം ഉണ്ടെന്ന് ദീപാദാസ് മുന്‍ഷി പറഞ്ഞു.
കെ.സി. വേണുഗോപാല്‍, വി.ഡി. സതീശന്‍, രമേശ് ചെന്നിത്തല, സണ്ണി ജോസഫ് തുടങ്ങിയവരും ദീപാദാസ് മുന്‍ഷിക്കൊപ്പം മാധ്യമങ്ങളെ കണ്ടു. ചേരിതിരിഞ്ഞുള്ള പ്രകടനങ്ങള്‍ പാടില്ലെന്നും നേതാക്കളുടെ പേരില്‍ ഫ്‌ലക്‌സുകള്‍ വയ്‌ക്കരുതെന്നും കെ.സി. വേണുഗോപാലും വി.ഡി. സതീശനും രമേശ് ചെന്നിത്തലയും പറഞ്ഞു.നിലവില്‍ വച്ചിരിക്കുന്ന ഫ്‌ലക്‌സുകള്‍ ഇന്ന് രാത്രിതന്നെ മാറ്റണമെന്നും നേതാക്കള്‍ ആവശ്യപ്പെട്ടു.
