കോഴിക്കോട്: സമൂഹത്തില്‍ ജാതിചിന്ത തീര്‍ത്തും ഇല്ലാതാവണമെന്ന് ആര്‍എസ്എസ് അഖില ഭാരതീയ കാര്യകാരി അംഗം സുരേഷ് ജോഷി. ആര്‍എസ്എസ് ശതാബ്ദിയോടനുബന്ധിച്ച് കോഴിക്കോട് കുന്ദമംഗലത്ത് നടന്ന പൗരപ്രമുഖ സംഗമത്തില്‍ സംസാരിക്കുകയായിരുന്നു അദ്ദേഹം. സമൂഹം ഇന്ന് ജാതിക്ക് പ്രാധാന്യം കൊടുക്കുന്നു. അറുന്നൂറോളം ജാതി ഉപജാതികളായി തങ്ങള്‍ പ്രത്യേകം പ്രത്യേകമാണെന്ന് ചിന്തിക്കുന്നു. സാമൂഹ്യജീവിതത്തിന് അനുഗുണമല്ലാത്ത ആചാരങ്ങള്‍ ഉപേക്ഷിച്ച പാരമ്പര്യമാണ് നമുക്കുള്ളത്. വര്‍ത്തമാനകാല സമൂഹത്തിന് അനുകൂലമല്ലാത്ത ആചാരങ്ങള്‍ പോയേ തീരൂ. സ്ത്രീ-പുരുഷ സമത്വത്തിനെതിരായ ചിന്ത ഇല്ലാതാകണം. ഡോ. അംബേദ്കര്‍ തയാറാക്കിയ ഭരണഘടന നാം ഭാരതീയരാണെന്ന ചിന്ത മുന്നോട്ട് വെക്കുന്നു. ഭാഷയുടേയും സംസ്ഥാനത്തിന്റെയും പേരില്‍ പ്രത്യേക അഭിമാനം കൊള്ളേണ്ടതില്ല. 140 കോടി ജനങ്ങള്‍ ഹിന്ദുക്കളാണ്, ഭാരതീയരാണ് എന്ന ബോധം ഉണ്ടാകണം.
ഭാരതീയ കുടുംബ വ്യവസ്ഥ ഉത്കൃഷ്ടമാണെങ്കിലും കുടുംബ ബന്ധങ്ങള്‍ ശിഥിലമാകുകയും വിവാഹമോചനം കൂടുതലാകുകയും ചെയ്യുന്നു. വ്യക്തികേന്ദ്രിത ചിന്ത കൂടിവരുന്നു. പുതിയ തലമുറയില്‍ ശരിയായ സംസ്‌കാരം വളര്‍ത്താന്‍ കുടുംബത്തിലൂടെയും വിദ്യാഭ്യാസ പദ്ധതിയിലൂടെയും കഴിയണം. പരിസ്ഥിതി സംരക്ഷണത്തിന്റെയും ഗ്രാമീണ സമ്പദ്‌വ്യവസ്ഥയുടെ ശാക്തീകരണത്തിന്റെയും സമീപനം ജീവിതത്തില്‍ ഉള്‍ക്കൊള്ളണം. അദ്ദേഹം പറഞ്ഞു.
ആര്‍എസ്എസ് കോഴിക്കോട് ഗ്രാമ ജില്ലാ സംഘചാലക് അഡ്വ. പി.കെ. ശ്രീകുമാര്‍ അധ്യക്ഷത വഹിച്ചു. ആര്‍എസ്എസ് ഉത്തരകേരളം പ്രാന്ത സഹബൗദ്ധിക് പ്രമുഖ് കെ.എസ്. അനീഷ്, ഇ. ജിജിലാഷ്, സി.കെ. മനോജ് കുമാര്‍ എന്നിവര്‍ സംസാരിച്ചു.
