മുഖ്യദ്രാവിഡപാര്‍ട്ടികളുടെ വോട്ടിംഗ് ശതമാനം കുത്തനെ ഇടിഞ്ഞപ്പോഴും തമിഴ്നാട്ടില്‍ ആശ്വാസമായി ബിജെപിയുടെ വോട്ടിംഗ് ശതമാനത്തില്‍ വര്‍ധന

ചെന്നൈ: മുഖ്യദ്രാവിഡപാര്‍ട്ടികളായ ഡിഎംകെയുടെയും എഐഎഡിഎംകെയുടെയും വോട്ട് ശതമാനത്തില്‍ വന്‍തോതില്‍ ഇടിവുണ്ടായപ്പോഴും വോട്ട് ശതമാനം നേരിയ തോതിലാണെങ്കിലും വര്‍ധിച്ചതില്‍ ബിജെപിയ്‌ക്ക് പ്രതീക്ഷ.

ബിജെപിയുടെ സ്ഥാനാര്‍ത്ഥികള്‍ ഭൂരിഭാഗവും തമിഴ്നാട്ടില്‍ തോറ്റെങ്കിലും ബിജെപിയ്‌ക്ക് പരിഭവമില്ല. പകരം ബിജെപിയുടെ തമിഴ്നാട്ടിലെ വോട്ടിംഗ് ശതമാനം വര്ധിച്ചതില്‍ ബിജെപിയ്‌ക്ക് ഏറെ പ്രതീക്ഷ വെച്ചുപുലര്‍ത്തുന്നു. 2021ല്‍ വെറും 2.62 ശതമാനമായിരുന്നു ബിജെപിയുടെ വോട്ടെങ്കില്‍ 2026ല്‍ ലഭിച്ചത് ഏകദേശം 3 ശതമാനം വോട്ട്. 2021ല്‍ ബിജെപിയ്‌ക്ക് സംസ്ഥാനത്ത് 1213670 വോട്ടുകള്‍ ഉണ്ടായിരുന്നെങ്കില്‍ 2026ല്‍ ബിജെപിയ്‌ക്ക് ലഭിച്ചത് 1467024 വോട്ടുകള്‍. ദശകങ്ങളായി തമിഴ്നാടിനെ അടക്കിഭരിച്ച ദ്രാവിഡ പാര്‍ട്ടികള്‍ കടപുഴകിയപ്പോഴും തമിഴ്നാട്ടിലെ ജനത ബിജെപിയെ കൈവിട്ടിട്ടില്ലെന്നും ഒരു സിനിമാ ആരാധനയുടെ പേരിലുള്ള ഈ അസാധരണ വോട്ടിംഗ് പാറ്റേണ്‍ ഭാവിയില്‍ തിരുത്തപ്പെടുമെന്നും ബിജെപി പ്രതീക്ഷിക്കുന്നു.

ഡിഎംകെയ്‌ക്ക് വോട്ട് ബേസില്‍ 13ശതമാനം ഇടിവുണ്ടായി. അത് 37.70 ശതമാനത്തില്‍ നിന്നും 24.19 ശതമാനമായി കുറഞ്ഞു.. അണ്ണാ ‍ഡിഎംകെയ്‌ക്ക് 12.21 ശതമാനം വോട്ടുകള്‍ ഇടിഞ്ഞു. അത് 30.29 ശതമാനത്തില്‍ നിന്നും 21.21 ശതമാനമായി കുറഞ്ഞു. അതും ഇത്തവണ എഐഎഡിഎംകെ മുന്നണിയുടെ ഭാഗമായി നിന്നപ്പോള്‍ സീറ്റുവിഭജനത്തില്‍ ബിജെപിയ്‌ക്ക് കിട്ടിയ സീറ്റുകളില്‍ പലതും വിജയ സാധ്യതയില്ലാത്ത മണ്ഡലങ്ങളാണ്. അഞ്ചിടങ്ങളില്‍ ബിജെപിയ്‌ക്ക് നേരിടേണ്ടിവന്നത് ഡിഎംകെ മന്ത്രിമാരെ. ഇത്തരം വിഷമതകള്‍ ഉണ്ടായിട്ടും നേരിയ തോതിലാണെങ്കില്‍ വോട്ട് ശതമാനം ഉയര്‍ത്താന്‍ കഴിഞ്ഞത് വലിയ ഭാഗ്യമാണെന്ന് ബിജെപി കരുതുന്നു.

ബിജെപിയുടെ വിഐപി സ്ഥാനാര്‍ത്ഥികളായ വാനതി ശ്രീനിവാസനും നൈനാര്‍ നാഗേന്ദ്രനും കേന്ദ്രമന്ത്രിയായ എല്‍ മുരുകനും മുന്‍ ഗവര്‍ണര്‍ തമിഴിശൈ സൗന്ദര്‍രാജനും തോറ്റു. 2021ലെ നിയമസഭാ തെരഞ്ഞെടുപ്പില്‍ നടന്‍ കമല്‍ഹാസനെ തോല്‍പിച്ച് സ്റ്റാറായ ബിജെപി നേതാവാണ് വാനതി ശ്രീനിവാസര്‍. അപ്രതീക്ഷിതമായ വിജയ് തരംഗത്തില്‍ ഡിഎംകെ നേതാവും മുഖ്യമന്ത്രിയുമായി എം.കെ. സ്റ്റാലിന്‍ പോലും തോറ്റമ്പി എന്നതിനാല്‍ തങ്ങളുടെ സ്ഥാനാര്‍ത്ഥികളുടെ തോല്‍വി ഈ പുതിയ ട്രെന്‍‍ഡിന്റെ ഭാഗം മാത്രമാണെന്ന് ബിജെപി കരുതുന്നു.

മോദി വന്ന് ഇത്രയും വിപുലമായ പ്രചാരണം നടത്തിയിട്ടും കാര്യമായ ചലനങ്ങള്‍ ഉണ്ടാക്കാന്‍ കഴിഞ്ഞില്ല എന്ന വിമര്‍ശനങ്ങളെ ബിജെപി മുഖവിലയ്‌ക്കെടുക്കുന്നില്ല. അതുപോലെ അണ്ണാമലൈയുടെ അസാന്നിധ്യമാണ് ബിജെപിയുടെ ദുര്‍ബലമായ പ്രകടനത്തിന് കാരണമെന്ന ശത്രുമീഡിയകളുടെ പ്രചാരണവും ബിജെപി കാര്യമാക്കുന്നില്ല. 2021ല്‍ ബിജെപിയ്‌ക്ക് തമിഴ്നാട്ടില്‍ നാല് സീറ്റുകള്‍ ഉണ്ടായിരുന്നു എന്നാല്‍ ഇക്കുറി ഒരാള്‍ മാത്രമാണ് ജയിച്ചത്. ഊട്ടിയിലെ ഉദഗമണ്ഡലം മണ്ഡലത്തില്‍ മത്സരിച്ച എം. ഭോജരാജന്‍ ഇവിടെ ടിവികെയുടെ സ്ഥാനാര്‍ത്ഥി ഇബ്രാഹിമിനെ തോല്‍പിച്ചു.