കൊല്‍ക്കത്ത:: 2026 ലെ പശ്ചിമ ബംഗാൾ നിയമസഭാ തിരഞ്ഞെടുപ്പ് പ്രചാരണത്തിലൂടെ തന്റെ രാഷ്‌ട്രീയ തിരിച്ചുവരവ് ശക്തമാക്കി സ്മൃതി ഇറാനി.
2024ലെ ലോക് സഭാ തെരഞ്ഞെടുപ്പില്‍ അമേഠിയില്‍ നിന്നും പരാജയപ്പെട്ട ശേഷം കുറച്ചുനാളുകളായി രാഷ്‌ട്രീയത്തില്‍ നിന്നും ഒരു ഹ്രസ്വ വിശ്രമം എടുക്കുകയായിരുന്നു സ്മൃതി ഇറാനി. റിപ്പബ്ലിക് ടിവി എഡിറ്റര്‍ അര്‍ണബ് ഗോസ്വാമിയുമായി നടന്ന അഭിമുഖത്തില്‍ താന്‍ ശക്തമായി രാഷ്‌ട്രീയത്തില്‍ ഉണ്ടാകുമെന്ന് സ്മൃതി ഇറാനി വ്യക്തമാക്കിയിരുന്നു.
ബംഗാളില്‍ ബിജെപിയുടെ പ്രധാന സ്റ്റാർ പ്രചാരകയായാണ് സ്മൃതി ഇറാനി പ്രവർത്തിച്ചത്. അമ്മ ബംഗാളിയായതിനാല്‍ സ്മൃതി ഇറാനിക്ക് ബംഗാളി ഭാഷ നന്നായി അറിയാം. കൊൽക്കത്ത റോഡ്ഷോകളിൽ ബംഗാളി ഭാഷ നന്നായി സംസാരിക്കുന്നതിലൂടെ സ്മൃതി ഇറാനി ബംഗാളികളെ നല്ലതുപോലെ ആകര്‍ഷിച്ചിരുന്നു.
മമതയുടെ അഴിമതിയെയും മമത സര്‍ക്കാരിന് കീഴില്‍ സ്ത്രീ സുരക്ഷ ഇല്ലാത്തതിനെയും കുറിച്ച് സ്മൃതി ഇറാനി നടത്തിയ പ്രസംഗത്തിന് വലിയ വരവേല്‍പായിരുന്നു. മാത്രമല്ല ടിവി ചാനലുകള്‍ ഇംഗ്ലീഷിലോ ഹിന്ദിയിലോ സംസാരിക്കാന്‍ പ്രേരിപ്പിച്ചപ്പോഴും ബംഗാളി ഭാഷയിലാണ് സ്മൃതി ഇറാനി സംസാരിച്ചത്.
കേരളത്തിലെ നിയമസഭാ തെരഞ്ഞെടുപ്പിലും സ്മൃതി ഇറാനി പ്രചാരണരംഗത്തുണ്ടായിരുന്നു. കേരളത്തിലും സ്മൃതി ഇറാനിക്ക് വലിയ വരവേല്‍പാണ് ലഭിച്ചത്.
