തിരുവനന്തപുരം: കേരളത്തിലെ കോണ്‍ഗ്രസ് മുട്ട വിരിയും മുന്‍പ് കോഴിയുടെ കണക്കെടുക്കുകയാണെന്ന് പരിഹസിച്ച് ബിജെപി പ്രസിഡന്‍റ് രാജീവ് ചന്ദ്രശേഖര്‍. നിയമസഭാ തെരഞ്ഞെടുപ്പില്‍ വിജയിച്ചുവെന്ന രീതിയിലുള്ള കോണ്‍ഗ്രസിന്റെ പ്രസ്താവനകളെ പരിഹസിക്കുകയായിരുന്നു രാജീവ് ചന്ദ്രശേഖര്‍.
“കോൺഗ്രസ് പാർട്ടിയെക്കുറിച്ചുള്ള ഏറ്റവും രസകരമായ കാര്യം മുട്ടവിരിയും മുന്‍പേ അവർ കോഴികളെ എണ്ണിക്കൊണ്ടിരിക്കുന്നു എന്നതാണ്. എപ്പോഴും ഇവര്‍ ഇങ്ങിനെയാണ്. 2019 ൽ അവർ രാഹുൽ ഗാന്ധി പ്രധാനമന്ത്രിയാകുമെന്ന് ഉറപ്പോടെ പ്രഖ്യാപിച്ചു. എന്നിട്ട് അതേക്കുറിച്ച് ഫലം വരുന്നതുവരെ ചര്‍ച്ച ചെയ്തു. 2024 ൽ രാഹുൽ ഗാന്ധി എന്തായാലും പ്രധാനമന്ത്രിയാകുമെന്ന് ഉറപ്പു പറഞ്ഞു. എന്നിട്ട് അതിനെക്കുറിച്ച് ചർച്ച ചെയ്തുകൊണ്ടേയിരുന്നു. ഇന്ത്യയിലെ ജനങ്ങൾ, കേരളത്തിലെ ജനങ്ങൾ വളരെ മിടുക്കരാണ്. കോൺഗ്രസ് പാർട്ടി എന്താണെന്നും രാഹുൽ ഗാന്ധിയുടെ കീഴിലുള്ള കോൺഗ്രസ് പാർട്ടി എന്താണെന്നും അവർക്കറിയാം.” – രാജീവ് ചന്ദ്രശേഖര്‍ പരിഹസിച്ചു.
“സ്വാര്‍ത്ഥ മോഹങ്ങള്‍, അഴിമതി, അവരുടെ വ്യക്തിപരമായ ഗൂഢ ലക്ഷ്യങ്ങൾ എന്നിവയാൽ മാത്രമാണ് കോണ്‍ഗ്രസ് നയിക്കപ്പെടുന്നത്, രാഹുൽ ഗാന്ധിയുടെ കീഴിലുള്ള കോൺഗ്രസ് പാർട്ടിയിൽ ജനങ്ങളെക്കുറിച്ച് ചിന്തിക്കുകയും ജനങ്ങളുടെ പ്രശ്നങ്ങൾ പരിഹരിക്കുകയും ചെയ്യുന്ന ഒരു വ്യക്തി പോലും ഇല്ല. അതിനാൽ ഇത് അവർക്ക് സാധാരണമാണ്. അവർ ഈ അധികാര രാഷ്‌ട്രീയത്തിന് അടിമകളാണ്, കേരളത്തിലെ ജനങ്ങൾ അവരെ മെയ് നാലിന് ഒരു പാഠം പഠിപ്പിക്കും.”- രാജീവ് ചന്ദ്രശേഖര്‍ ചൂണ്ടിക്കാട്ടി.
