കണ്ണൂര്‍: തന്നെ ഈ രീതിയില്‍ ആക്കിയത് വീട്ടുകാരാണെന്നും അച്ഛനെയും കൊലപ്പെടുത്തണമെന്ന് അമ്മയെ കഴുത്തറുത്തു കൊലപ്പെടുത്തിയ ക്രിസ്റ്റി (25) പറഞ്ഞതായി അയല്‍വാസിയായ യുവാവ്.അമ്മയെ കഴുത്തറുത്ത് കൊലപ്പെടുത്തിയ ശേഷം പൊലീസ് സ്റ്റേഷനില്‍ ഹാജരാകുന്നതിന് മുമ്പാണ് പ്രതി ഇങ്ങനെ പറഞ്ഞതെന്ന് അയല്‍വാസി പറഞ്ഞു.
കഴിഞ്ഞ രാത്രി പത്തരയോടെയായിരുന്നു സംഭവം. മഹിളാ മോര്‍ച്ച നേതാവ് ആയ മഠത്തിപ്പറമ്പില്‍ ഗീതമ്മ (50) ആണ് കൊല്ലപ്പെട്ടത്. മകന്‍ ക്രിസ്റ്റി (25) സ്വമേധയാ കേളകം പൊലീസ് സ്റ്റേഷനില്‍ കീഴടങ്ങുകയായിരുന്നു.
രാത്രി പത്ത് മണിയോടെ ബഹളം കേട്ട് എത്തിയപ്പോള്‍ ക്രിസ്റ്റിയെ കൂടാതെ രണ്ട് പേര്‍ കൂടി വീട്ടിലുണ്ടായിരുന്നു. ഇവര്‍ തമ്മില്‍ സംഘര്‍ഷമുണ്ടായി. തുടര്‍ന്നാണ് ഗീതമ്മയെ കൊലപ്പെടുത്തിയെന്ന് അവര്‍ പറഞ്ഞത്. മുറിയില്‍ ഗീതമ്മ രക്തത്തില്‍ കുളിച്ച് കിടക്കുന്നുണ്ടായിരുന്നു. ആശുപത്രിയില്‍ കൊണ്ടുപോകുന്നതിനായി മറ്റൊരു അയല്‍വാസിയെ കൂടി വിളിച്ചു. അയാള്‍ എത്തിയാണ് പൊലീസിനെ വിവരമറിയിച്ചത്.ഈ സമയം അച്ഛനെയും കൊല്ലണമെന്ന് ക്രിസ്റ്റി പറഞ്ഞു. തന്നെ ഇങ്ങനെയാക്കിയത് വീട്ടുകാരാണെന്നും അവര്‍ ഇനി ഉപദേശിക്കേണ്ട കാര്യമില്ലെന്നും അവന്‍ തന്നോട് പറഞ്ഞതായി അയല്‍വാസി യുവാവ് പ്രതികരിച്ചു.
ലഹരിക്കടിമയായ ക്രിസ്റ്റി വാക്കുതര്‍ക്കത്തിനൊടുവില്‍ കിടപ്പുമുറിയില്‍ വച്ചാണ് ഗീതമ്മയെ ആക്രമിച്ചത്. കൊലപാതകം നടക്കുന്ന സമയത്ത് ഗീതമ്മയുടെ ഭര്‍ത്താവ് വീട്ടിലുണ്ടായിരുന്നില്ല. കൊലപാതകത്തിന് ശേഷം അയല്‍വാസി യുവാവിന്റെ വാഹനത്തില്‍ ഇയാള്‍ പൊലീസ് സ്റ്റേഷനിലെത്തി കീഴടങ്ങി.
