ന്യൂദല്‍ഹി: ഇന്ത്യന്‍ രൂപ തകര്‍ന്നിട്ടില്ലെന്നും ഇന്ത്യന്‍ രൂപയുടെ മൂല്യം ശരിയ്ക്കും ഉണ്ടാകേണ്ടതിനേക്കാള്‍ താഴെയാണിപ്പോള്‍ ഉള്ളതെന്നും മുഖ്യ സാമ്ത്തികോപദേഷ്ടാവ് അനന്തനാഗേശ്വരന്‍, ബ്ലൂംബര്‍ഗ് ടെലിവിഷന് നല്‍കിയ അഭിമുഖത്തിലാണ് അനന്തനാഗേശ്വരന്റെ ഈ പ്രതികരണം.
ഇന്ത്യയുടെ അടിസ്ഥാന കഴിവുകളുമായി താരതമ്യപ്പെടുത്തിയാല്‍ രൂപ യഥാര്‍ഥ മൂല്യം പ്രതിഫലിപ്പിക്കുന്നില്ല എന്നാണ് അദ്ദേഹത്തിന്റെ വാദം. ”രൂപയുടെ വില മനസിലാകാഞ്ഞിട്ടാണ്. ഇന്ത്യയുടെ മെച്ചപ്പെട്ട സാമ്പത്തിക സ്ഥിതിയുടെ കരുത്തു മുഴുവന്‍ രൂപ പ്രകടിപ്പിക്കുന്നില്ല. നമ്മുടെ ശക്തി വെച്ചു നോക്കിയാല്‍ രൂപയുടെ മൂല്യം ശരിക്കും ഉണ്ടാകേണ്ടതിനേക്കാള്‍ വളരെ താഴെയാണ്.”- അനന്തനാഗേശ്വരന്‍ പറയുന്നു.
രൂപയുടെ മൂല്യം ഇടിയുന്നതിനെക്കുറിച്ച്‌ ആശങ്ക വേണ്ടെന്നും ഇതിന് കാരണം ആഭ്യന്തരമായ ദൗര്‍ബല്യം അല്ലെന്നും അനന്തനാഗേശ്വരന്‍ പറയുന്നു. ഡോളര്‍ ആഗോള തലത്തില്‍ ശക്തിപ്പെടുന്നതാണ് അതിന് കാരണം.-അദ്ദേഹം പറയുന്നു.
രൂപയ്‌ക്ക് ഏറെ പ്രതീക്ഷയുണ്ട് എന്നതിന് മൂന്ന് കാരണങ്ങളാണ് അനന്തനാഗേശ്വരന്‍ ചൂണ്ടിക്കാണിച്ചത്. ഇന്ത്യയുടെ ശക്തമായ സാമ്പത്തിക ശേഷി എന്നതാണ്. ഏറ്റവും വേഗത്തില്‍ വളരുന്ന സമ്പദ്‌വ്യവസ്ഥയാണ് ഇന്ത്യയുടേത്. മാത്രമല്ല, ഇന്ത്യയിലെ ആഭ്യന്തരമായ ഡിമാന്‍റ് ശക്തമാണ്. പണപ്പെരുപ്പം നിയന്ത്രിതമായ തോതിലാണ്. ഇതൊന്നും ഇപ്പോഴത്തെ കറന്‍സി വിനിമയത്തില്‍ രൂപയുടെ മൂല്യം പ്രതിഫലിപ്പിക്കുന്നില്ല. – അനന്ത നാഗേശ്വരന്‍ പറയുന്ന ആദ്യത്തെ കാരണം ഇതാണ്.
ആഗോള സാഹചര്യങ്ങളാണ് രൂപയ്‌ക്കനുകൂലമായ രണ്ടാമത്തെ കാരണമായി ഉയര്‍ത്തിക്കാണിക്കുന്നത്. ഉയര്‍ന്ന പലിശനിരക്കും സുരക്ഷിത നിക്ഷേപങ്ങളിലേക്കുള്ള നീക്കവും മൂലം ഡോളര്‍ ശക്തമായി. അതോടെ, പല വികസ്വര രാജ്യങ്ങളുടെ കറന്‍സികളും സമ്മര്‍ദം നേരിടുന്നു. രൂപയും ഈ സമ്മര്‍ദം അനുഭവിക്കുന്നുണ്ടെന്നതാണ് കാരണമെന്നും അദ്ദേഹം പറയുന്നു.
രൂപയെ സംബന്ധിച്ചിടത്തോളം റിസ്ക് കുറവാണെന്ന മുന്‍തൂക്കമുണ്ടെന്നും അനന്തനാഗേശ്വരന്‍ പറയുന്നു. ഇന്ത്യയുടെ വിദേശനാണയ ശേഖരം മതിയായ നിലയിലാണ്, ബാലന്‍സ് ഓഫ് പേയ്‌മെന്‍റ്സില്‍ പ്രശനങ്ങളില്ലെന്നും അദ്ദേഹം സൂചിപ്പിക്കുന്നു.
ഇന്ത്യയുടെ സേവന കയറ്റുമതിയും പ്രവാസി പണവരവും (remittance) ഇന്ത്യയുടെ വിദേശ ഇടപാടുകള്‍ക്ക് ഒരു പിന്തുണയാണ്. ഇത് സാധാരണയായി കറന്‍സിയെ സ്ഥിരതയിലാക്കുന്ന ഘടകങ്ങളാണ്. കൂടാതെ, ദുര്‍ബലമായ രൂപ കയറ്റുമതി മേഖലക്ക് ഗുണകരമാണ് താനും.
