മലപ്പുറം: മലപ്പുറത്ത് ഒതായിയില് യുവാവിന് പാമ്പ് കടിയേറ്റു. പാമ്പിനെ പാന്റിന്റെ പോക്കറ്റിലിട്ട് നടന്ന യുവാവിനാണ് പാമ്പിന്റെ കടിയേറ്റത്.
ഇന്നലെയാണ് സംഭവം ഉണ്ടായത്. സംഭവത്തിന്റെ ദൃശ്യങ്ങൾ പുറത്ത് വന്നിട്ടുണ്ട്. പാമ്പിനെ പിടിച്ച് പോക്കറ്റിലിട്ട് യുവാവ് അങ്ങാടിയിലൂടെ നീങ്ങുന്നത് കാണാം.
ഇതര സംസ്ഥാന തൊഴിലാളിയാണ് ഈ സാഹസികത നടത്തിയത്. പാമ്പിനെ പിടിക്കാൻ ഇയാൾ പോക്കറ്റിൽ കയ്യിടുന്നുമുണ്ട്. തുടർന്നാണ് കടിയേറ്റത്. ഇയാളെ മഞ്ചേരി മെഡിക്കൽ കോളേജ് ആശുപത്രിയിൽ പ്രവേശിപ്പിച്ചു. നില ഗുരുതരമല്ലെന്നാണ് വിവരം.
അതേസമയം, ഇന്നലെ കായംകുളത്ത് പാമ്പ് കടിയേറ്റ് യുവതി മരണപ്പെട്ടിരുന്നു. ചേരാവള്ളി സ്വദേശി സലീന ആണ് പാമ്പ് കടിയേറ്റ് മരിച്ചത്. വീടിന്റെ പരിസരത്ത് കൊറ്റുകുളങ്ങരയിൽ വച്ചാണ് സലീനയ്ക്ക് കടിയേറ്റത്. ഉടൻ കായംകുളം താലൂക്ക് ആശുപത്രിയില് എത്തിച്ചെങ്കിലും ജീവന് രക്ഷിക്കാനായില്ല.
