ചേര്‍ത്തല: ഹിന്ദുവിന്റെ മതവികാരം വ്രണപ്പെടുത്തുവാനുള്ള ശ്രമങ്ങള്‍ കുറച്ച് മാസങ്ങളായി കേരളത്തില്‍ തുടരുകയാണെന്നും ഇത് ഇനിയും തുടരാന്‍ അനുവദിക്കില്ലെന്നും വിഎച്ച്പി സംസ്ഥാന ജനറല്‍ സെക്രട്ടറി അഡ്വ. അനില്‍ വിളയില്‍. ശ്രീകൃഷ്ണ ഭഗവാനെ അപഹാസ്യനാക്കി പരസ്യം ചെയ്ത മെഹര്‍ മന്തി ആന്‍ഡ് ഗ്രില്‍സ് എന്ന സ്ഥാപനത്തിലേക്ക് വിഎച്ച്പി നടത്തിയ പ്രതിഷേധ മാര്ച്ച് ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.
കേരളത്തില്‍ ട്രെയിനില്‍ കുറച്ച് കുട്ടികള്‍ ദേശഭക്തിഗാനമായ പരമപവിത്രമതാമീ മണ്ണില്‍… എന്ന് ആലപിച്ചപ്പോള്‍ ഇവിടുത്തെ ഇടത് വലത് മുന്നണികള്‍ പ്രതിഷേധിച്ചു.
ഇടത് വലത് മുന്നണികള്‍ നേതൃത്വം നല്‍കുന്ന ദേവസ്വം ബോര്‍ഡിന്റെ ഭരണകര്‍ത്താക്കള്‍ ഉള്‍പ്പെട്ടാണ് ശബരിമല കൊള്ള നടന്നത്. ഇതും ഹിന്ദു സഹിച്ചു, നവ കേരള ലോട്ടറിയില്‍ ശിവലിംഗത്തിന് മുന്നില്‍ ആര്‍ത്തവ രക്തം ഇറ്റ് വീഴുന്ന ലോട്ടറി ടിക്കറ്റ് അടിച്ച് വിറ്റു. ഹിന്ദുവിന്റെ പ്രതിഷേധം ആരും വകവച്ചില്ല. കുറച്ച് നാളുകളായി ഇത്തരം പ്രവര്‍ത്തനങ്ങള്‍ കേരളത്തില്‍ നടക്കുന്നു. ഇതിന്റെ തുടര്‍ച്ചയാണ് ഭഗവാന്‍ ശ്രീകൃഷ്ണന്റെ മുന്നില്‍ മന്തി വിളമ്പിയ ചിത്രം പ്രചരിപ്പിച്ചത്. കേരളത്തില്‍ ഹിന്ദു ന്യൂനപക്ഷമാവുകയാണ്. മുസ്ലിം ജനസംഖ്യ ഭൂരിപക്ഷമായ സ്ഥലങ്ങളില്‍ ഇവരുടെ നിയമങ്ങളാണ് നടപ്പിലാക്കുക, ഇവര്‍ പറയുന്നത് മറ്റു ജനങ്ങള്‍ അനുസരിക്കേണ്ട അവസ്ഥയാണ്. ഇതാണ് കേരളത്തില്‍ ഇന്ന് നടക്കാന്‍ പോകുന്നത്. മതേതരത്വം ഉള്ളത് ഹിന്ദുവിന് മാത്രമാണ്. ഹിന്ദു അടിമ മനോഭാവത്തില്‍ മുന്നോട്ടുപോകുന്നു, ഇതാണ് നിലവിലെ പ്രശ്നങ്ങള്‍ക്ക് കാരണം, മനോഭാവം മാറ്റണം.
ഇത്തരം പ്രശ്നങ്ങള്‍ ഉണ്ടായിട്ടും ചേര്‍ത്തല പോലീസ് ശക്തമായ നടപടി സ്വീകരിക്കാത്തതിലും പ്രതിഷേധം ഉണ്ടെന്ന് അദ്ദേഹം പറഞ്ഞു. ചേര്‍ത്തല ദേവീക്ഷേത്രത്തിന്റെ മുന്നില്‍ നിന്നുമാണ് വടക്കേ അങ്ങാടി കവലയ്‌ക്ക് സമീപമുള്ള മന്തി കടയിലേക്ക് വിഎച്ച്പി മാര്ച്ച് നടത്തിയത്. മാര്ച്ച് വടക്കേ അങ്ങാടി കവലയില്‍ പോലീസ് തടഞ്ഞു.
തുടര്‍ന്ന് പ്രവര്‍ത്തകര്‍ മുദ്രാവാക്യം വിളിച്ച് കുത്തിയിരുന്നു. പ്രതിഷേധ യോഗത്തില്‍ വിഎച്ച്പി വിഭാഗ് സെക്രട്ടറി എം. ജയകൃഷ്ണന്‍, ആര്‍എസ്എസ് ശബരിഗിരി വിഭാഗ് പ്രചാര്‍ പ്രമുഖ് അഡ്വ. പി. രാജേഷ്, ബിജെപി നോര്‍ത്ത് ജില്ലാ പ്രസിഡന്റ് അഡ്വ. പി.കെ. ബിനോയ്, ചേര്‍ത്തല മണ്ഡലം പ്രസിഡന്റ് കണ്ണന്‍ ഹരിദാസ്, മുഹമ്മ മണ്ഡലം പ്രസിഡന്റ് രാഗ്വിന്‍ ചന്ദ്, വിമല്‍ രവിന്ദ്രന്‍, റ്റി. സജീവ് ലാല്‍, ആശാ മുകേഷ് തുടങ്ങിയവര്‍ നേതൃത്വം നല്‍കി.
