തിരുവനന്തപുരം : തമിഴ്നാട്ടില്‍ എന്‍ഡിഎയുടെ നിയമസഭാ തെരഞ്ഞെടുപ്പ് പ്രചാരണത്തിനായി പ്രധാനമന്ത്രി നരേന്ദ്ര മോദി തിരുവനന്തപുരത്തെത്തി.ശംഖുംമുഖം ടെക്‌നിക്കല്‍ ഏരിയയില്‍ വിമാനം ഇറങ്ങിയ പ്രധാനമന്ത്രി ഹെലികോപ്റ്ററില്‍ നാഗര്‍കോവിലേക്ക് തിരിച്ചു. വൈകുന്നേരം 4:15-ന് നാഗര്‍കോവില്‍ ഹെലിപ്പാഡില്‍ വിമാനമിറങ്ങുന്ന പ്രധാനമന്ത്രി വെപ്പമൂഡ് വരെ ആദ്യഘട്ട റോഡ് ഷോ നടത്തും.
തുടര്‍ന്ന് 4:30 മുതല്‍ 5:30 വരെ വെപ്പമൂഡ് മുതല്‍ വടച്ചേരി വരെയുള്ള പാതയില്‍ രണ്ടാം ഘട്ട പര്യടനവും നടക്കും. ദക്ഷിണേന്ത്യയില്‍ ബിജെപിയുടെ കരുത്ത് വര്‍ദ്ധിപ്പിക്കുക എന്ന ലക്ഷ്യത്തോടെയാണ് പ്രധാനമന്ത്രിയുടെ സന്ദര്‍ശനം. മോദിയുടെ സന്ദര്‍ശനത്തിന്റെ പശ്ചാത്തലത്തില്‍ നാഗര്‍കോവിലില്‍ കനത്ത സുരക്ഷാ ക്രമീകരണങ്ങളാണ് ഏര്‍പ്പെടുത്തിയിരിക്കുന്നത്.
അമ്പതിനായിരത്തിലധികം ബിജെപി പ്രവര്‍ത്തകര്‍ പരിപാടിയില്‍ പങ്കെടുക്കുന്നതിനായി നാഗര്‍കോവിലില്‍ എത്തും.ജില്ലയിലെ ആറ് നിയമസഭ മണ്ഡലങ്ങളിലെയും എന്‍ഡിഎ സ്ഥാനാര്‍ഥികളും റോഡ് ഷോയില്‍ പ്രധാനമന്ത്രിക്കൊപ്പം അണിനിരക്കും. ഇതിന്റെ ഭാഗമായി ഗതാഗത നിയന്ത്രണവും ഏര്‍പ്പെടുത്തി.
നേരത്തെ നരേന്ദ്ര മോദി ഇവിടെ പൊതുയോഗങ്ങളില്‍ പങ്കെടുത്തിട്ടുണ്ടെങ്കിലും റോഡ് ഷോ ഇതാദ്യമാണ്. കുടുംബങ്ങള്‍ക്ക് 2000 രൂപയും മൂന്ന് സൗജന്യ പാചകവാതക സിലിണ്ടറുകളും അടക്കം വാഗ്ദാനം ചെയ്യുന്ന ബിജെപിയുടെ പ്രകടനപത്രിക കഴിഞ്ഞ ദിവസം പുറത്തിറക്കിയിരുന്നു.
