തൃശൂര്: വടക്കുന്നാഥന്റെ മഹാ പ്രദക്ഷിണ വഴികളില് ഇന്നലെ മുഴങ്ങിയത് മോദി..മോദിയെന്ന ആര്പ്പുവിളികള്.പ്രധാനമന്ത്രിയെ വരവേല്ക്കാന് എത്തിയത് പതിനായിരങ്ങള്. നാടന് കലാരൂപങ്ങളും അണിനിരന്നു.
തൃശ്ശൂരില് ഇതിനു മുന്പ് മോദിയെത്തിയത് ലോക്സഭാ തെരഞ്ഞെടുപ്പിന് തൊട്ടുമുന്പായിരുന്നു. വടക്കുന്നാഥ ക്ഷേത്ര മൈതാനിയില് തിങ്ങിനിറഞ്ഞ ഒരു ലക്ഷത്തോളം വരുന്ന വനിതകളെ അഭിസംബോധന ചെയ്യാന്. ലോക്സഭയില് വനിതാ സംവരണബില് അവതരിപ്പിച്ചതിന് പിന്നാലെയാണ് മോദി അന്ന് തൃശ്ശൂരിലെത്തിയത്. ഇക്കുറി കേരളത്തില് ആദ്യഘട്ട പ്രചരണത്തിനായി മോദി തെരഞ്ഞെടുത്തതും രണ്ട് വനിതകളുടെ മണ്ഡലം എന്നതും ശ്രദ്ധേയമായി. ശോഭാ സുരേന്ദ്രന് മത്സരിക്കുന്ന പാലക്കാടും പത്മജ വേണുഗോപാല് മത്സരിക്കുന്ന തൃശ്ശൂരും.
റോഡ് ഷോ അഞ്ചുമണിക്കാണ് ആരംഭിച്ചത്. ഉച്ചയ്ക്ക് ഒരു മണി മുതല് സ്വരാജ് റൗണ്ടില് മോദിയെ കാണാനുള്ളവരുടെ പ്രവാഹമായിരുന്നു. കനത്ത സുരക്ഷാ സന്നാഹങ്ങളാണ് എസ്പിജിയും പോലീസും ചേര്ന്ന് ഒരുക്കിയത.് കുട്ടനെല്ലൂര് ഹെലിപാഡില് ഇറങ്ങിയ മോദി സെന്റ്.തോമസ് കോളേജിന് സമീപം എത്തി ,തുറന്ന വാഹനത്തിലേക്ക് കയറി. പുഷ്പാലംകൃതമായ രഥസമാനമായ വാഹനത്തിലായിരുന്നു റോഡ് ഷോ. ഓരോ പോയിന്റ് കടക്കുമ്പോഴും കൂടെയുണ്ടായിരുന്ന കേന്ദ്രമന്ത്രി സുരേഷ് ഗോപി പ്രധാനമന്ത്രിക്ക് കാര്യങ്ങള് വിശദീകരിച്ചു നല്കുന്നുണ്ടായിരുന്നു.
