ചെന്നൈ: തമിഴ്നാട് നിയമസഭാ തിരഞ്ഞെടുപ്പിനുള്ള എൻഡിഎ ഘടകകക്ഷികളുടെ സീറ്റ് വിഭജന ഫോർമുലയ്‌ക്ക് അന്തിമരൂപമായി. തിങ്കളാഴ്ച ചെന്നൈയിലെ എഐഎഡിഎംകെ ആസ്ഥാനത്ത് നടന്ന ഒരു പ്രധാന യോഗത്തിലാണ് സീറ്റ് വിഭജന ക്രമീകരണത്തിന് അന്തിമരൂപം ലഭിച്ചത്. എഐഎഡിഎംകെ ജനറൽ സെക്രട്ടറിയും മുൻ മുഖ്യമന്ത്രിയുമായ കെ. പളനിസ്വാമി, മുതിർന്ന ബിജെപി നേതാവും കേന്ദ്രമന്ത്രിയുമായ പിയൂഷ് ഗോയൽ എന്നിവർ പങ്കെടുത്തു.
ബിജെപി 27 സീറ്റുകളിൽ മത്സരിക്കും
റിപ്പോർട്ടുകൾ പ്രകാരം ഏപ്രിൽ 23 ന് നടക്കുന്ന സംസ്ഥാനത്തെ ആകെ 234 നിയമസഭാ സീറ്റുകളിൽ 27 സീറ്റുകൾ എഐഎഡിഎംകെ ബിജെപിക്ക് നൽകി, പിഎംകെ 18 സീറ്റുകളിൽ മത്സരിക്കും, എഎംഎംകെ 11 സീറ്റുകളിൽ മത്സരിക്കും.
എഐഎഡിഎംകെ ആസ്ഥാനത്ത് നടന്ന യോഗത്തിൽ എഐഎഡിഎംകെ നേതാവ് കെ.പളനിസ്വാമി, കേന്ദ്രമന്ത്രിയും ബിജെപി തമിഴ്നാട് തിരഞ്ഞെടുപ്പ് ചുമതലയുമുള്ള പിയൂഷ് ഗോയൽ, സംസ്ഥാന ബിജെപി അധ്യക്ഷൻ നൈനാർ നാഗേധരൻ, പിഎംകെ പ്രസിഡൻ്റ് അൻബുമണി രാമദോസ്, എഎംഎംകെ ജനറൽ സെക്രട്ടറി ടിടിവി ദിനകരൻ എന്നിവർ പങ്കെടുത്തു.
അതേ സമയം തന്നെ എൻഡിഎ കേവല ഭൂരിപക്ഷത്തോടെ സംസ്ഥാനത്ത് അധികാരത്തിൽ തിരിച്ചെത്തുമെന്ന് എൻഡിഎ നേതാക്കൾ ആത്മവിശ്വാസം പ്രകടിപ്പിച്ചിട്ടുണ്ട്. “ഞങ്ങൾ വളരെ സന്തുഷ്ടരാണ്. ഞങ്ങൾ വളരെ ശക്തമായ ഒരു സഖ്യം രൂപീകരിച്ചു. ഞങ്ങളുടെ സഖ്യം തിരഞ്ഞെടുപ്പിൽ വിജയിക്കും.” – ബിജെപി നേതാവ് തമിഴിസൈ സൗന്ദരരാജൻ പറഞ്ഞു.
ഇതിനു പുറമെ സംസ്ഥാനത്ത് വലിയ ക്രമസമാധാന പ്രശ്‌നമുണ്ടെന്ന് പിഎംകെ പ്രസിഡന്റ് അൻബുമണി രാമദോസ് പറഞ്ഞു. സ്ത്രീകൾ എല്ലാ ദിവസവും പീഡിപ്പിക്കപ്പെടുന്നു. അഴിമതി, കൊള്ളയടിക്കൽ, കമ്മീഷൻ എന്നിവയല്ലാതെ അവർ ഒന്നും നേടിയിട്ടില്ല. ജനങ്ങൾ ഇതിനകം അഞ്ച് വർഷത്തേക്ക് അവർക്ക് ഒരു അവസരം നൽകി, ഇപ്പോൾ അവർ അവരെ അധികാരത്തിൽ നിന്ന് പുറത്താക്കാൻ കാത്തിരിക്കുകയാണെന്നും അദ്ദേഹം പറഞ്ഞു.
കൂടാതെ 234 സീറ്റുകളിൽ 200 ലധികം സീറ്റുകൾ നേടി ഞങ്ങൾ അധികാരത്തിലെത്തുമെന്ന് ഞങ്ങൾക്ക് ഉറപ്പുണ്ടെന്നും അദ്ദേഹം കൂട്ടിച്ചേർത്തു.
