തിരുവനന്തപുരം: കേരളത്തില്‍ ഇനി 25 ദിവസം തെരഞ്ഞെടുപ്പ് കാലം. മുന്നണികള്‍ തമ്മില്‍ പൊരിഞ്ഞ പോരാട്ടത്തിലേക്ക്. ആരോപണ പ്രത്യാരോപണ ദിനങ്ങള്‍. ഭരണം നിലനിര്‍ത്തുമെന്ന് എല്‍ഡിഎഫും തിരികെ പിടിക്കുമെന്ന് യുഡിഎഫും ഭരണം തങ്ങള്‍ നിയന്ത്രിക്കുമെന്ന് ബിജെപിയും. എല്ലാത്തിനും ചുരുങ്ങിയ ദിവസങ്ങള്‍ മാത്രം.
ശബരിമലയിലെ സ്വര്‍ണക്കൊള്ളയും യുവതീ പ്രവേശവും ആയിരിക്കും തെരഞ്ഞെടുപ്പിലെ മുഖ്യവിഷയം. സ്വര്‍ണക്കൊള്ള കേസിലെ മുഖ്യ പ്രതി പോറ്റിയെ ശബരിമലയില്‍ കയറ്റിയതില്‍ സിപിഎമ്മിലെയും കോണ്‍ഗ്രസിലെയും നേതാക്കള്‍ ഒരുപോലെ പ്രതിക്കൂട്ടിലാണ്. യുവതീ പ്രവേശ വിഷയത്തില്‍ സുപ്രീംകോടതിയില്‍ നല്‍കിയ സത്യവാങ്മൂലത്തില്‍ സര്‍ക്കാര്‍ കാണിച്ച ഇരട്ടത്താപ്പ് വീണ്ടും ചര്‍ച്ചയാകും. കേരളത്തെ വികസനപാതയില്‍ മുന്നോട്ട് നയിച്ചെന്ന് എല്‍ഡിഎഫ് അവകാശപ്പെടുമ്പോള്‍ അഴിമതിയിലും കെടുകാര്യസ്ഥതയിലും മുങ്ങി നില്‍ക്കുന്ന ആരോഗ്യവകുപ്പും മന്ത്രി വീണാ ജോര്‍ജ്ജിന്റെ നാടകങ്ങളും പ്രചാരണത്തിന് ചൂടേകും. കഴിഞ്ഞ് പത്ത് വര്‍ഷം കേരളത്തിന് പാഴായെന്നും സംസ്ഥാനത്തെ വന്‍ കടക്കെണിയിലാക്കിയെന്നുമുള്ള പ്രതിപക്ഷ പാര്‍ട്ടികള്‍ ഉന്നയിക്കുന്ന ചോദ്യങ്ങള്‍ക്ക് എല്‍ഡിഎഫിന് മറുപടി പറയേണ്ടി വരും.
ഇടതു – വലത് മുന്നണികളിലെ കൊഴിഞ്ഞുപോക്ക് മുന്നണികളെ ഭയാശങ്കയിലാക്കുമ്പോള്‍ മറ്റു പാര്‍ട്ടികളില്‍ നിന്നുള്ള നേതാക്കളുടെയും സാമൂഹിക സാംസ്‌കാരിക പ്രവര്‍ത്തകരുടെയും കടന്നുവരവ് ബിജെപിക്ക് ഏറെ പ്രതീക്ഷ നല്കുന്നു. തൃശൂരിലെ ലോക്‌സഭാ വിജയവും തിരുവനന്തപുരം കോര്‍പറേഷനിലെ ഭരണവും ബിജെപി ഏറെ മുന്നിലെന്ന സൂചനയാണെന്ന് ഇരുകൂട്ടരും സമ്മതിക്കുന്നു.
സിപിഎമ്മിലെ നെടുംതൂണുകള്‍ പാര്‍ട്ടിയില്‍ നിന്ന് ‘ലാല്‍ സലാം’ പറഞ്ഞത് പാര്‍ട്ടിയെ നന്നേ വലയ്‌ക്കുന്നു. ജി. സുധാകരന്‍, എസ്. രാജേന്ദ്രന്‍, പി.വി. അന്‍വര്‍. പി.കെ. ശശി തുടങ്ങിയവര്‍ ഇക്കൂട്ടത്തില്‍ പെടുന്നു. എംപിമാര്‍ക്ക് മത്സരിക്കണമെന്ന ആവശ്യം കോണ്‍ഗ്രസിനെ വല്ലാതെ വലയ്‌ക്കുന്നു. കോണ്‍ഗ്രസ് എംപിമാര്‍ക്ക് ദല്‍ഹി മതിയായി എന്നാണ് അടക്കം പറച്ചില്‍.
ഇതിനിടയില്‍ നിരവധി പേരാണ് ബിജെപിയിലേക്ക് കടന്നു വന്നത്. എറണാകുളത്തെ ട്വന്റി20യുടെ എന്‍ഡിഎയിലേക്കുള്ള വരവ് ഏറെ ചര്‍ച്ചയാവുന്നു.
ബംഗാളിലും നിയമസഭാ തെരഞ്ഞെടുപ്പ് നടക്കുന്നതിനാല്‍ അവിടെ കോണ്‍ഗ്രസും സിപിഎമ്മും ഇന്‍ഡി സഖ്യത്തിലൂടെ കൈ കോര്‍ക്കുകയാണ്. ഇത് കേരളത്തിലെ നിയമസഭാ തെരഞ്ഞെടുപ്പില്‍ ഇടത് വലത് മുന്നണികളെ ഉത്തരം മുട്ടിക്കും.
നിലവിലെ കക്ഷിനില (ആകെ സീറ്റുകള്‍ 140)
എല്‍ഡിഎഫ്
സിപിഎം 61
സിപിഐ 17
കേരള കോണ്‍ഗ്രസ് (എം) 5
എന്‍സിപി 2
ജനതാദള്‍ (എസ്) 2
കേരള കോണ്‍ഗ്രസ് (ബി) 1
കോണ്‍ഗ്രസ് (എസ്) 1
ഇന്ത്യന്‍ നാഷണല്‍ ലീഗ് 1
ജനാധിപത്യ കേരള കോണ്‍ഗ്രസ് 1
നാഷണല്‍ സെക്യൂലര്‍ കോണ്‍ഫറന്‍സ് 1
രാഷ്‌ട്രീയ ജനതാദള്‍ (ആര്‍ജെഡി) 1
സിപിഎം സ്വതന്ത്രന്‍ 4
(കൊയിലാണ്ടി എംഎല്‍എ കാനത്തില്‍ ജമീലയുടെ മരണം മൂലം ഒരു സീറ്റ് ഒഴിഞ്ഞ് കിടക്കുന്നു)
യുഡിഎഫ്
ഇന്ത്യന്‍ നാഷണല്‍ കോണ്‍ഗ്രസ് 22
ഇന്ത്യന്‍ യൂണിയന്‍ മുസ്ലിംലീഗ് 15
കേരള കോണ്‍ഗ്രസ് (ജോസഫ്) 2
ആര്‍എംപി 1
കേരള കോണ്‍ഗ്രസ് (ജേക്കബ്ബ് ) 1
നാഷണലിസ്റ്റ് കോണ്‍ഗ്രസ് (എന്‍സികെ) 1
