കണ്ണൂര്‍: മന്ത്രി വീണ ജോര്‍ജിനെ ആയുധമുപയോഗിച്ച് വധിക്കാന്‍ ശ്രമിച്ചെന്നത് കളള കേസാണെന്ന് വ്യക്തമായി. മന്ത്രിയുടെ കഴുത്തില്‍ ആയുധംകൊണ്ടുള്ള പരിക്കില്ലെന്നാണ് ആശുപത്രിയിലെ പരിശോധന റിപ്പോര്‍ട്ട്. മന്ത്രിക്ക് സുരക്ഷാ ചുമതല ഉണ്ടായിരുന്ന പൊലീസുകാരുടെ മൊഴിയും പ്രതിഷേധക്കാരുടെ പക്കല്‍ ആയുധം ഉണ്ടായിരുന്നില്ല എന്നാണ്.
ആരോഗ്യമന്ത്രി വീണ ജോര്‍ജിന്റെ ഗണ്‍മാന്‍ നല്‍കിയ പരാതിയും സിപിഎം നേതാക്കള്‍ പറഞ്ഞതും മന്ത്രിയെ കെഎസ്യു പ്രവര്‍ത്തകര്‍ ആക്രമിച്ചുവെന്നാണ്. ആയുധം ഉപയോഗിച്ച് വധിക്കാന്‍ ശ്രമിച്ചുവെന്ന കുറ്റത്തിനാണ് റയില്‍വെ പൊലീസ് കേസെടുത്തത്.ഇതേ തുടര്‍ന്ന് രണ്ടാഴ്ച ജയിലില്‍ കഴിഞ്ഞ ജില്ലാ പ്രസിഡന്റ് അടക്കം അഞ്ചു കെ.എസ്‌യുക്കാര്‍ ജാമ്യം ലഭിച്ചതിനെ തുടര്‍ന്ന് ഇന്ന് പുറത്തിറങ്ങി. മന്ത്രിയെ ആക്രമിച്ച ആയുധം കണ്ടെത്താനാകാത്തതും മന്ത്രിയുടെ മൊഴിയെടുക്കാത്തതും ചൂണ്ടിക്കാട്ടിയാണ് ജാമ്യം നല്‍കിയത്.
കഴുത്തിലും ചെവിയുടെ താഴെയും കൈമുട്ടിലും തൊടുമ്പോള്‍ വേദനയുണ്ടെന്ന് മന്ത്രി പറഞ്ഞതായി മന്ത്രിയും ഗണ്‍മാനും ചികിത്സ തേടിയ കണ്ണൂര്‍ ജില്ലാ ആശുപത്രിയിലെ വൂണ്ട് സര്‍ട്ടിഫിക്കറ്റിലുണ്ട്.എന്നാല്‍ ആയുധം ഉപയോഗിച്ചുള്ള ചതവോ മുറിവോ ഇല്ല. എക്‌സറേ എടുക്കാനും എഴുതിയിട്ടില്ല. സംഭവത്തിന് ഏഴുമണിക്കൂര്‍ കഴിഞ്ഞ് റയില്‍വെ പൊലീസിട്ട എഫ്‌ഐആറില്‍ ”കൊല്ലെടാ എന്ന് ആക്രോശിച്ചുകൊണ്ട് പാഞ്ഞെത്തിയ കെഎസ്‌യുക്കാര്‍ ആയുധംകൊണ്ട് കഴുത്തില്‍ പരിക്കേല്‍പ്പിച്ചു” എന്നാണ് ഉളളത്.
