കൊല്ലം :പത്തനാപുരം താലൂക്ക് എന്‍എസ്എസ് യൂണിയനില്‍ ആഭ്യന്തര പ്രശ്‌നങ്ങളില്ലെന്ന് മന്ത്രി ഗണേഷ് കുമാര്‍.തന്നെ നേതൃത്വത്തില്‍ നിന്ന് മാറ്റണമെന്ന് ഒരു വിഭാഗം ആവശ്യപ്പെട്ടെന്ന വാര്‍ത്ത ഗണേഷ് തളളി. തന്റെ പിതാവ് ആര്‍. ബാലകൃഷ്ണപിള്ള 64 വര്‍ഷം പണിപ്പെട്ട് ഉണ്ടാക്കിയതാണ് പത്തനാപുരം താലൂക്ക് എന്‍എസ്എസ് യൂണിയന്‍. ഇത് ആരുടെയും പിരിവെടുത്ത് ഉണ്ടാക്കിയതല്ല.
തെരഞ്ഞെടുപ്പ് അടുത്ത സാഹചര്യത്തില്‍ താന്‍ സ്ഥാനാര്‍ത്ഥിയാണെന്ന് അറിഞ്ഞുകൊണ്ട് കോണ്‍ഗ്രസ് നടത്തുന്ന രാഷ്‌ട്രീയ കളികളാണിത്. നായന്മാര്‍ക്കിടയില്‍ യാതൊരു പ്രശ്‌നവുമില്ല. എന്‍എസ്എസ് ജനറല്‍ സെക്രട്ടറിയാണ് കാര്യങ്ങള്‍ തീരുമാനിക്കുന്നത്. പ്രസിഡന്റ് ഇല്ലാത്ത സാഹചര്യത്തില്‍ വൈസ് പ്രസിഡന്റിനെ വച്ച് യോഗം ചേരാമെന്നാണ് ബൈലോയിലുളളത്. മരിക്കുന്നത് വരെ പ്രസിഡന്റായി ഇരിക്കാന്‍ വന്ന ആളല്ല താനെന്നും ഗണേഷ് പറഞ്ഞു. ഗണേഷിനെതിരെ എന്‍ എസ് എസിലെ ഒരു വിഭാഗം രംഗത്തെത്തിയ പശ്ചാത്തലത്തിലാണ് അദ്ദേഹത്തിന്റെ പ്രതികരണം.
എല്‍ഡിഎഫ് സര്‍ക്കാര്‍ പെന്‍ഷന്‍ 1600-ല്‍ നിന്ന് 2000 രൂപയാക്കിയപ്പോള്‍ അത് കൈക്കൂലിയാണെന്ന് പറഞ്ഞ പ്രതിപക്ഷ നേതാവ് വി.ഡി. സതീശന്‍ ഇപ്പോള്‍ 3000 രൂപ നല്‍കാമെന്ന് പറയുന്നത് അതിലും വലിയ കൈക്കൂലിയാണോ എന്ന് ഗണേഷ് കുമാര്‍ പരിഹസിച്ചു.
മുന്‍പ് 500 രൂപയില്‍ നിന്ന് 600 രൂപയാക്കി പെന്‍ഷന്‍ നല്‍കിയ സര്‍ക്കാര്‍, 18 മാസം കുടിശ്ശിക വരുത്തിയാണ് ഇറങ്ങിപ്പോയത്. അങ്ങനെയുള്ളവര്‍ ഇപ്പോള്‍ 3000 രൂപ നല്‍കുമെന്ന് പറഞ്ഞാല്‍ കേരളത്തിലെ ജനങ്ങള്‍ വിശ്വസിക്കില്ല. എല്‍ഡിഎഫ് പ്രകടനപത്രികയില്‍ പറഞ്ഞ കാര്യങ്ങള്‍ നടപ്പിലാക്കിയപ്പോള്‍ അതിനെ കൈക്കൂലിയെന്ന് വിശേഷിപ്പിച്ചവര്‍ ഇപ്പോള്‍ നടത്തുന്ന പ്രഖ്യാപനങ്ങള്‍ രാഷ്‌ട്രീയ നാടകമാണെന്നും ഗണേഷ് കൂട്ടിച്ചേര്‍ത്തു.കെ എസ് ആര്‍ ടി സി രക്ഷപ്പെട്ട് വരികയാണ്.ഉദ്യോഗസ്ഥരുടെയും ജീവനക്കാരുടെയും കഠിനാദ്ധ്വാനം കൊണ്ടാണിത്.അതിന് തകര്‍ക്കരുതെന്നും വനിതകള്‍ക്ക് കെ എസ് ആര്‍ ടി സിയില്‍ സൗജന്യ യാത്ര അനുവദിക്കുമെന്ന രാഹുല്‍ ഗാന്ധിയുടെ പ്രഖ്യാപനം സംബന്ധിച്ച് ഗണേഷ് പറഞ്ഞു.
