പാലക്കാട്: നിയമസഭാ തെരഞ്ഞെടുപ്പിന് മുന്നോടിയായി സിപിഎമ്മിനെതിരെ പടയൊരുക്കവുമായി വിമതര്‍. ഇന്ന് നടക്കുന്ന വിമത കണ്‍വെന്‍ഷന്‍ മുന്‍ എംഎല്‍എയും കെടിഡിസി ചെയര്‍മാനുമായിരുന്ന പി.കെ. ശശി ഉദ്ഘാടനം ചെയ്യും. തദ്ദേശ തെരഞ്ഞെടുപ്പിന് പിന്നാലെ പാര്‍ട്ടിക്കെതിരെ വിമതര്‍ രംഗത്തെത്തുന്നത് നേതാക്കളെ ആശങ്കയിലാക്കിയിട്ടുണ്ട്. കൊഴിഞ്ഞാമ്പാറ, മണ്ണാര്‍ക്കാട്, ഒറ്റപ്പാലം, ശ്രീകൃഷ്ണപുരം, നെന്മാറ മേഖലകളിലെ വിമതരാണ് സിപിഎം ഔദ്യോഗിക പക്ഷത്തിനെതിരെ രംഗത്തുള്ളത്. പാര്‍ട്ടിയില്‍ നിന്നും തരംതാഴ്‌ത്തപ്പെട്ട പി.കെ. ശശിയെ തന്നെ ഉദ്ഘാടനത്തിനെത്തിക്കുന്നത് ജില്ലാ നേതൃത്വത്തിനെതിരെയുള്ള വെല്ലുവിളിയാണ്. അച്ചടക്ക നടപടിയുടെ ഭാഗമായി ശശിയെ ബ്രാഞ്ചിലേക്ക് തരംതാഴ്‌ത്തിയതിന് ശേഷം കഴിഞ്ഞ രണ്ട് വര്‍ഷമായി പാര്‍ട്ടി നേതൃത്വവുമായി അകല്‍ച്ചയിലാണ്.
ശശി അല്ല ആര് പോയാലും സിപിഎമ്മിന് ഒരു പ്രശ്നവുമില്ല എന്നായിരുന്നു സംസ്ഥാന സെക്രട്ടറി എം.വി. ഗോവിന്ദന്‍ പറഞ്ഞത്. ദിവസങ്ങള്‍ക്ക് മുമ്പാണ് പി.കെ. ശശി കെടിഡിസി ചെയര്‍മാന്‍സ്ഥാനം രാജിവച്ചത്. തദ്ദേശ തെരഞ്ഞെടുപ്പില്‍ പലഭാഗത്തും സിപിഎം സ്ഥാനാര്‍ത്ഥികള്‍ക്കെതിരെ ശശിയുടെ അനുയായികളായ വിമതര്‍ പ്രത്യേക സംഘടന രൂപവത്കരിച്ച് മത്സരിച്ചിരുന്നു. ഇത് പലയിടത്തും സിപിഎമ്മിന് തിരിച്ചടിയാവുകയും ചെയ്തു. എക്കാലത്തും പാര്‍ട്ടിയെ വിജയിപ്പിച്ചിരുന്ന പല വാര്‍ഡുകളും ഇത്തവണ നഷ്ടപ്പെട്ടത് ചര്‍ച്ചയ്‌ക്ക് ഇടയാക്കിയിരുന്നു. കൊഴിഞ്ഞാമ്പാറയില്‍ വിമതര്‍ യുഡിഎഫിനോട് ചേര്‍ന്ന് മത്സരിച്ചത് പാര്‍ട്ടിക്ക് കനത്ത തിരിച്ചടിയായിരുന്നു. സിപിഎം ജില്ലാ സെക്രട്ടറിയുടെ ധാര്‍ഷ്ട്യനിലപാടുകളില്‍ പ്രതിഷേധിച്ചാണ് കൊഴിഞ്ഞാമ്പാറയില്‍ വിമതര്‍ രംഗത്തെത്തിയത്.
സിപിഎം വിമതനും കൊഴിഞ്ഞാമ്പാറ പഞ്ചായത്ത് വികസനകാര്യ സ്റ്റാന്‍ഡിങ് കമ്മിറ്റി ചെയര്‍മാനുമായ എം. സതീഷിന്റെ നേതൃത്വത്തിലാണ് വിമത കണ്‍വെന്‍ഷന്‍ നടക്കുന്നത്. അതേസമയം, സിപിഎം വിമതര്‍ രൂപീകരിക്കുന്ന പാര്‍ട്ടിയുടെ സ്ഥാനാര്‍ത്ഥിയായി യുഡിഎഫ് പിന്തുണയോടെ പി.കെ. ശശി ഒറ്റപ്പാലത്ത് മത്സരിച്ചേക്കുമെന്നും സൂചനയുണ്ട്.
