കൊല്ക്കത്ത: ബംഗാളില് ബിജെപി സര്ക്കാര് അധികാരത്തിലെത്തിയാല് ബംഗ്ലാദേശി നുഴഞ്ഞുകയറ്റക്കാരെ കണ്ടെത്തി പുറത്താക്കുന്നതിന് ആസാം സര്ക്കാര് സ്വീകരിച്ച മാതൃക പിന്തുടരുമെന്ന് ബിജെപി ദേശീയ അധ്യക്ഷന് നിതിന് നബിന്. നിയമസഭാ തെരഞ്ഞെടുപ്പിന് മുന്നോടിയായി മാള്ഡ ജില്ലയിലെ ഇസ്ലാംപൂരില് പാര്ട്ടിയുടെ പരിവര്ത്തന് യാത്ര ഫ്ളാഗ് ഓഫ് ചെയ്ത് സംസാരിക്കുകയായിരുന്നു അദ്ദേഹം.
ബിജെപി അടുത്തിടെ ബീഹാറില് സര്ക്കാര് രൂപീകരിച്ചു. ആസാമില് ബംഗ്ലാദേശി നുഴഞ്ഞുകയറ്റക്കാരെ തുരത്താന് കണ്ടെത്തുക, ഇല്ലാതാക്കുക, നാടുകടത്തുക എന്ന മാതൃകയാണ് ഇവിടെയും പിന്തുടരുന്നത്. ബംഗ്ലാദേശി നുഴഞ്ഞുകയറ്റക്കാര് നമ്മുടെ പൗരന്മാരുടെ അവകാശങ്ങള് കവര്ന്നെടുക്കുന്നിടത്തെല്ലാം ബിജെപി ഇത് നടപ്പിലാക്കുമെന്ന് നബിന് പറഞ്ഞു.
ബംഗാളില് 50 ലക്ഷത്തിലധികം ബംഗ്ലാദേശി നുഴഞ്ഞുകയറ്റക്കാരുടെ വോട്ടവകാശം ഇന്ത്യന് തെരഞ്ഞെടുപ്പ് കമ്മീഷന് ഇതിനകം എടുത്തുകളഞ്ഞു. ഇവരുടെ പേരുകള് കമ്മീഷന് നീക്കിയില്ലായിരുന്നുവെങ്കില് ബംഗാളിലെ ജനങ്ങള്ക്കായി ഉദ്ദേശിച്ചിരുന്ന കേന്ദ്രത്തിന്റെ ക്ഷേമ പദ്ധതികള് നുഴഞ്ഞുകയറ്റക്കാര്ക്ക് ഗുണം ചെയ്യുമായിരുന്നു, അദ്ദേഹം പറഞ്ഞു.
ബംഗാളില് കാളി പൂജ നടത്താന് കോടതിയുടെ അനുമതി വാങ്ങണം. പക്ഷേ ഏത് സമയത്തും റോഡുകളില് നമസ്കരിക്കാന് മുഖ്യമന്ത്രി മമതാ ബാനര്ജി നിരുപാധിക സമ്മതം നല്കിയിട്ടുണ്ട്. പ്രീണന രാഷ്ട്രീയത്തില് മുഴുകി ടിഎംസി സര്ക്കാര് ബംഗാളിലെ ജനങ്ങളെ വഞ്ചിക്കുകയാണ്. അതിനാല് സംസ്ഥാനത്തെ ജനങ്ങള് ഇപ്പോള് ഭരണമാറ്റത്തിനായി ആഗ്രഹിക്കുന്നുവെന്നും അദ്ദേഹം പറഞ്ഞു.
