ദുബായി: ഇറാന്‍-ഇസ്രായേല്‍ സംഘര്‍ഷം രൂക്ഷമായ സമയത്ത് ദുബായിലും ആക്രമണങ്ങളുണ്ടായ സമയത്ത് ഏതാനും മീറ്ററുകള്‍ക്കകലെ ഭാരത ബാഡ്മിന്റണ്‍ താരം പി.വി. സിന്ധു ഉണ്ടായിരുന്നു. സിന്ധുവും കോച്ചിങ് സ്റ്റാഫുകളുമടക്കം ദൂബായ്‌യില്‍ നിന്ന് മടങ്ങുന്നതിനായി എയര്‍പോര്‍ട്ടില്‍ കാത്ത് നില്‍ക്കുമ്പോഴാണ് സമീപത്ത് സ്‌ഫോടനമുണ്ടായത്. എന്നാല്‍ താരവും കോച്ചും ഒപ്പമുള്ള മറ്റുള്ളവരും നിലവില്‍ സുരക്ഷിത സ്ഥാനത്താണെങ്കിലും വ്യോമഗതാഗതം നിശ്ചലമായ സാഹചര്യത്തില്‍ കുടുങ്ങിയിരിക്കുകയാണ്.
ദുബായ്‌യില്‍ സ്‌ഫോടനം നടക്കുമ്പോള്‍ ഞങ്ങള്‍ വിമാനത്താവളത്തിലുണ്ടായിരുന്നു. പുകപടലങ്ങള്‍ ഉയരുന്ന ഭാഗത്ത് നിന്ന് എന്റെ കോച്ച് ഓടി മാറുന്ന കാഴ്‌ച്ച ഞെട്ടലോടെയാണ് കണ്ടത്. ദുബായി വമാനത്താവള അധികൃതരുടെയും ജീവനക്കാരുടെയും പ്രവര്‍ത്തന ഫലമായി ഞങ്ങള്‍ക്ക് സുരക്ഷിതമാകാന്‍ സാധിച്ചു. ഇവിടെയുള്ള ഇന്ത്യന്‍ ഹൈക്കമ്മീഷന്റെ പിന്തുണയോടെ കൂടുതല്‍ സുരക്ഷിതമായൊരു ഇടത്ത് തങ്ങാന്‍ സാധിച്ചു. വളരെ മികച്ച ഇടപെടലാണ് ഹൈകമ്മീഷന്റെ ഭാഗത്ത് നിന്നുണ്ടായത്. ഇപ്പോള്‍ പേടിക്കേണ്ട സാഹചര്യമൊന്നുമില്ല- പി.വി. സിന്ധു സമൂഹ മാധ്യമത്തിലൂടെ ലോകത്തെ അറിയിച്ചു.
ഇറാന്‍-ഇസ്രായേല്‍ സംഘര്‍ഷം രൂക്ഷമായപ്പോള്‍ ശനിയാഴ്‌ച്ചയാണ് ദുബായി ഉള്‍പ്പെടുന്ന യുഎഇ അടക്കമുള്ള ജിസിസി രാജ്യങ്ങളിലേക്കും ആക്രമണം ഉണ്ടായത്. ഗള്‍ഫ് മേഖലയില്‍ നിന്ന് നാട്ടിലേക്ക് മടങ്ങാനിരുന്ന നിരവധി ഭാരതീയരാണ് കുടുങ്ങിയിരിക്കുന്നത്.
