ചെന്നൈ: കെ.സി. വേണുഗോപാലിന്റെ കയ്യില്‍ രാഹുല്‍ ഗാന്ധി സ്റ്റാലിന് കൊടുത്തയച്ച കത്ത് മാപ്പപേക്ഷയാണെന്ന് മാധ്യമപ്രവര്‍ത്തകന്‍ ആര്‍. രാജഗോപാലന്‍. കാന്‍ഡിഡ് മീന (Candid Meena) എന്ന യൂട്യൂബ് ചാനലില്‍ സംസാരിക്കവേയാണ് സീനിയര്‍ മാധ്യമപ്രവര്‍ത്തകനായ ആര്‍. രാജഗോപാലന്‍ ഇക്കാര്യം വെളിപ്പെടുത്തിയത്. തമിഴ്നാട്ടില്‍ ഡിഎംകെ മുന്നണി അധികാരത്തില്‍ വന്നാല്‍ കോണ്‍ഗ്രസിന് ആറ് മന്ത്രിസ്ഥാനം വേണമെന്ന് രാഹുല്‍ ഗാന്ധിയുടെ നിര്‍ദേശപ്രകാരം കോണ്‍ഗ്രസ് നേതാക്കള്‍ ആവശ്യപ്പെട്ടിരുന്നു. ഇത് പറഞ്ഞ കോണ്‍ഗ്രസിനോട് ‘കടക്കൂ പുറത്ത്’ എന്നാണ് സ്റ്റാലിന് പറഞ്ഞത്. തമിഴ്നാട്ടില്‍ ഡിഎംകെ ആരോടും അധികാരം പങ്കുവെയ്‌ക്കാറില്ല എന്നതായിരുന്നു സ്റ്റാലിന്റെ നിലപാട്.
ഇതോടെ മന്ത്രിസ്ഥാനത്തിന് പകരം തമിഴ്നാട്ടിലെ കോര്‍പറേഷനുകളിലും ക്ഷേത്രങ്ങളെ ഭരിയ്‌ക്കുന്ന എച്ച് ആര്‍ ആന്‍ഡ് സിഇ വകുപ്പിലും മറ്റും അധികാരസ്ഥാനങ്ങള്‍ നല്‍കണമെന്നായി കോണ്‍ഗ്രസ്. ഇതും വകവെച്ചുകൊടുക്കാന്‍ സ്റ്റാലിന് തയ്യാറായില്ല. ഇതോടെയാണ് സ്റ്റാലിനെ പേടിപ്പിക്കാന്‍ കോണ്‍ഗ്രസ് നടന്‍ വിജയിന്റെ ടിവികെ പാര്‍ട്ടിയുടെ വാതിലില്‍ മുട്ടിയത്. പക്ഷെ കോണ്‍ഗ്രസുമായി സഖ്യമുണ്ടാക്കാന്‍ വിജയ് തയ്യാറായിരുന്നില്ല. കാരണം തമിഴ്നാട്ടില്‍ കോണ്‍ഗ്രസിന് വേരുകളില്ലെന്ന് വിജയുടെ പാര്‍ട്ടിയായ ടിവികെയ്‌ക്ക് അറിയാം.
ഇതോടെ എല്ലാം കൈവിട്ടുപോയോ എന്ന് പേടിച്ചാണ് കോണ്‍ഗ്രസ് വീണ്ടും സ്റ്റാലിന്റെ അരികില്‍ അഭയം തേടി എത്തിയത്. നേരിട്ട് സ്റ്റാലിനോട് സംസാരിക്കാന്‍ ഭയമുള്ള രാഹുല്‍ ഗാന്ധി, കെ.സി. വേണുഗോപാലിന്‍രെ കയ്യില്‍ കത്ത് കൊടുത്തയയ്‌ക്കുകയായിരുന്നു. ഇനി സീനിയര്‍ ജേണലിസ്റ്റായ ആര്‍. രാജഗോപാലിന്റെ വാക്കുകള്‍ കേള്‍ക്കുക:”കെ.സി. വേണുഗോപാല്‍ കൊണ്ടുവന്ന കത്ത് വായിക്കാന്‍ സ്റ്റാലിന് അടുത്തിരിക്കുന്ന കനിമൊഴിയോട് പറഞ്ഞു. കനിമൊഴി ഇംഗ്ലീഷിലുള്ള രാഹുല്‍ ഗാന്ധിയുടെ കത്ത് തമിഴിലേക്ക് തര്‍ജദ്ജമ ചെയ്ത് കൊടുത്തു. ഡിഎംകെ മുന്നണിയില്‍ അധികാരസ്ഥാനങ്ങള്‍ ചോദിച്ച നടപടി മാപ്പക്കണമെന്നാണ് കത്തില്‍ രാഹുല്‍ ഗാന്ധി എഴുതിയിരിക്കുന്നത്. കത്ത് മടക്കി എടുത്തുവെച്ചോളൂ എന്നാണ് സ്റ്റാലിന് സഹോദരി കനിമൊഴിയോട് പറഞ്ഞത്. അതായത് തനിക്ക് അശേഷം താല്‍പര്യമില്ല എന്നാണ് സ്റ്റാലിന് വ്യക്തമാക്കിയത്. രാഹുല്‍ ഗാന്ധിയുടെ ദൂതനായിപ്പോയ വേണുഗോപാല്‍ നാണംകെട്ടു. കാരണം സ്റ്റാലിനുമായി രാഹുല്‍ ഗാന്ധിയെ ഫോണില്‍ സംസാരിപ്പിച്ച് ബന്ധം മയപ്പെടുത്തുകയായിരുന്നു വോണുഗോപാലിന്റെ ലക്ഷ്യം. പക്ഷെ രാഹുലുമായി സംസാരിക്കാന്‍ സ്റ്റാലിന് തയ്യാറായില്ല. ആറ് മാസമായി സ്റ്റാലിനും രാഹുല്‍ ഗാന്ധിയും തമ്മില്‍ മിണ്ടിയിട്ട്.”- ആര്‍. രാജഗോപാലന്‍ പറയുന്നു.
മാത്രമല്ല, തമിഴ്നാട്ടില്‍ അധികാരസ്ഥാനങ്ങള്‍ ചോദിക്കുന്ന കോണ്‍ഗ്രസ് അളമുട്ടിയ അവസ്ഥയിലാണെന്ന് പറയുന്നു. കാരണം വരുമാനമാര്‍ഗ്ഗങ്ങള്‍ കുറഞ്ഞു. കേന്ദ്രത്തില്‍ ഇനി അധികാരം കിട്ടുമോ എന്ന് യാതൊരു ഉറപ്പുമില്ല. പതിനൊന്ന് വര്‍ഷമായി പ്രതിപക്ഷസ്ഥാനത്ത് തുടരുന്ന കോണ്‍ഗ്രസ് വെറും പ്രാദേശിക പാര്‍ട്ടിയായി അധപതിച്ചതിന് തെളിവാണ് തമിഴ്നാട്ടില്‍ കോര്‍പറേഷനിലും മറ്റുമൊക്കെ അധികാരസ്ഥാനങ്ങള്‍ ചോദിച്ച സംഭവം എന്ന് ചൂണ്ടിക്കാണിക്കപ്പടുന്നു.
