കണ്ണൂർ: ആരോഗ്യ മന്ത്രി വീണാ ജോർജിന് റെയിൽവേ സ്റ്റേഷനിൽ കെഎസ് യു പ്രതിഷേധത്തിനിടെ പരിക്കേറ്റ സംഭവം രാഷ്‌ട്രീയ നാടകമാണെന്ന ആരോപണവുമായി യൂത്ത് കോൺഗ്രസ്. സംഭവത്തിന് പിന്നാലെ ഇപ്പോഴിതാ മന്ത്രിയെ ആക്രമിച്ചു എന്നതിന് വീഡിയോ തെളിവ് ഹാജരാക്കുന്നവർക്ക് ഒരു പവൻ സ്വർണം പാരിതോഷികമായി പ്രഖ്യാപിച്ച് യൂത്ത് കോൺഗ്രസ് രംഗത്ത്. കണ്ണൂർ ജില്ലാ കമ്മിറ്റിയാണ് പുതിയ വാഗ്ദാനവുമായി രംഗത്തെത്തിയത്.
മന്ത്രിക്ക് പരിക്കേറ്റത് കെഎസ് യു പ്രവർത്തകരുടെ ആക്രമണം മൂലമാണെന്ന സിപിഎം വാദത്തെ പൊളിക്കാനാണ് ഈ വെല്ലുവിളിയിലൂടെ യൂത്ത് കോൺഗ്രസ് ലക്ഷ്യമിടുന്നത്. മന്ത്രിയെ ആരെങ്കിലും തള്ളുന്നതോ കയ്യേറ്റം ചെയ്യുന്നതോ ആയ ഒരു ദൃശ്യമെങ്കിലും പുറത്തുവിടാൻ സാധിക്കുമോ? എന്നാണ് യൂത്ത് കോൺഗ്രസ് ചോദിക്കുന്നത്. മന്ത്രിക്ക് നേരെയുണ്ടായ ആക്രമണത്തിന്റെ കേസ് ശക്തമാകുന്നതിന്റെ ഭാഗമായാണ് വെല്ലുവിളി.
മന്ത്രി പ്രവർത്തകർക്ക് നേരെ ആക്രോശിച്ചു വരികയായിരുന്നുവെന്നും, ഇപ്പോൾ പുറത്തുവന്ന പരിക്കിന്റെ വിവരങ്ങൾ സഹതാപം പിടിച്ചുപറ്റാനുള്ള നാടകമാണെന്നുമാണ് പ്രതിപക്ഷത്തിന്റെ ആരോപണം. റെയിൽവേ സ്റ്റേഷനിലെ സിസിടിവി ദൃശ്യങ്ങളോ മാധ്യമങ്ങൾ പകർത്തിയ ദൃശ്യങ്ങളോ തെളിവായി നൽകുന്നവർക്ക് ഈ സമ്മാനം ലഭിക്കുമെന്നാണ് യൂത്ത് കോൺഗ്രസ് പറയുന്നത്.
