ശ്രീനഗർ : ജെയ്‌ഷെ മുഹമ്മദിന്റെ മോസ്റ്റ് വാണ്ടഡ് ഭീകരനടക്കം മൂന്ന് തീവ്രവാദികളെ വധിച്ച് സൈന്യം. ജമ്മു കശ്മീരിലെ കിഷ്ത്വാറിൽ ഇന്ന് നടന്ന ഏറ്റുമുട്ടലിലാണ് ഭീകരരെ സുരക്ഷാ സേന വെടിവച്ച് കൊലപ്പെടുത്തിയത്.
മോസ്റ്റ് വാണ്ടഡ് ജെയ്‌ഷെ മുഹമ്മദ് ഭീകരൻ സൈഫുള്ള കഴിഞ്ഞ രണ്ട് വർഷമായി ഈ മേഖലയിൽ ഒളിച്ചിരിക്കുകയായിരുന്നുവെന്നും കുറഞ്ഞത് 20 തവണയെങ്കിലും ഒളിവിൽ പോയെന്നും സൈനിക വൃത്തങ്ങൾ അറിയിച്ചു.ഭീകരരുടെ നീക്കത്തെക്കുറിച്ച് സുരക്ഷാ സേനയ്‌ക്ക് മികച്ച രഹസ്യാന്വേഷണം ലഭിച്ചതിനെ തുടർന്നാണ് ഓപ്പറേഷൻ ആരംഭിച്ചത് . സുരക്ഷാ സേന ആക്രമണം നടത്താൻ നീങ്ങിയപ്പോൾ ഭീകരർ തുറന്ന ഏറ്റുമുട്ടൽ ആരംഭിക്കുകയായിരുന്നു.
കുന്നിൻ ചെരുവിലെ മൺവീടിനുള്ളിൽ ഭീകരർ ഒളിച്ചിരിക്കുകയായിരുന്നു. സുരക്ഷാ സേന ഇവർക്കെതിരെ വെടിയുതിർത്തതായി സൈനിക വൃത്തങ്ങൾ പറഞ്ഞു. ഭീകരരെ വധിച്ച സംഘത്തിൽ സംസ്ഥാന പോലീസ്, സിആർപിഎഫ്, പ്രത്യേക സേന എന്നിവരും ഉൾപ്പെടുന്നു.
ഏറ്റുമുട്ടൽ നടന്ന സ്ഥലത്ത് നിന്ന് രണ്ട് അസോൾട്ട് റൈഫിളുകളും സാധനങ്ങളും കണ്ടെടുത്തു. മറ്റൊരു പ്രധാന ജെയ്‌ഷെ ഭീകരൻ ആദിലിനെ അതേ പ്രദേശത്ത് അടുത്തിടെ സുരക്ഷാ സേന വെടിവച്ചു കൊലപ്പെടുത്തിയിരുന്നു. ചത്രോ വനമേഖലയിൽ കഴിഞ്ഞ മാസം പത്തോളം ഏറ്റുമുട്ടലുകൾ നടന്നു.
