തിരുവനന്തപുരം: സോഷ്യല് മീഡിയയില് ഏറ്റവും കൂടുതല് ചര്ച്ചയാകുന്ന വിഷയമാണ് ബീഫ്? പൊതുവേ ബിജെപി എന്ന് പറഞ്ഞാല് ബീഫ് കഴിക്കാന് പാടില്ല, പശുവിനെ നമ്മുടെ അമ്മയെപ്പോലെ കരുതണം എന്നാണല്ലോ പറയാറ്? എന്ന മാധ്യമപ്രവര്ത്തകന്റെ ചോദ്യത്തിന് അഖില് മാരാര് ചുട്ട മറുപടി നല്കി. പശു ഇറച്ചി കഴിക്കാത്ത ഒട്ടേറെ പേരെ തനിക്കറിയാം എന്ന് പറഞ്ഞാണ് അഖില് മാരാര് മറുപടിയിലേക്ക് കടന്നത്.
“എന്റെ അമ്മായിയമ്മ ഒരു ബിജെപിക്കാരിയുമല്ല. കോണ്ഗ്രസുകാരിയാണ്. പക്ഷെ അവര് പശു ഇറച്ചി കഴിയ്ക്കാറില്ല. ഞാനും പശുഇറച്ചി കഴിയ്ക്കാറില്ല. ഞാന് ഒരു പാട് പോത്തും ബീഫും കഴിച്ചതോണ്ട് എന്റെ യൂറിസ് ആസിഡ് കൂടി മരുന്ന് കഴിച്ചോണ്ടിരിക്കുന്ന ഒരാളാണ്.” – അഖില് മാരാര് പറഞ്ഞു.
“ഇവിടെ അനാവശ്യമായാണ് ബിഫീനെക്കുറിച്ച് വിവാദമുണ്ടാക്കുന്നത്. ഇവിടെ കേരളത്തില് ഏതെങ്കിലും ഹോട്ടലില് പോയി ബിജെപിയ്ക്കാര് പറഞ്ഞിട്ടുണ്ടോ ഇവിടെ ബീഫ് കഴിയ്ക്കരുതെന്ന്. ഉത്തരേന്ത്യയുടെ കള്ച്ചര് വേറെയാണ്. അത് നിങ്ങള് മനസ്സിലാക്കണം. 1857ല് തോക്കേന്തിയ ബ്രിട്ടീഷുകാരന് പശുവിന്റെ നെയ്യ് പുരട്ടിയ വെടിയുണ്ട കടിച്ചുവലിക്കാന് പട്ടാളത്തില് ജോലി ചെയ്യുന്ന ഹിന്ദുവിനോടും പന്നിമാംസം പുരട്ടിയ ബുള്ളറ്റ് കടിച്ചുവലിക്കാന് ഇന്ത്യന് പട്ടാളത്തില് ജോലി ചെയ്യുന്ന മുസ്ലിങ്ങളോടും ആവശ്യപ്പെട്ടതാണ് 1857ലെ ഒന്നാം സ്വാതന്ത്ര്യസമരത്തിന് കാരണമായതെന്നുവരെ പറയാറുണ്ട്. അതായത് പശുവിന്റെയും പന്നിയുടെയും പേരില് 1857ല് ബ്രിട്ടീഷുകാരോട് പോരാടിയ ഒരു ജനതയുള്ള ഈ സ്ഥലത്ത് 2025ല് മോദി ഭരിച്ചതുകൊണ്ടോ, 2014ല് മോദി അധികാരത്തില് വന്നതുകൊണ്ടോ ഒന്നും ഉണ്ടായ പ്രശ്നമല്ല ഇത്. “- അഖില് മാരാര് പറയുന്നു.
ഇവിടെ ബീഫ് എന്ന് പറഞ്ഞ് വിവാദമുണ്ടാക്കുന്നത് രാഷ്ട്രീയത്തിന് വേണ്ടി ജനങ്ങളെ തമ്മിലടിപ്പിക്കാനുള്ള ചിലരുടെ ശ്രമത്തിന്റെ ഭാഗമാണ്. ഇടത്പക്ഷക്കാര് ഏതോ ഒരു കോണില് സംഭവിക്കുന്ന പ്രശ്നത്തെ ഈ രാജ്യത്തെ 130 കോടി ജനങ്ങള്ക്കിടയില് സംഭവിച്ചുകൊണ്ടിരിക്കുന്ന ഒരു പ്രശ്നം പോലെ ബീഫ് പ്രശ്നത്തെ എടുത്തിടുകയാണ്. പ്രശ്നം വലുതാക്കി മനുഷ്യനെ ഭിന്നിപ്പിക്കുകയാണ്. ഈ രാജ്യത്ത് മുസ്ലിങ്ങള്ക്ക് പ്രശ്നമുണ്ടെങ്കില് അത് റിയല് ആയി അഡ്രസ് ചെയ്യണം. അല്ലാതെ ഇല്ലാത്ത പ്രശ്നമുണ്ടാക്കി അതിനെ പെരുപ്പിച്ച് ഹിന്ദുവിനെയും മുസ്ലിമിനെയും തമ്മിലടിപ്പിക്കാനാണ് ഒരു കൂട്ടര് ബീഫിന്റെ പേരില് ചെയ്യുന്നത്. “- അഖില് മാരാര് പറയുന്നു.
