വയനാട്: ചൂരല്‍മല – മുണ്ടക്കൈ ഉരുള്‍പൊട്ടല്‍ ദുരന്തബാധിതര്‍ക്കുള്ള ടൗണ്‍ഷിപ്പിലെ വീടുകളുടെ നറുക്കെടുപ്പ് തുടങ്ങി.ആദ്യഘട്ടത്തില്‍ കൈമാറുന്ന 178 വീടുകളുടെ ഗുണഭോക്താക്കളെ കണ്ടെത്താനാണ് നറുക്കെടുപ്പ്.
ലഭിച്ച വീടുകളുടെ അടിസ്ഥാനത്തില്‍ പട്ടയവും വൈദ്യുതി കണക്ഷനും ഉള്‍പ്പെടെ ഇന്നു തന്നെ കുടുംബഭോക്താക്കള്‍ക്ക് രജിസ്റ്റര്‍ ചെയ്ത് നല്‍കും. ആദ്യഘട്ടത്തിലെ 178 വീടുകളുടെ താക്കോല്‍ദാനം ഈ മാസം 25ന് മുഖ്യമന്ത്രി നിര്‍വഹിക്കും. വീട് രജിസ്റ്റര്‍ ചെയ്യുന്നതുമായി ബന്ധപ്പെട്ട എല്ലാത്തരം ഫീസുകളും ഒഴിവാക്കിയിട്ടുണ്ട് . ദുരന്തത്തില്‍ കടകളും സംരംഭങ്ങളും നഷ്ടമായവര്‍ക്ക് സാമ്പത്തിക സഹായം നല്‍കാനുള്ള തീരുമാനം വേദിയില്‍ മന്ത്രി ഒ ആര്‍ കേളു പ്രഖ്യാപിച്ചു.
പൂര്‍ണമായും വീട് നഷ്ടപ്പെട്ടവരുടെ പട്ടികയിലുള്ള 178 പേരില്‍ നിന്നാണ് ഗുണഭോക്താക്കളുടെ ക്രമം നിശ്ചയിക്കുന്നത്. മേപ്പാടിയിലാണ് നറുക്കെടുപ്പ് നടക്കുന്നത്. മൂന്ന് സോണുകളിലെ പണി പൂര്‍ത്തിയായ വീടുകളുടെ നമ്പറുകള്‍ എഴുതിയ പേപ്പറുകള്‍ നറുക്കിട്ടാണ് ആര്‍ക്കൊക്കെയെന്നത് തീരുമാനിച്ചത്. വീടും 7 സെന്റ് സ്ഥലവും ആണ് ദുരന്ത്ബാധിതര്‍ക്ക് നല്‍കുക.
കല്‍പ്പറ്റ എല്‍സ്റ്റണ്‍ എസ്റ്റേറ്റിലാണ് ദുരന്തബാധിതര്‍ക്കുള്ള ടൗണ്‍ഷിപ്പ് ഒരുങ്ങുന്നത്. രണ്ട് കിടക്കമുറികളോട് കൂടിയ ആയിരം ചതുരശ്രയടി വീടാണ് ദുരന്തബാധിതര്‍ക്കായി നിര്‍മ്മിക്കുന്നത്. ആകെ 64 ഹെക്ടര്‍ ഭൂമിയാണ് ടൗണ്‍ഷിപ്പ് സര്‍ക്കാര്‍ ഏറ്റെടുത്തത്.
178 വീടുകളുടെ താക്കോല്‍ദാനം 25ന് നടക്കുമെങ്കിലും ദുരന്തബാധിതര്‍ക്ക് വീടുകളില്‍ താമസിക്കാന്‍ കാത്തിരിക്കേണ്ടിവരും. ബാക്കിയുള്ള വീടുകളുടെ നിര്‍മ്മാണ പ്രവര്‍ത്തനങ്ങള്‍ തുടരുന്ന സാഹചര്യത്തിലാണിത്. തെരഞ്ഞെടുപ്പ് വിജ്ഞാപനം മാര്‍ച്ചില്‍ പ്രതീക്ഷിച്ചിരിക്കെയാണ് ആദ്യഘട്ട വീടുകളുടെ കൈമാറ്റം ഈ മാസം അവസാനം തന്നെ നടത്താന്‍ സര്‍ക്കാര്‍ തീരുമാനിച്ചത്.
