യുനൈറ്റഡ് നേഷന്‍സ്: ഭാരതത്തിന്റേത് അതിവേഗം വളരുന്ന വിജയകരമായ സമ്പദ്‌വ്യവസ്ഥയെന്ന് യുഎന്‍ സെക്രട്ടറി ജനറല്‍ ആന്റോണിയോ ഗുട്ടെറസ്. ഭാരതത്തിന്റെ ജിഡിപി വളര്‍ച്ച എല്ലാ കണക്കുകൂട്ടലുകളും തെറ്റിച്ച് മുന്നേറിക്കൊണ്ടിരിക്കുകയാണ്. എഐ ഇംപാക്ട് ഉച്ചകോടിയില്‍ പങ്കെടുക്കുന്നതിനായി ഭാരതം സന്ദര്‍ശിക്കാനിരിക്കേ വാര്‍ത്താ ഏജന്‍സിക്ക് നല്‍കിയ അഭിമുഖത്തിലാണ് ഗുട്ടെറസിന്റെ ഈ പ്രതികരണം.
ആഗോള സമ്പദ്വ്യവസ്ഥയില് ഭാരതം നിര്‍ണായക പങ്ക് വഹിക്കുന്നുണ്ട്. സമ്പദ്വ്യവസ്ഥയില് മാത്രമല്ല, ആഗോള വിഷയങ്ങളിലും ഇന്ന് ഭാരതം ചെലുത്തുന്ന സ്വാധീനം വളരെ വലുതാണ്. എഐ ഇംപാക്ട് ഉച്ചകോടിക്ക് ആതിഥേയത്വം വഹിക്കാന്‍ ഏറ്റവും അനുയോജ്യമായ സ്ഥലം ഭാരതമാണ്. ലോകത്തിന് ഭാരതം നല്‍കിയിട്ടുള്ള സംഭാവനകള്‍ വളരെ വലുതാണ്. ദല്‍ഹി സന്ദര്‍ശിക്കുന്നതിലുള്ള സന്തോഷമുണ്ടെന്നും അദ്ദേഹം പറഞ്ഞു. ദല്‍ഹി സന്ദര്‍ശന വേളയില്‍ കേന്ദ്ര സര്‍ക്കാരുമായി വിവിധ വിഷയങ്ങളില്‍ ചര്‍ച്ച നടത്തുമെന്നും ഗുട്ടെറസ് കൂട്ടിച്ചേര്‍ത്തു.
ഇന്ന് മുതല്‍ 20 വരെ ദല്‍ഹിയില്‍ സംഘടിപ്പിച്ചിട്ടുള്ള എഐ ഇംപാക്ട് ഉച്ചകോടിയില്‍ വിവിധ രാജ്യങ്ങളില്‍ നിന്നുള്ള പ്രധാനമന്ത്രിമാര്‍ പ്രമുഖ സാങ്കേതിക കമ്പനികളുടെ പ്രസിഡന്റുമാര്‍, വൈസ് പ്രസിഡന്റുമാര്‍, സിഇഒകള്‍ തുടങ്ങിയവര്‍ പങ്കെടുക്കുന്നുണ്ട്.
