ന്യൂദല്‍ഹി:സമസ്ത കേരള ജംഇയ്യത്തുല്‍ ഉലമ ജനറല്‍ സെക്രട്ടറി കാന്തപുരം എ.പി അബൂബക്കര്‍ മുസ്ലിയാര്‍ പ്രധാനമന്ത്രി നരേന്ദ്രമോദിയുമായി കൂടിക്കാഴ്ച നടത്തി.പ്രധാനമന്ത്രിയുടെ വസതിയില്‍ ആണ് കൂടിക്കാഴ്ച നടന്നത്.രാഷ്‌ട്രീയം ചര്‍ച്ച ചെയ്തില്ലന്നും നിയമസഭാ തിരഞ്ഞെടുപ്പിലെ നിലപാട് സംബന്ധിച്ച് സമസ്ത ഇതുവരെ ചര്‍ച്ച നടത്തിയിട്ടില്ലെന്നും കാന്തപുരം അറിയിച്ചു.
വിവിധ സാമൂഹിക-മാനുഷിക-വിദ്യാഭ്യാസ-വികസന വിഷയങ്ങളും ന്യൂനപക്ഷ ക്ഷേമ കാര്യങ്ങളും അന്തര്‍ദേശീയ സംഭവങ്ങളും കൂടിക്കാഴ്ചയില്‍ ചര്‍ച്ചയായി.മനുഷ്യര്‍ക്കൊപ്പം എന്ന പ്രമേയത്തില്‍ നടത്തിയ കേരളയാത്രക്കിടെ സമൂഹത്തിലെ വിവിധ കോണുകളില്‍ നിന്നും ഉയര്‍ന്നുവന്ന വിഷയങ്ങളും പ്രധാനമന്ത്രിയുടെ ശ്രദ്ധയിപ്പെടുത്തിയെന്ന് കാന്തപുരം പറഞ്ഞു.
കേരളത്തിലെ ജനകീയ പ്രശ്‌നങ്ങള്‍ പ്രധാനമന്ത്രിയോട് പറഞ്ഞു. കേന്ദ്രസര്‍ക്കാറിന്റെ പരിധിയില്‍ വരുന്ന വിഷയങ്ങളില്‍ ഇടപെട്ട് പരിഹാരം ഉണ്ടാക്കുമെന്ന് പ്രധാനമന്ത്രി ഉറപ്പ് നല്‍കിയെന്നും കാന്തപുരം അബൂബക്കര്‍ മുസ്ലിയാര്‍ പറഞ്ഞു.കൂടിക്കാഴ്ച അര മണിക്കൂര്‍ നീണ്ടു നിന്നു.
പ്രധാനമന്ത്രിക്കൊപ്പം ദേശീയ സുരക്ഷാ ഉപദേഷ്ടാവ് അജിത് ദോവലും ഉണ്ടായിരുന്നു. സമസ്തയുടെ മൂന്ന് പ്രധാനനേതാക്കള്‍ കാന്തപുരത്തിനൊപ്പം കൂടിക്കാഴ്ചയില്‍ പങ്കെടുത്തു.
