തിരുനാവായ: ഹിന്ദുവായി ജനിച്ചത് മഹാഭാഗ്യവും അഹങ്കാരവുമായി കാണുന്നുവെന്ന് മലപ്പുറത്തെ കുംഭമേള എന്ന് വിശേഷിപ്പിക്കപ്പെടുന്ന തിരുനാവായിലെ മാഘമഹോത്സവത്തിന് എത്തിയ നടി സോനാ നായര്‍. കേരളത്തിലെ കുംഭമേള കണ്ടപ്പോള്‍ പറഞ്ഞറിയിക്കാനാവാത്ത അനുഭവമാണ് ഉണ്ടായതെന്നും സോനാ നായര്‍.
നിളാ ആരതി ഉള്‍പ്പെടെ നേരില്‍ കാണാനായത് വലിയ ഭാഗ്യമായി കരുതുന്നുവെന്ന് സോനാ നായരും ഒപ്പമുണ്ടായിരുന്ന നടി ജലജയും പറഞ്ഞു. മലപ്പുറത്തെ മഹാകുംഭമേളയില്‍ എത്തിയപ്പോഴുണ്ടായ അനുഭവം വാക്കുകളില്‍ വിവരിക്കാവുന്നതില്‍ അപ്പുറമാണെന്നും അത് അനുഭവിച്ചറിയേണ്ട സംഭവം തന്നെയാണെന്നും സോനാ നായര്‍ പറഞ്ഞു.
സമാപനം ഫെബ്രുവരി മൂന്നിന്, അതിന് മുന്‍പെത്താന്‍ ആഹ്വാനം ചെയ്ത് സോനാ നായര്‍
ഫെബ്രുവരി മൂന്നിനാണ് കുംഭമേള സമാപിക്കുന്നതെന്നും എല്ലാവരും വരികയാണെങ്കില്‍ അത് പറഞ്ഞറിയിക്കാന്‍ പറ്റാത്ത അനുഭവമാണെന്നും സോനാനായര്‍ വിശദമാക്കി. കുംഭമേള വേദിയായ നിളാ തീരത്ത് വലി ആള്‍ക്കൂട്ടമാണെന്നും ഇത് വലിയ അനുഭവം തന്നെയാണെന്നും സോനാ നായര്‍.
“ഉത്തരേന്ത്യയില്‍ നടക്കുന്ന കുംഭമേളകളില്‍ പങ്കെടുക്കണമെന്ന് ആഗ്രഹമുണ്ടായിരുന്നുവെങ്കിലും പല കാരണങ്ങളാല്‍ നടന്നില്ല. പക്ഷെ കേരളത്തില്‍ ആദ്യമായി നടക്കുന്ന കുംഭമേളയില്‍, അതും മലപ്പുറം പോലുള്ള ജില്ലയില്‍ നടക്കുന്ന ഈ ഉത്സവത്തില്‍ പങ്കെടുക്കാന്‍ കഴിഞ്ഞതില്‍ സന്തോഷം.ഇവിടുത്തെ ആള്‍ക്കുട്ടം കാണുമ്പോള്‍ തന്നെ അറിയാം എത്രത്തോളം ഭക്തരാണ് ഉണ്ടാകുന്നതെന്ന്. “- സോനാ നായര്‍ പറഞ്ഞു.
നിളയില്‍ സ്നാനം, പിന്നെ നാവാമുകുന്ദ ക്ഷേത്രത്തില്‍ ദര്‍ശനം-നടി ജലജ
രാവിലെ നിളയില്‍ സ്നാനം നടത്തിയെന്നും അതിന് ശേഷം നാവാമുകുന്ദക്ഷേത്രത്തില്‍ ദര്‍ശനം നടത്തിയെന്നും നടി ജലജ. “ഇനി നിള ആരതിയും കൂടി കണ്ട ശേഷം മടങ്ങും. 270 വര്‍ഷത്തിന് ശേഷം കേരളത്തില്‍ നടക്കുന്ന മാഘ മോഹത്സവം എന്ന് പറഞ്ഞാല്‍ വളരെ അഭിമാനം തോന്നുന്ന നിമിഷമാണ്.അതില്‍ പങ്കെടുക്കാന്‍ കഴിഞ്ഞത് ദൈവാധീനമായും വലിയൊരു ഭാഗ്യമായും കരുതുന്നു. ഇത്രയും ആള്‍ക്കൂട്ടം വന്നിട്ടും ഇതെല്ലാം ഭംഗിയാക്കി എന്ന് പറയുമ്പോള്‍ അതിന് നിമിത്തമായ, ഈ ഉത്സവത്തിന്റെ പിന്നില്‍ നട്ടെല്ലായി പ്രവര്‍ത്തിച്ച മഹാമണ്ഡലേശ്വര്‍ ആനന്ദവനം സ്വാമിയ്‌ക്ക് പ്രത്യേകം നന്ദി പറയണം. മലപ്പുറം ജില്ലയില്‍ ഇങ്ങിനെ ഒന്ന് നടക്കുക എന്ന് പറഞ്ഞാല്‍ നമുക്ക് പറഞ്ഞറിയിക്കാന്‍ പറ്റുന്നില്ല. അത്രയും വലിയ വൈബാണ് ഇവിടെ ഉണ്ടായിരിക്കുന്നത്. പ്രയാഗ് രാജിലെ കുംഭമേളയ്‌ക്ക് പോകാന്‍ കഴിഞ്ഞില്ല. പക്ഷെ നമ്മുടെ നാട്ടില്‍ നടക്കുന്ന കുംഭമേളയില്‍ പങ്കെടുക്കാന്‍ കഴിഞ്ഞു എന്നത് വലിയ ഭാഗ്യം. എന്തായാലും വല്ലാത്ത ഒരു അനുഭവമാണ്. നമ്മള്‍ വന്ന് അനുഭവിക്കുമ്പോഴേ അത് അറിയൂ. ” നടി ജലജ പറയുന്നു.
