തിരുനാവായ: ജ്ഞാനമഹാമാഘത്തോടെ മാഘമഹോത്സവം പൂര്‍ണതയിലെത്തിയെന്ന് മഹാമണ്ഡലേശ്വര്‍ സ്വാമി ആനന്ദവനം ഭാരതി. തിരുനാവായ മാഘമഹോത്സവത്തില്‍ ഇന്നലെ നടന്ന വിദ്വത് സഭയില്‍ മാധവ ഗണിത പുരസ്‌കാര സമര്‍പ്പണം നിര്‍വഹിച്ചശേഷം അനുഗ്രഹ പ്രഭാഷണം നടത്തുകയായിരുന്നു അദ്ദേഹം. തിരുനാവായയില്‍ കളിയാടിയ ജ്ഞാനസമ്പത്തിന്റെ പുനരുജ്ജീവനത്തിന് വരുംകാല മഹാമാഘങ്ങള്‍ പ്രാധാന്യം നല്‍കുമെന്ന് അദ്ദേഹം സൂചിപ്പിച്ചു.
ലോക പ്രശസ്ത ഗണിത – ജ്യോതിഷ പണ്ഡിതനായിരുന്ന സംഗമഗ്രാമ മാധവന്റെ സ്മരണാര്‍ത്ഥം മാധവ ഗണിത കേന്ദ്രം നല്‍കിവരുന്ന മാധവഗണിത പുരസ്‌കാരങ്ങള്‍ പ്രൊഫ. കൈലാസ് വിശ്വകര്‍മ്മക്കും പി. ദേവരാജനും സമര്‍പ്പിച്ചു. കൈലാസ് വിശ്വകര്‍മ്മയ്‌ക്ക് കാലിക്കറ്റ് സര്‍വകലാശാല വിസി പ്രൊഫ. പി. രവീന്ദ്രന്‍ കീര്‍ത്തിപത്രം സമര്‍പ്പിച്ചു. ദേവരാജന് മലയാളം സര്‍വ്വകലാശാല വി.സി പ്രൊഫ. സി. ആര്‍. പ്രസാദ് കീര്‍ത്തി പത്രം സമര്‍പ്പിച്ചു. ബി.കെ. പ്രിയേഷ് കുമാര്‍ പുരസ്‌കാരാര്‍ഹരെ സദസിന് പരിചയപ്പെടുത്തി. മാധവ ഗണിത കേന്ദ്രം ഡയറക്ടര്‍ എ. വിനോദ് അദ്ധ്യക്ഷത വഹിച്ച ചടങ്ങില്‍ കേന്ദ്ര സംസ്‌കൃത സര്‍വ്വകലാശാല ഗുരുവായൂര്‍ കേന്ദ്രം ഡയറക്ടര്‍ പ്രൊഫ. കെ.കെ. ഷൈന്‍, അമൃത വിശ്വവിദ്യാലയം കള്‍ച്ചറല്‍ സ്റ്റഡീസ് ഹെഡ് ഡോ. ശിവാനന്ദന്‍, കോഴിക്കോട് എന്‍ഐടി ഐകെഎസ് വിഭാഗം ചെയര്‍പേഴ്സണ്‍ ഡോ. ആശിഷ് അവസ്തി എന്നിവര്‍ സംസാരിച്ചു. പ്രൊഫ. വി. പി. എന്‍. നമ്പൂതിരി, പ്രൊഫ. പി ബാലകൃഷ്ണ പണിക്കര്‍, പ്രൊഫ. ശ്രീരാം ചൗത്തേവാല എന്നിവര്‍ അംഗങ്ങളും പ്രൊഫ. എം മാലിനി കണ്‍വീനറുമായ സമിതിയാണ് സംഗ്രാമ മാധവ പുരസ്‌ക്കാരാര്‍ഹരെ നിശ്ചയിച്ചത്.
