കൊച്ചി ; എറണാകുളത്തപ്പൻ ക്ഷേത്രത്തിലെ പ്രസാദം ഊട്ട് ഉദ്ഘാടനം ചെയ്ത് മമ്മൂട്ടി. ഉത്സവാഘോഷത്തിന്റെ ഭാഗമായുള്ള ചടങ്ങിൽ അന്നം വിളമ്പിയതും മമ്മൂട്ടിയാണ് . പത്മ പുരസ്കാര പ്രഖ്യാപനത്തിന് ശേഷം മമ്മൂട്ടി പങ്കെടുത്ത ആദ്യ ചടങ്ങായിരുന്നു ഇത്. എറണാകുളത്തപ്പൻ ഉത്സവാഘോഷങ്ങളുടെ ഭാഗമായ പ്രസാദ ഊട്ടിലേക്ക് മമ്മൂട്ടിക്ക് നേരത്തെ തന്നെ ക്ഷണം ഉണ്ടായിരുന്നു. അപ്രതീക്ഷിതമായി പത്മ പുരസ്കാര നേട്ടം എത്തിയതോടെ പൊന്നാടയണിയിച്ച് മമ്മൂട്ടിയെ ക്ഷേത്രം ഭാരവാഹികൾ സ്വീകരിച്ചു.
‘ ഈശ്വരന്റെ മിഴിവാർന്ന ചിത്രത്തിനു മുന്നിലെ ഇലയിൽ അന്നം വിളമ്പി അന്നദാനത്തിന്റെ തുടക്കം കുറിക്കുന്നു. ഈശ്വരന് എന്തു മതം !. ഒരു ഭക്ത സമൂഹം മുഴുവൻ തികഞ്ഞ ആദരവോടെ, അതിലുപരി നിറഞ്ഞ സ്നേഹത്തോടെ , ആരാധനയോടെ ആ മനുഷ്യനെ സ്വീകരിച്ചാനയിക്കുന്നു. നിങ്ങൾ ഞങ്ങളുടെ വല്യേട്ടനാണ് എന്ന സത്യഭാവത്തിൽ നിർവൃതിയോടെ നോക്കി നിൽക്കുന്നു. ഒരു തിരക്കും കാണിക്കാതെ ആ മനുഷ്യൻ ഒരു ഭക്ത സമൂഹത്തിന്റെ എല്ലാ ആവശ്യങ്ങൾക്കും നിറഞ്ഞ ചിരിയോടെ നിന്നുകൊടുക്കുന്നു.‘ എന്നാണ് മമ്മൂട്ടി എറണാകുളത്തപ്പൻ ക്ഷേത്രത്തിൽ വന്നതിനെക്കുറിച്ച് കേരള ടൂറിസം വകുപ്പ് മുൻ ഡപ്യൂട്ടി ഡയറക്ടർ പ്രശാന്ത് വാസുദേവ് സമൂഹ മാധ്യമത്തിൽ കുറിച്ചത് .
