ന്യൂദൽഹി : ഉന്നത വിദ്യാഭ്യാസ സ്ഥാപനങ്ങളിൽ സമത്വം ഉറപ്പാക്കുക എന്ന ലക്ഷ്യത്തോടെ യൂണിവേഴ്സിറ്റി ഗ്രാന്റ്സ് കമ്മീഷൻ പുറപ്പെടുവിച്ച യൂണിവേഴ്സിറ്റി ഗ്രാന്റ്സ് കമ്മീഷൻ പ്രൊമോഷൻ ഓഫ് ഇക്വിറ്റി ഇൻ ഹയർ എജ്യുക്കേഷൻ ഇൻസ്റ്റിറ്റിയൂഷൻസ് റെഗുലേഷൻസ് -2026 എന്ന വിജ്ഞാപനത്തിന്റെ അടിസ്ഥാന ലക്ഷ്യങ്ങൾ മഹത്വമേറിയതെന്ന് അഖില ഭാരതീയ വിദ്യാർത്ഥി പരിഷത്ത്. എങ്കിലും ഈ ചട്ടങ്ങളിൽ കൂടുതൽ വ്യക്തത ഉറപ്പാക്കുന്നതും സന്തുലിതമായ ഒരു സമീപനം സ്വീകരിക്കുന്നതും അത്യന്താപേക്ഷിതമാണെന്ന് എബിവിപി അഭിപ്രായപ്പെട്ടു.
എല്ലാ പൗരന്മാർക്കും തുല്യ അവകാശങ്ങൾ ഉറപ്പാക്കിക്കൊണ്ട് ജനാധിപത്യത്തിന്റെ അന്തസ്സത്ത ഉയർത്തിപ്പിടിക്കാനും വിവേചനരഹിതവും നീതിയുക്തവുമായ ഒരു ഭാരതം കെട്ടിപ്പടുക്കാനും യുജിസിയും എല്ലാ വിദ്യാഭ്യാസ സ്ഥാപനങ്ങളും പ്രതിജ്ഞാബദ്ധരായിരിക്കണമെന്ന് എബിവിപി വ്യക്തമാക്കി.
ക്യാമ്പസുകളിൽ ജനാധിപത്യ മൂല്യങ്ങൾ പ്രോത്സാഹിപ്പിക്കുന്നതിനും എല്ലാവരെയും ഉൾക്കൊള്ളുന്ന ആരോഗ്യകരമായ അന്തരീക്ഷം സൃഷ്ടിക്കുന്നതിനും നിരന്തരം പ്രവർത്തിക്കുന്ന പ്രസ്ഥാനമാണ് എബിവിപി. ‘വികസിത് ഭാരത്’ എന്ന ലക്ഷ്യം കൈവരിക്കാൻ സമൂഹത്തിന്റെ കൂട്ടായ പരിശ്രമം ആവശ്യമാണ്. നിലവിൽ, ഈ ചട്ടങ്ങളിലെ ചില വ്യവസ്ഥകളും നിർവ്വചങ്ങളും വിദ്യാർത്ഥികൾക്കും രക്ഷിതാക്കൾക്കുമിടയിൽ ആശയക്കുഴപ്പമുണ്ടാക്കിയിട്ടുണ്ട്.ഇത് പരിഹരിക്കാൻ യുജിസി അടിയന്തരമായി ഇടപെടണമെന്നും ആവശ്യമായ വിശദീകരണങ്ങൾ നൽകണമെന്നും എബിവിപി ആവശ്യപ്പെട്ടു. കൂടാതെ, വിഷയം കോടതിയുടെ പരിഗണനയിലായ സാഹചര്യത്തിൽ യുജിസി തങ്ങളുടെ നിലപാട് വ്യക്തമാക്കി ഉടൻ സത്യവാങ്മൂലം സമർപ്പിക്കണമെന്നും വിദ്യാർത്ഥി പരിഷത്ത് ആവശ്യപ്പെട്ടു.
യൂണിവേഴ്സിറ്റി ഗ്രാന്റ്സ് കമ്മീഷൻ പുറപ്പെടുവിച്ച യൂണിവേഴ്സിറ്റി ഗ്രാന്റ്സ് കമ്മീഷൻ പ്രൊമോഷൻ ഓഫ് ഇക്വിറ്റി ഇൻ ഹയർ എജ്യുക്കേഷൻ ഇൻസ്റ്റിറ്റിയൂഷൻസ് റെഗുലേഷൻസ് -2026ന്റെ ലക്ഷ്യം വളരെ പ്രധാനപ്പെട്ടതാണ്. എന്നാൽ ഈ വിജ്ഞാപനത്തിലെ ചില വ്യവസ്ഥകളിൽ വ്യക്തത അത്യന്താപേക്ഷിതമാണ് എന്ന് എബിവിപി ദേശീയ ജനറൽ സെക്രട്ടറി ഡോ വീരേന്ദ്ര സിംഗ് സോളങ്കി പറഞ്ഞു. ചട്ടങ്ങളിലെ ചില നിർവ്വചനങ്ങൾ സംബന്ധിച്ച് സമൂഹത്തിലും വിദ്യാർത്ഥികൾക്കിടയിലും രക്ഷിതാക്കൾക്കിടയിലും നിലനിൽക്കുന്ന ആശയക്കുഴപ്പങ്ങളും തെറ്റിദ്ധാരണകളും യുജിസി അടിയന്തരമായി പരിഗണിക്കുകയും ആവശ്യമായ നടപടികൾ സ്വീകരിച്ച് അത് ദൂരീകരിക്കണമെന്നും അദ്ദേഹം ആവശ്യപ്പെട്ടു. ജനാധിപത്യ മൂല്യങ്ങൾ ശക്തിപ്പെടുത്തുന്നതിനും എല്ലാ വിദ്യാർത്ഥികൾക്കും വിവേചനരഹിതമായ അന്തരീക്ഷം ഉറപ്പാക്കുന്നതിനും സമൂഹത്തിലെ എല്ലാ വിഭാഗങ്ങളുടെയും കൂട്ടായ പരിശ്രമം ആവശ്യമാണ് എന്നും അദ്ദേഹം വ്യക്തമാക്കി.
