കൊച്ചി: വനിതാ പ്രവര്‍ത്തകയുടെ ചോദ്യത്തിന് മുന്നില്‍ ഇളിഭ്യനായി കോണ്‍ഗ്രസ് നേതാവ് രാഹുല്‍ ഗാന്ധി. വരുന്ന നിയമസഭാ തെരഞ്ഞെടുപ്പിലൂടെ കോണ്‍ഗ്രസ് അധികാരത്തില്‍ വന്നാല്‍ കേരളത്തിനെന്ത് ഗുണമെന്നായിരുന്നു ചോദ്യം. മലയാളത്തില്‍ ചോദിച്ച ഈ ചോദ്യം ഷാഫി പറമ്പില്‍ എംപി ഇംഗ്ലീഷിലേക്ക് തര്‍ജ്ജമ ചെയ്‌തെങ്കിലും രാഹുല്‍ ഗാന്ധി മറുപടി നല്‍കിയില്ല.
മറൈന്‍ ഡ്രൈവില്‍ കെപിസിസി സംഘടിപ്പിച്ച മഹാപഞ്ചായത്ത് ഉദ്ഘാടനം ചെയ്യാനെത്തിയതായിരുന്നു രാഹുല്‍. നീണ്ട പ്രസംഗത്തിന് ശേഷം പങ്കെടുത്ത പ്രതിനിധികള്‍ക്ക് സംശയമുണ്ടെങ്കില്‍ ചോദിക്കാന്‍ രാഹുല്‍ ആവശ്യപ്പെടുകയായിരുന്നു. കേരളത്തില്‍ ഭരണം പിടിക്കുമെന്ന് ഉറച്ചുപറഞ്ഞാണ് അദ്ദേഹം പ്രസംഗം അവസാനിപ്പിച്ചത്.
ഈ സമയത്ത് മറ്റാരും ചോദ്യം ചോദിക്കാതെ വന്നതോടെയാണ് വനിത പ്രവര്‍ത്തക ചോദ്യം ഉന്നയിച്ചത്. രാഹുല്‍ ഗാന്ധി തങ്ങള്‍ ചെയ്യാന്‍ ഉദ്ദേശിക്കുന്ന കാര്യങ്ങള്‍ വിശദമായി പറയുമെന്ന് ധരിച്ചാണ് ഏറെ പ്രസക്തമായ ചോദ്യം ചോദിച്ചതെങ്കിലും രാഹുല്‍ ഇത് കേട്ടഭാവം നടിച്ചില്ല. മുതിര്‍ന്ന നേതാക്കളടക്കം ഇതെന്ത് ചോദ്യമാണ് ചോദിക്കുന്നതെന്ന് ഈ സമയം ഉറക്കെ വിളിച്ചു പറയുന്നുണ്ടായിരുന്നു.
അതിനിടെ കോണ്‍ഗ്രസിന്റെ മഹാപഞ്ചായത്തില്‍ അതൃപ്തി പരസ്യമാക്കി എഐസിസി പ്രവര്‍ത്തക സമിതിയംഗം ശശി തരൂര്‍ എംപി. എല്ലാവരേയും ഒത്തിണക്കാനായി രാഹുല്‍ ഗാന്ധിയെ എത്തിച്ച് സംഘടിപ്പിച്ച വിജയാഘോഷ പരിപാടിക്കിടെ ശശി തരൂര്‍ പരാതിയറിച്ച ശേഷം വേദിവിടുകയും ചെയ്തു.
രാഹുല്‍ ഗാന്ധി വേദിയിലിരിക്കെ തനിക്ക് പ്രസംഗിക്കാന്‍ അനുമതി നല്‍കിയില്ല, സ്വാഗതം പറഞ്ഞപ്പോള്‍ തന്റെ പേര് മനപൂര്‍വം ഒഴിവാക്കി എന്നിവയാണ് ശശി തരൂരിന്റെ പരാതിക്ക് കാരണം. ദീപ ദാസ് മുന്‍ഷിയോടും കെ.സി. വേണുഗോപാലനോടും അതൃപ്തി വ്യക്തമാക്കിയ തരൂര്‍ രാഹുല്‍ ഗാന്ധി മടങ്ങും മുന്‍പ് വേദി വിട്ടിറങ്ങിയത് പ്രവര്‍ത്തകര്‍ക്കിടയിലും വലിയ ചര്‍ച്ചയായി. രാഹുല്‍ ഗാന്ധി എത്തിയ ശേഷം മറ്റാരും സംസാരിക്കില്ല എന്നതായിരുന്നു ആദ്യ തീരുമാനമെങ്കിലും പ്രതിപക്ഷ നേതാവടക്കം ഇതിന് ശേഷമാണ് സംസാരിച്ചത്. ഇതാണ് ശശി തരൂരിനെ ചൊടിപ്പിച്ചത്.
