മുംബൈ : ത്രിവർണ്ണപതാക പുതച്ച് അച്ഛൻ കിടക്കുമ്പോൾ അടുത്ത് അമ്മയുടെ കൈകളിൽ ഉറക്കമായിരുന്നു പ്രമോദ് ജാദവിന്റെ പൊന്നുമകൾ. ഭാര്യയുടെ പ്രസവസമയത്ത് ഒപ്പം ഉണ്ടാകാൻ വേണ്ടി അവധിയെടുത്ത് വീട്ടിലേയ്ക്ക് വരാൻ ഇറങ്ങിയ സൈനികൻ പ്രമോദ് വഴിമധ്യേ വാഹനാപകടത്തിൽ മരിക്കുകയായിരുന്നു. ത്രിവർണ്ണ പതാകയിൽ പൊതിഞ്ഞ അദ്ദേഹത്തിന്റെ മൃതദേഹം ഗ്രാമത്തിലെ തെരുവുകളിലൂടെ കടന്നുപോകുമ്പോൾ, നാട് ഒന്നടങ്കം ആദരവ് അർപ്പിക്കാൻ എത്തി.
ആശുപത്രിയിൽ ആയിരുന്ന ഭാര്യ സ്ട്രെച്ചറിലാണ് പ്രമോദിനെ കാണാൻ കൊണ്ടുവന്നത്. ജനിച്ച് മണിക്കൂറുകൾ മാത്രമായ മകളെ അവസാനമായി കൈകളിലെടുത്ത് പിതാവിന് കാണിച്ചുകൊടുത്തു. ഈ നിമിഷം വളരെ വികാരഭരിതമായിരുന്നു. സൈനികർ ഗാർഡ് ഓഫ് ഓണർ നൽകി, സല്യൂട്ട് ചെയ്തു, കണ്ണീരിനിടയിൽ പൂർണ്ണ ആദരവോടെ അദ്ദേഹത്തിന് വിട നൽകി.മഹാരാഷ്ട്രയിലെ സതാര സ്വദേശിയായിരുന്നു പ്രമോദ്.
