ന്യൂദൽഹി: ബംഗാൾ ഉൾക്കടലിന്റെ വടക്കൻ മേഖലയിൽ ഇന്ത്യയുടെ സമുദ്ര സാന്നിധ്യം വർദ്ധിപ്പിക്കുന്നതിനായി ഇന്ത്യൻ നാവികസേന പശ്ചിമ ബംഗാളിലെ ഹാൽദിയയിൽ ഒരു പുതിയ താവളം നിർമ്മിക്കുന്നു. മാധ്യമ റിപ്പോർട്ടുകൾ പ്രകാരം ചെറിയ യുദ്ധക്കപ്പലുകൾ വിന്യസിക്കുന്നതിൽ ശ്രദ്ധ കേന്ദ്രീകരിക്കുന്ന ഒരു ഇടമായി ഈ താവളം പ്രവർത്തിക്കും.
ഹൂഗ്ലി നദിയിൽ സ്ഥിതി ചെയ്യുന്ന ഈ താവളം അതിവേഗ പട്രോളിംഗിനും ആക്രമണ കപ്പലുകൾക്കും പിന്തുണ നൽകും. പ്രവർത്തനക്ഷമമായാൽ ഇന്ത്യയുടെ കിഴക്കൻ കടൽത്തീരത്ത് തീരദേശ സുരക്ഷ, കടൽക്കൊള്ള വിരുദ്ധ പ്രവർത്തനങ്ങൾ, ദുരന്ത നിവാരണ പ്രവർത്തനങ്ങൾ, ദ്രുത പ്രതികരണ പ്രവർത്തനങ്ങൾ എന്നിവയും വർദ്ധിപ്പിക്കും.
നാവികസേനയുടെ വിപുലീകരണ പദ്ധതികളുടെ ഭാഗമായാണ് ഈ നീക്കം. വടക്കൻ ബംഗാൾ ഉൾക്കടലിൽ ഇന്ത്യയുടെ നീക്കത്തിന് നിരവധി ഘടകങ്ങളുണ്ടെന്ന് വിദഗ്‌ദ്ധർ പറയുന്നു. ഇന്ത്യൻ മഹാസമുദ്ര മേഖലയിൽ ചൈനീസ് നേവിയുടെ വർദ്ധിച്ചുവരുന്ന പ്രവർത്തനങ്ങൾ ഒരു പ്രധാന ഘടകമാണ്. കൂടാതെ സമുദ്രാതിർത്തിയിലെ നുഴഞ്ഞുകയറ്റത്തെക്കുറിച്ചും ബംഗ്ലാദേശിൽ നിന്ന് കടൽ വഴി ഇന്ത്യയിലേക്ക് അനധികൃതമായി പ്രവേശിക്കുന്നതിനെക്കുറിച്ചും വർദ്ധിച്ചുവരുന്ന ആശങ്കകളും പ്രധാന ഘടകങ്ങളാണ്.
ഇതിനു പുറമെ ഇന്ത്യൻ മഹാസമുദ്രത്തിൽ ചൈനയുടെ നാവിക സാന്നിധ്യം വളരുകയാണ്. കൂടാതെ ബംഗ്ലാദേശുമായുള്ള ചൈനയുടെ വർദ്ധിച്ചുവരുന്ന പ്രതിരോധ, അടിസ്ഥാന സൗകര്യ പങ്കാളിത്തവും ഒരു ഘടകമാണ്. പാകിസ്ഥാനുമായുള്ള ചൈനയുടെ ദീർഘകാല സൈനിക പങ്കാളിത്തം കണക്കിലെടുക്കുമ്പോൾ ഹാൽഡിയ താവളം കൂടുതൽ പ്രാധാന്യം അർഹിക്കുന്നു.
അതേ സമയം ഇവിടെ ഏകദേശം 100 ഉദ്യോഗസ്ഥരും നാവികരും നിലയുറപ്പിക്കുമെന്നും റിപ്പോർട്ടുകൾ സൂചിപ്പിക്കുന്നു.
