തിരുവനന്തപുരം: അര്ഹരായ മുഴുവന് ആളുകളെയും വോട്ടര് പട്ടികയില് ഉള്പ്പെടുത്താന് അടിയന്തര നടപടികള് സ്വീകരിക്കുമെന്ന് മുഖ്യമന്ത്രി പിണറായി വിജയന്. മതിയായ രേഖകള് കൈവശമില്ലാത്തവര്ക്ക് യുദ്ധകാലാടിസ്ഥാനത്തില് രേഖകള് ലഭ്യമാക്കാന് നടപടികള് സ്വീകരിക്കാന് ജില്ലാ കളക്ടര്മാര്ക്ക് നിര്ദ്ദേശം നല്കി. രേഖകള് കിട്ടാന് ഫീസ് ഈടാക്കില്ല. ഏതെങ്കിലും ഫീസ് ഉണ്ടെങ്കില് അത് ഈ കാലയളവില് ഒഴിവാക്കും.
വോട്ടര് പട്ടികയില് പേര് ഉള്പ്പെടുത്തുന്നതിന് ജനങ്ങളെ സഹായിക്കാന് മതിയായ സഹായക കേന്ദ്രങ്ങള് പ്രാദേശികാടിസ്ഥാനത്തില് സ്ഥാപിക്കുന്നതിന് മന്ത്രിസഭാ യോഗം നേരത്തെ തീരുമാനിച്ചിട്ടുണ്ട്. ആവശ്യമുള്ള സ്ഥലങ്ങളിലെല്ലാം പൊതുജനങ്ങള്ക്ക് ബുദ്ധിമുട്ടുണ്ടാകാത്ത രീതിയില് ഹിയറിംഗ് കേന്ദ്രങ്ങള് സജ്ജീകരിക്കും.ഇതിനായി അടിസ്ഥാന സൗകര്യങ്ങള് ഉറപ്പു വരുത്താന് ജില്ലാ കളക്ടര്മാര്ക്ക് ചുമതല നല്കി. ഹിയറിംഗ് കേന്ദ്രങ്ങളില് ആവശ്യമെങ്കില് വോളന്റിയര്മാരുടെ സേവനവും മതിയായ ഹിയറിംഗ് ഉദ്യോഗസ്ഥരുടെ സേവനവും ഉറപ്പുവരുത്തേണ്ടതാണ്.
ഓണ്ലൈനായി ഫോമുകള് സമര്പ്പിക്കുന്നതിന് എല്ലാ സഹായ കേന്ദ്രങ്ങളിലും സൗകര്യം ഉണ്ടാകും. അക്ഷയ സെന്ററുകള് ഈടാക്കുന്ന ഫീസ് ലഘൂകരിക്കാന് ഐടി വകുപ്പിന് നിര്ദേശം നല്കി.ബൂത്ത് ലെവല് ഓഫീസര്മാരെ നിയോഗിക്കാത്തതോ ഒഴിവുള്ളതോ ആയ പോളിംഗ് സ്റ്റേഷനുകളില് രണ്ടു ദിവസത്തിനകം തന്നെ നിയമനം നടത്തണമെന്നും നിര്ദ്ദേശിച്ചതായി മുഖ്യമന്ത്രി അറിയിച്ചു. ഇ ആര് ഒ എ ഇ ആര് ഒ, അഡീഷണല് എ.ഇ.ആര്.ഒ തസ്തികകളില് വിരമിക്കല് മുഖേന ഉണ്ടാകുന്ന ഒഴിവുകള് ഉടനടി നികത്തണം. പകരം ആളെ നിയമിക്കുന്ന മുറയ്ക്ക് മാത്രം എല്പിഎആര് (വിരമിക്കുന്നതിനു മുന്പുള്ള അവധി) അനുവദിക്കണം.
ഇക്കാലയളവില് ബന്ധപ്പെട്ട ഉദ്യോഗസ്ഥരുടെ സ്ഥലംമാറ്റം നടത്തരുത്. മുന്കൂര് അനുമതിയില്ലാതെ അവധി അനുവദിക്കരുത്. കരട് പട്ടികയില് നിന്നും വിട്ടുപോയ അര്ഹരായ എല്ലാവരെയും വോട്ടര്പട്ടികയില് ചേര്ക്കുന്നതിനായുളള ബോധവത്ക്കരണം നടത്തും. കെ-സ്മാര്ട്ട് വഴി ലഭ്യമാകേണ്ട സര്ട്ടിഫിക്കറ്റുകള്ക്ക് കാലതാമസം നേരിടുകയാണെങ്കില് അത് നേരിട്ട് പഞ്ചായത്ത് മുഖേന ലഭ്യമാക്കുന്ന കാര്യം പരിശോധിക്കുവാന് തദ്ദേശസ്വയംഭരണ വകുപ്പിനോട് ആവശ്യപ്പെട്ടിട്ടുണ്ട്.
ക്യാമ്പുകളില് കെ-സ്മാര്ട്ട് ഹെല്പ്പ് ഡെസ്ക് സജ്ജമാക്കുവാന് നിര്ദ്ദേശം നല്കി. ചീഫ് സെക്രട്ടറിയുടെ നേതൃത്വത്തില് ചേര്ന്ന യോഗം ഇക്കാര്യങ്ങള് വിശദമായി പരിശോധിക്കുകയും ആവശ്യമായ നടപടികള്ക്ക് ബന്ധപ്പെട്ട എല്ലാവര്ക്കും നിര്ദ്ദേശം നല്കുകയും ചെയ്തിട്ടുണ്ട്.
