ന്യൂദല്ഹി: രാഹുല് ഗാന്ധി ഏറ്റവും കൂടുതല് വിദേശയാത്രകള് നടത്തിയ പ്രതിപക്ഷ നേതാവാണെന്ന് ബിജെപി ദേശീയ വക്താവ് സുധാംശു ത്രിവേദി എംപി. സന്ദര്ശനങ്ങള്ക്കിടെ നടത്തിയ രാജ്യവിരുദ്ധ പ്രസ്താവനകളിലൂടെ രാഹുല് കുപ്രസിദ്ധനായെന്നും അദ്ദേഹം ആരോപിച്ചു.
രാജ്യത്ത് ഒരു വേദിയും ലഭിക്കാത്ത രാഹുലിനെ വിദേശത്തേക്ക് ആവര്ത്തിച്ച് ക്ഷണിക്കുകയാണെന്നാണ് കോണ്ഗ്രസ് പറയുന്നത്. ഭാരതത്തിന്റെ ചരിത്രത്തില് ഏറ്റവും കൂടുതല് വിദേശസന്ദര്ശനങ്ങള് നടത്തിയ പ്രതിപക്ഷ നേതാവാണ് രാഹുല്. അടുത്തിടെ മലേഷ്യ, കൊളംബിയ, ജര്മ്മനി എന്നീ രാജ്യങ്ങളില് നടത്തിയ സന്ദര്ശനത്തിനുശേഷം ഇപ്പോള് വിയറ്റ്നാമും സന്ദര്ശിച്ചു. വിദേശ സന്ദര്ശനവേളയില് രാഹുല് ഏതെങ്കിലും ഭാരതവിരുദ്ധ വ്യക്തികളുടെ അതിഥിയാകുന്നതും രാജ്യവിരുദ്ധ പരാമര്ശങ്ങള് നടത്തുന്നതും സ്ഥിരം കാഴ്ചയാണ്. രാഹുലിനെ വിദേശത്തേക്ക് ആവര്ത്തിച്ച് ക്ഷണിക്കുന്നവര് ആരാണെന്ന് കോണ്ഗ്രസ് വ്യക്തമാക്കണമെന്നും അദ്ദേഹം ആവശ്യപ്പെട്ടു.
