ഉളളാല് : കേരള മുസ്ലിം ജമാഅത്ത് രാഷ്ട്രീയ പാര്ട്ടിയല്ലെന്ന് സമസ്ത കേരള ജം ഇയ്യത്തുല് ഉലമ ജനറല് സെക്രട്ടറി കാന്തപുരം എ പി അബൂബക്കര് മുസ്ലിയാര്. രാഷ്ട്രീയ നിലപാട് സ്വീകരിക്കുന്നുമില്ല. കേരളം ഭരിക്കുന്നവര് തെക്കും വടക്കും വ്യത്യാസം കാണരുതെന്നും ഇന്ത്യ ഭരിക്കുന്നവര് എല്ലാവരെയും ഒരു പോലെ കാണണമെന്നും അദ്ദേഹം പറഞ്ഞു.
എല്ലാ ആനുകൂല്യങ്ങളും എല്ലാവര്ക്കും നല്കണം.വര്ഗീയത നമ്മെ തൊട്ടുതീണ്ടരുത്. മറ്റ് മതത്തിലുള്ള മനുഷ്യരെ നാം തെറി പറയാറില്ല. ആര് ഭരിച്ചാലും വര്ഗീയതക്കെതിരായ ആശയത്തില് നിന്ന് പിന്നോട്ട് പോകില്ല. വര്ഗീയത പ്രചരിപ്പിക്കുന്നവരോട് ഒരിക്കലും കൈ കൊടുക്കില്ലെന്നും അദ്ദേഹം പറഞ്ഞു.
കാന്തപുരം നയിക്കുന്ന കേരള യാത്ര കര്ണാടകയിലെ ഉള്ളാളില് സ്പീക്കര് യു.ടി ഖാദര് യാത്ര ഉദ്ഘാടനം ചെയ്തു. മനുഷ്യര്ക്കൊപ്പം എന്നതാണ് യാത്രയുടെ മുദ്രാവാക്യമെന്ന് കാന്തപുരം എ പി അബൂബക്കര് മുസ്ലിയാര് പറഞ്ഞു. ഇന്ന് നാട്ടില് മനുഷ്യത്വം മരവിച്ചു, അരാജകത്വം പടരുന്നു, നാട്ടില് അധര്മ്മം നടക്കുന്നു.
ജനങ്ങളെ സന്മാര്ഗത്തിലേക്ക് നടത്താനാണ് യാത്ര. കേരള മുസ്ലിം ജമാഅത്തിന്റെ നേതൃത്വത്തില് മനുഷ്യര്ക്കൊപ്പം എന്ന പ്രമേയത്തിലാണ് യാത്ര. സമസ്തയുടെയും പോഷക സംഘടനകളുടെയും 40 നേതാക്കളാണ് യാത്രയിലെ സ്ഥിരം അംഗങ്ങള്.
കേരള അതിര്ത്തിയായ തലപ്പാടിയില് നിന്ന് യാത്രയെ സ്വീകരിച്ച് ആനയിക്കും. വിവിധ ജില്ലകളിലെ സ്വീകരണത്തിന് ശേഷം 16ന് യാത്ര തിരുവനന്തപുരത്ത് സമാപിക്കും. നേരത്തേ 1999ലും 2012ലും കാന്തപുരം കേരള യാത്ര നടത്തിയിരുന്നു.
