ബെര്ലിന്: ജര്മനിയില് ബാങ്ക് നിലവറ തകര്ത്ത് 30 മില്യണ് യൂറോ (ഏകദേശം 316 കോടി രൂപ) വിലമതിക്കുന്ന സ്വര്ണവും മറ്റ് വിലപിടിപ്പുള്ള വസ്തുക്കളും കവര്ന്നു. ഗെല്സെന്കിര്ച്ചെന് നഗരത്തിലെ സ്പാര്ക്കാസ് സേവിങ്സ് ബാങ്ക് കെട്ടിടത്തിന്റെ പാര്ക്കിങ് ഏരിയയില് നിന്നും ഭിത്തിതുരന്ന് നിലവറയ്ക്കുള്ളില് പ്രവേശിച്ച മോഷ്ടാക്കള് മൂവായിരത്തിലധികം സേഫ് ഡെപ്പോസിറ്റ് ബോക്സുകളില് നിന്ന് സ്വര്ണവും പണവും മോഷ്ടിച്ചതായാണ് റിപ്പോര്ട്ട്. 3250 ഉപഭോക്താക്കളുടെ സേഫ് ഡെപ്പോസിറ്റ് ബോക്സുകളാണ് നിലവറയില് സൂക്ഷിച്ചിരുന്നത്. ഇതില് 95 ശതമാനത്തിലേറെയും മോഷ്ടാക്കള് തകര്ത്തതായി ബാങ്ക് അതികൃതര് പറഞ്ഞു.
ക്രിസ്തുമസ് പ്രമാണിച്ച് കഴിഞ്ഞ വ്യാഴാഴ്ച മുതല് ബാങ്കിന് അവധിയായിരുന്നു. ഈ ദിവസങ്ങളില് നിലവറയില് പ്രവേശിച്ച മോഷ്ടാക്കള് ഞായറാഴ്ച വരെ നിലവറയ്ക്കുള്ളില് ചെലവഴിച്ചതായും, തിങ്കളാഴ്ച രാവിലെ കെട്ടിടത്തിലെ ഫയര് അലാം മുഴങ്ങിയപ്പോഴാണ് വിവരം പുറത്തറിയുന്നതെന്നും റിപ്പോര്ട്ടില് പറയുന്നു.
ഉപഭോക്താക്കളുടെ പരാതികള് പരിഹരിക്കുന്നതിനായി പ്രത്യേക ഹെല്പ്പ്ലൈന് ആരംഭിച്ചതായും ക്ലെയിം നടപടികള് സംബന്ധിച്ച് ഇന്ഷുറന്സ് കമ്പനിയുമായി പ്രവര്ത്തിച്ചുവരികയാണെന്നും ബാങ്ക് ഉദ്യോഗസ്ഥര് പറഞ്ഞു. ‘ഓഷ്യന്സ് ഇലവന്’ എന്ന സിനിമയെ അനുസ്മരിപ്പിക്കും വിധം തീര്ത്തും ആസൂത്രിതമായ കവര്ച്ചയാണെന്നും, സാക്ഷി മൊഴികളുടെയും, സിസിടിവി ദൃശ്യങ്ങളുടെയും അടിസ്ഥാനത്തില് അന്വേഷണ നടപടികള് പുരോഗമിക്കുകയാണെന്നും ഉദ്യോഗസ്ഥര് അറിയിച്ചു.
