വാഷിങ്ടണ്‍ ഡിസി: യുദ്ധം അവസാനിപ്പിക്കുന്നതിനായുള്ള ചര്‍ച്ചകളില്‍ പ്രതീക്ഷയുണ്ടെന്ന് ഉക്രൈന്‍ പ്രസിഡന്റ് വ്‌ളോദിമീര്‍ സെലന്‍സ്‌കി. ഇന്നലെ ആരംഭിച്ച സമാധാന ചര്‍ച്ചയില്‍ 20 പ്രധാന നിര്‍ദേശങ്ങളാണ് മുന്നോട്ട് വെച്ചത്. ഇതില്‍ ഭൂരിഭാഗത്തിലും ചര്‍ച്ച ചെയ്തു. ഇക്കാര്യങ്ങള്‍ യുഎസ് പ്രസിഡന്റ് ഡൊണാള്‍ഡ് ട്രംപ് റഷ്യന്‍ പ്രസിഡന്റ് വ്‌ളാദിമിര്‍ പുടിനെ അറിയിച്ചതായും സെലന്‍സ്‌കി പറഞ്ഞു. സമാധാന ചര്‍ച്ചയ്‌ക്കുവേണ്ടി മുന്നോട്ടുവെച്ച ആശയങ്ങളില്‍ 90 ശതമാനത്തിലും ധാരണയായിട്ടുണ്ടെന്നും സെലന്‍സ്‌കി മാധ്യമങ്ങളോട് വെളിപ്പെടുത്തി.
സമാധാന ചര്‍ച്ചയ്‌ക്ക് മുന്നോടിയായി ഫ്‌ളോറിഡയിലെ പാം ബീച്ചില്‍ ട്രംപുമായി സെലന്‍സ്‌കി കൂടിക്കാഴ്ച നടത്തിയിരുന്നു. യുദ്ധം അവസാനിപ്പിക്കുന്നത് സംബന്ധിച്ച് ഇരു നേതാക്കളും ചര്‍ച്ച നടത്തി. ദീര്‍ഘകാലത്തേക്ക് ഉക്രൈന്റെ സുരക്ഷ ഉറപ്പുവരുത്തണം, കുറഞ്ഞത് 50 വര്‍ഷത്തേക്ക് എങ്കിലും സുരക്ഷ വാഗ്ദാനം ചെയ്യണമെന്നാണ് സെലന്‍സ്‌കി യോഗത്തില്‍ ആവശ്യപ്പെടുന്നത്. ട്രംപിനൊപ്പം യൂറോപ്യന്‍ നേതാക്കളും സമാധാന ചര്‍ച്ചയില്‍ പങ്കെടുക്കുന്നുണ്ട്.
അതേസമയം ചര്‍ച്ചയില്‍ നല്ല പുരോഗതിയുണ്ടെന്ന് ട്രംപും സെലന്‍സ്‌കിയും പറയുമ്പോഴും പ്രധാന തര്‍ക്കവിഷയങ്ങളില്‍ കാര്യമായ മാറ്റങ്ങള്‍ വരുത്താന്‍ കൂടിക്കാഴ്ചയില്‍ സാധിച്ചിട്ടില്ല. ഇരു രാജ്യങ്ങള്‍ക്കിടയില്‍ സമാധാനം കൊണ്ടുവരുന്നതില്‍ ഏതാനും സങ്കീര്‍ണമായ വിഷയങ്ങളുണ്ടെന്നും പരിഹരിക്കുന്നത് വളരെ കഠിനമാണെന്നും സെലന്‍സ്‌കിയുമായുള്ള കൂടിക്കാഴ്ചയ്‌ക്കുശേഷം ട്രംപ് തന്നെ വ്യക്തമാക്കിയിരുന്നു. ഡോണ്‍ബാസില്‍ ഒരു സ്വതന്ത്ര വ്യാപാര മേഖല സ്ഥാപിക്കുന്നതാണ് ഇതില്‍ ഒന്ന്. മറ്റൊന്ന് ഭൂപ്രദേശം സംബന്ധിച്ചാണ്. വെടിനിര്‍ത്തല്‍ കരാര്‍ നടപ്പിലാക്കണമെന്നും അത് നിരീക്ഷിക്കുന്നതിനും ഉക്രൈനിന്റെ സുരക്ഷ ഉറപ്പ് വരുത്തണമെന്നും സെലന്‍സ്‌കി ചര്‍ച്ചയില്‍ ആവര്‍ത്തിച്ച് ആവശ്യപ്പെട്ടു.
അതേസമയം സമാധാന കരാറില്‍ എത്തിച്ചേരാനുള്ള സമയപരിധി നിശ്ചയിച്ചിട്ടില്ലെങ്കിലും റഷ്യ-ഉക്രൈന്‍ യുദ്ധം സമീപഭാവിയില്‍ തന്നെ അവസാനിക്കുമെന്ന് ഉറപ്പുണ്ടെന്ന് ട്രംപ്
അറിയിച്ചു. സെലന്‍സ്‌കിയുമായി ചര്‍ച്ച നടത്തുന്നതിന് മുമ്പ് പുടിനുമായി രണ്ടുമണിക്കൂര്‍ സംസാരിച്ചിരുന്നു. യുദ്ധം അവസാനിപ്പിക്കുന്നതിനെ പിന്തുണച്ചുകൊണ്ടാണ് അദ്ദേഹം സംസാരിച്ചത്. ചര്‍ച്ചയില്‍ അനുകൂലമായ നിലപാട് ഉണ്ടാകുമെന്നാണ് പ്രതീക്ഷിക്കുന്നത്. ചര്‍ച്ചകള്‍ക്ക് ശേഷം പുടിനുമായി വീണ്ടും സംസാരിക്കും, ട്രംപ് കൂട്ടിച്ചേര്‍ത്തു.
