ലണ്ടന്‍: ഞാന്‍ ഒരു സ്‌കൂള്‍ കുട്ടിയായിരുന്നു, എന്റെ നഗരം കത്തുന്നത് ഞാന്‍ ടെലിവിഷനിലൂടെ കണ്ടു, അമ്മയുടെ ശബ്ദത്തിലെ ഭയവും, അച്ഛന്റെ പിരിമുറുക്കവും എനിക്ക് ഓര്‍മയുണ്ട്. മൂന്ന് രാത്രികള്‍ മുംബൈ ഉറങ്ങിയില്ല, ഞാനും… ഓക്‌സ്‌ഫോര്‍ഡ് സര്‍വകലാശാലയിലെ നിയമവിദ്യാര്‍ത്ഥിയും മുംബൈ സ്വദേശിയുമായ വീരാന്‍ശ് ഭാനുശാലിയുടേതാണ് ഈ വാക്കുകള്‍.
പാകിസ്ഥാനെ അതിരൂക്ഷമായി വിമര്‍ശിച്ച് ഓക്‌സ്‌ഫോര്‍ഡ് സര്‍വകലാശാലയില്‍ വീരാന്‍ശ് ഭാനുശാലി നടത്തിയ പ്രസംഗം ലോകശ്രദ്ധ നേടുന്നു. ഓക്‌സ്‌ഫോര്‍ഡ് യൂണിയന്‍ ചര്‍ച്ചക്കിടെയാണ് ഭാരതമണ്ണില്‍ പാകിസ്ഥാന്‍ നടത്തിയ ആക്രമണങ്ങള്‍ക്കെതിരെ വീരാന്‍ശ് ആഞ്ഞടിച്ചത്. വീഡിയോ സമൂഹമാധ്യമങ്ങളില്‍ തരംഗമാണ.് പാകിസ്ഥാനോടുള്ള ഭാരതത്തിന്റെ നിലപാടായിരുന്നു ചര്‍ച്ചയിലെ പ്രമേയം.
ലജ്ജയില്ലാത്ത ഒരു രാജ്യത്തെ ലജ്ജിപ്പിക്കാന്‍ കഴിയില്ലെന്നുള്ള പാഠം ഞങ്ങള്‍ പഠിച്ചു. പാകിസ്ഥാനോടുള്ള ഭാരതത്തിന്റെ സമീപനം രാഷ്‌ട്രീയ ജനകീയതയിലല്ല, മറിച്ച് യഥാര്‍ത്ഥ ദേശീയ സുരക്ഷാ ആശങ്കകളാണ്. 26/11 മുംബൈ ആക്രമണത്തിനു ശേഷമുള്ള നയതന്ത്ര സംയമനം മുതല്‍ പഹല്‍ഗാം ഭീകരാക്രമണത്തെത്തുടര്‍ന്നുള്ള സൈനിക നടപടി വരെ വീരാന്‍ശ് വിശദീകരിച്ചു. ഭാരതത്തിന്റെ പാകിസ്ഥാന്‍ നയങ്ങള്‍ തെരഞ്ഞെടുപ്പ് കാഴ്ചപ്പാടുകളാല്‍ നയിക്കപ്പെടുന്നുവെന്ന് പ്രസംഗിച്ച പാകിസ്ഥാന്‍ ഓക്‌സ്‌ഫോര്‍ഡ് യൂണിയന്‍ പ്രസിഡന്റ് മൂസ ഹരാജ് മുന്നോട്ടുവച്ച വാദങ്ങളെ വീരാന്‍ശ് ശക്തമായി എതിര്‍ത്തു.
പത്താന്‍കോട്ട്, ഉറി, പുല്‍വാമ എന്നിവയുള്‍പ്പെടെയുള്ള മറ്റ് പ്രധാന ആക്രമണങ്ങളെ പരാമര്‍ശിച്ച്, ഭീകര ശൃംഖലകള്‍ക്ക് അഭയം നല്‍കുന്ന ഒരു രാജ്യത്തിന് ധാര്‍മികമായ ശ്രേഷ്ഠത അവകാശപ്പെടാന്‍ കഴിയില്ലെന്നും വീരാന്‍ശ് പറഞ്ഞു.
