അല്ലാഹു ഇച്ഛിച്ചാൽ തുർക്കി-പാകിസ്ഥാൻ സൗഹൃദം തഴച്ചുവളരുമെന്ന് എർദോഗൻ ; തുർക്കി നിർമ്മിത യുദ്ധ കപ്പൽ പാക് നാവികസേനയിൽ ചേർന്നു

ഇസ്ലാമാബാദ്: പാകിസ്ഥാൻ ഭക്ഷണത്തിനായി കഷ്ടപ്പെടുമ്പോഴും തങ്ങളുടെ
സൈനിക സംഭരണം വീർപ്പിക്കാൻ ഏറെ പാടുപെടുന്നുണ്ട്. പ്രധാനമായും സഖ്യകക്ഷികളായ തുർക്കിയെയും ചൈനയെയുമാണ് പാകിസ്ഥാൻ ഇതിനായി ആശ്രയിക്കുന്നത്. ഇന്ത്യ ആരംഭിച്ച ഓപ്പറേഷൻ സിന്ദൂരിനെ പ്രതിരോധിക്കാൻ തുർക്കി എല്ലാ വിധത്തിലും പാകിസ്ഥാനെ പിന്തുണച്ചിരുന്നു എന്നത് വ്യക്തമാണ്. ഇപ്പോൾ ഒരിക്കൽ കൂടി പാകിസ്ഥാന് സൈനിക തലത്തിൽ സഹായവുമായി രംഗത്തെത്തിയിരിക്കുകയാണ് ഇസ്താംബുൾ.

അടിമത്തത്തിന് പ്രതിഫലം ലഭിച്ചിരിക്കുന്നു

തുർക്കിയിൽ നിർമ്മിച്ച രണ്ടാമത്തെ MILGEM ക്ലാസ് കപ്പൽ പാകിസ്ഥാൻ നാവികസേനയ്‌ക്ക് കൈമാറി. ഇരു രാജ്യങ്ങളും തമ്മിലുള്ള സാങ്കേതിക കൈമാറ്റ കരാറിന്റെ അടിസ്ഥാനത്തിലാണ് കപ്പൽ നിർമ്മിച്ചത്. ഇസ്താംബുൾ നാവിക കപ്പൽശാലയിൽ വെച്ചാണ് പിഎൻഎസ് ഖൈബറിന്റെ കമ്മീഷൻ ചടങ്ങ് നടന്നത്. തുർക്കി പ്രസിഡന്റ് റജബ് ത്വയ്യിബ് എർദോഗനും പാകിസ്ഥാൻ നാവിക മേധാവി അഡ്മിറൽ നവീദ് അഷ്‌റഫും ചടങ്ങിൽ പങ്കെടുത്തതായി പാകിസ്ഥാൻ സൈനിക മാധ്യമ വിഭാഗം പ്രസ്താവനയിൽ പറഞ്ഞു.
ചടങ്ങിനെ അഭിസംബോധന ചെയ്തുകൊണ്ട് പ്രസിഡന്റ് എർദോഗൻ നടത്തിയ പ്രസംഗത്തിൽ പാകിസ്ഥാനുമായുള്ള സഹോദര ബന്ധത്തെ പരാമർശിച്ചു. “നമ്മുടെ പങ്കിട്ട ചരിത്രം ആഴത്തിൽ വേരൂന്നിയതാണ്, നൂറ്റാണ്ടുകളായി പരീക്ഷിച്ച തുർക്കി-പാകിസ്ഥാൻ സൗഹൃദം, അല്ലാഹു ഇച്ഛിച്ചാൽ, കാലാവസാനം വരെ നിലനിൽക്കുകയും തഴച്ചുവളരുകയും കൂടുതൽ ശക്തമായി വളരുകയും ചെയ്യും”- അദ്ദേഹം പറഞ്ഞു.

പാകിസ്ഥാനിൽ രണ്ട് കപ്പലുകൾ നിർമ്മിക്കും

പാകിസ്ഥാൻ നാവികസേനയുടെ ഏറ്റവും നൂതനമായ ഉപരിതല വെസ്സലുകളാണ് MILGEM-ക്ലാസ് കപ്പലുകൾ. ആധുനിക ആയുധങ്ങളും നൂതന സെൻസറുകളും സംയോജിപ്പിച്ച ഏറ്റവും പുതിയ കമാൻഡ് ആൻഡ് കൺട്രോൾ സംവിധാനങ്ങൾ ഈ കപ്പലുകളിൽ സജ്ജീകരിച്ചിരിക്കുന്നു. അന്തർവാഹിനി വിരുദ്ധ യുദ്ധം, വ്യോമ പ്രതിരോധം, ഉപരിതല യുദ്ധം എന്നിവയ്‌ക്ക് അവ പ്രാപ്തമാണ്. പാകിസ്ഥാനായി നാല് MILGEM-ക്ലാസ് കപ്പലുകൾ നിർമ്മിക്കുന്നതിനുള്ള കരാർ 2018 ലാണ് തുർക്കി ഒപ്പുവച്ചത്. കരാർ പ്രകാരം രണ്ട് കപ്പലുകൾ തുർക്കിയിലും ബാക്കിയുള്ള രണ്ടെണ്ണം പാകിസ്ഥാനിലും നിർമ്മിക്കണമായിരുന്നു. ഇപ്പോൾ പിഎൻഎസ് ഖൈബാർ കമ്മീഷൻ ചെയ്യുന്നത് തുർക്കിയിലെ രണ്ട് കപ്പലുകളുടെ നിർമ്മാണം പൂർത്തിയാക്കുന്നതിനെ സൂചിപ്പിക്കുന്നു.

പാക് നേതാക്കൾ സന്തോഷത്തിൽ

തുർക്കിയിൽ നിന്ന് കപ്പൽ സ്വീകരിച്ചതിൽ പാകിസ്ഥാൻ പ്രസിഡന്റ് ആസിഫ് അലി സർദാരിയും പ്രധാനമന്ത്രി ഷഹബാസ് ഷെരീഫും അതിയായ സന്തോഷം പ്രകടിപ്പിച്ചു. പിഎൻഎസ് ഖൈബർ കമ്മീഷൻ ചെയ്തതിന് പാകിസ്ഥാൻ നാവികസേനയെ സർദാരിയും ഷെരീഫും അഭിനന്ദിച്ചു. പാകിസ്ഥാന്റെ സമുദ്രാതിർത്തികളുടെ സുരക്ഷ ശക്തിപ്പെടുത്തുന്നതിനും രാജ്യത്തിന്റെ സമ്പദ്‌വ്യവസ്ഥ, വ്യാപാരം, കടൽ മാർഗങ്ങൾ എന്നിവ സംരക്ഷിക്കുന്നതിൽ ഈ കപ്പൽ നിർണായക പങ്ക് വഹിക്കുമെന്നും അവർ പറഞ്ഞു.